Byłoha vajskoŭca Paŭła Kučynskaha asudzili da 19 hadoŭ źniavoleńnia
U Minskim abłasnym sudzie 15 śniežnia byłomu vajskoŭcu Paŭłu Kučynskamu pryznačyli 19 hadoŭ kałonii va ŭmovach uzmocnienaha režymu, piša «Viasna». Praces vioŭ sudździa Alaksandr Rybakoŭ. Paŭła pryznali vinavatym pavodle siami kryminalnych artykułaŭ — siarod ich «zdrada dziaržavie», «akt teraryzmu», «stvareńnie arhanizacyi dla ažyćciaŭleńnia terarystyčnaj dziejnaści abo ŭdzieł u joj». Letaś arhanizacyja siłavikoŭ Biełarusi BYPOL pisała, što jaho pad katavańniami prymusili ŭdzielničać u pravakacyi suprać ich.
Paŭła Kučynskaha zatrymali prykładna ŭ pačatku vieraśnia 2022 hoda. Tady arhanizacyja BYPOL pisała, što Kučynski byŭ zatrymany ŭ suviazi ź vierahodnym dačynieńniem da spravy «inkasataraŭ»:
«Śpiecsłužby pad katavańniami prymusili jaho ŭdzielničać u pravakacyi, u ramkach jakoj apošni vyjšaŭ na suviaź z pradstaŭnikami BYPOL i prapanavaŭ ździejśnić akcyi pramoha dziejańnia. Usie pieramovy i pierapiska fiksavałasia».
Paŭłu vystavili abvinavačvańni pavodle siami artykułaŭ Kryminalnaha kodeksa:
- č. 1 art. 356 — «Zdrada dziaržavie»;
- č. 2 art. 295-3 — «Niezakonnyja dziejańni ŭ dačynieńni da pradmietaŭ, dziejańnie jakich zasnavana na vykarystańni haručych rečyvaŭ»;
- č. 2 art. 290-5 — «Arhanizacyja dziejnaści terarystyčnaj arhanizacyi i ŭdzieł u dziejnaści takoj arhanizacyi»;
- č. 4 art. 295 — «Niezakonnyja dziejańni ŭ adnosinach da ahniastrelnaj zbroi, bojeprypasaŭ i vybuchovych rečyvaŭ»;
- č. 2 art. 290-4 — «Stvareńnie arhanizacyi dla ažyćciaŭleńnia terarystyčnaj dziejnaści abo ŭdzieł u joj»;
- č. 3 art. 289 — «Akt teraryzmu»;
- č. 1 art. 309 — «Naŭmysnaje pryviadzieńnie ŭ nieprydatny dla ekspłuatacyi stan srodkaŭ čyhunačnaha transpartu».
Praces nad im raspačaŭsia 4 kastryčnika ŭ Minskim abłasnym sudzie. Sudździom pa spravie byŭ pryznačany Alaksandr Rybakoŭ — były staršynia suda Łahojskaha rajona. Mienavita jon u 2021 hodzie vioŭ pieršy sud pa «spravie Cichanoŭskaha».
15 śniežnia Kučynskamu vynieśli prysud — 19 hadoŭ pazbaŭleńnia voli va ŭmovach uzmocnienaha režymu.
Minčanka vybiła piarednija zuby na samakacie, straciła praz heta muža, ale ciapier źbiraje miljony prahladaŭ u tyktoku10
Kamientary