Ciešča eks-staršyni SK radykalna pierabudavała katedž u Drazdach. I prosić za jaho $3,3 miljona FOTY
Na dom u Siomkaŭskim zavułku u Drazdach «Naša Niva» źviarnuła ŭvahu jašče ŭ 2019 hodzie. Tady 71-hadovaja piensijanierka Antanina Ramanava z Hłybokaha sprabavała pradać niedabudavany katedž amal za 900 tysiač dołaraŭ. Ciapier z katedžam adbylisia dziŭnyja mietamarfozy.
Tearetyčna, kaniečnie, žančyna mahła ŭsio žyćcio źbirać hrošy na elitnuju nieruchomaść — ale, napeŭna, dziakujučy ziaciu Valancinu Šajevu (uznačalvaŭ Śledčy kamitet z 2012 pa 2015 hod) praces pajšoŭ značna chutčej.
«Našaj Nivie» tady Antanina paćvierdziła, što heta jaje nieruchomaść: «Hety katedž ja adrazu na siabie budavała. Heta moj. Budavali razam ź dziećmi». A voś na pytańnie, adkul hrošy na takoje žyllo, adkazać admoviłasia: «Spravazdačycca ni pierad kim ja nie źbirajusia».
Na fonie hetaha śmiešna vyhladaje toj fakt, što ŭ svoj čas Valancin Šajeŭ prapanavaŭ uvieści dadatkovuju adkaznaść dla zanadta bahatych čynoŭnikaŭ: «Takaja adkaznaść mahła b być u vyhladzie spahnańnia ŭ dachod dziaržavy majomaści, pamier jakoj značna pieravyšaje dachody čynoŭnika i pachodžańnie jakoj heta słužbovaja asoba nie moža paćvierdzić».
Za nastupnyja hady budynak źmianiŭsia da niepaznavalnaści. Ułaśnik vyrašyŭ pierabudavać jaho i znoŭ vystavić na prodaž — ale ŭžo jak poŭnaściu hatovy dla žyćcia katedž. Ciapier VIP-abjekt jość u bazie realt.by: «Pradajecca novy! (nichto nie žyŭ!) dom u Drazdach. Učastak 14,5 sotak u pryvatnaj ułasnaści!».
Praca na ŭčastku skončyłasia ŭ minułym hodzie. Zamiest dvuchpaviarchovaha katedža ŭ styli «jak va ŭsich» ciapier na ŭčastku staić bolš sučasny adnapaviarchovy dom z płoskim dacham i vielizarnymi voknami. Vyhladaje, što budaŭnikam pryjšłosia źnieści ceły pavierch, kab realizavać ideju architektara.
U haścioŭni, sumieščanaj z kuchniaj (sama kuchnia ŭsiaho 15 kvadrataŭ), panaramnyja vokny i vielmi vysokija stoli.
Niechta moža niezadavolena chmyknuć: z ulikam ščylnaści zabudovy Drazdoŭ vielizarnyja vokny − sumnieŭnaja ideja. Tamu što zamiest utulnaha domu ty faktyčna atrymoŭvaješ akvaryŭm. Adnak usio pradumana: vokny taniravanyja. Heta, pa-pieršaje, abaraniaje ad cikaŭnych pohladaŭ susiedziaŭ. A pa-druhoje, pryhłušaje soniečnaje śviatło i zaścierahaje meblu ad vyćvitańnia.
Miarkujučy pa pradstaŭlenych fatahrafijach, akramia haścioŭni ŭ domie jość majstar-spalnia, pakoj biez mebli (moža być druhoj spalniaj).
Jość taksama pakoj z kaminam. Možna vybirać, na što hladzieć − na połymia ci na Respublikanski centr alimpijskaj padrychtoŭki pa mastackaj himnastycy, jaki ŭzvyšajecca nad płotam.
U adnym z pamiaškańniaŭ znachodziacca saŭna i kupiel.
Bačna, što nad interjeram, u jakim pryjemna spałučajecca hłamur i łoft, pracavaŭ dyzajnier. Na materyjałach nie ekanomili: nijakaha tabie «Kieramina» ci lidskaj farby. Navat u abjavie paznačana: farby amierykanskija, tynkoŭka italjanskaja. Čamuści ŭładalniki katedžaŭ u Drazdach uparta nie žadajuć padtrymlivać ajčynnych vytvorcaŭ.
Mebla taksama zasłuhoŭvaje ŭvahi. Naprykład, šykoŭnaja kanapa, jakaja staić pasiarod haścioŭni, na adnym z polskich sajtaŭ kaštuje amal 25000 złotych — heta prykładna 6190 dołaraŭ.
Ale ž nie ŭsio ŭ katedžy kaštuje šalonych hrošaŭ. Postar z panteraj z majstar-spalni možna zamović na «Aliekspresie» ŭsiaho za 30 dołaraŭ.
Ahulnaja płošča katedžu — 305 kvadrataŭ, žyłaja — 200. Taksama pakupnik atrymaje ŭčastak pamieram 14,5 sotak (łandšaftny dyzajn, kaniešnie, jość).
Darečy, treba adznačyć: pradaviec nie vielmi śpiašajecca pazbavicca ad elitnaj nieruchomaści. Bo pieršy raz abjekt źjaviŭsia ŭ prodažy naprykancy minułaj viasny. Praŭda, tady za jaho prasili «ŭsiaho» $2,95 miljona — i była prypiska «mahčymy torh». Vosieńniu 2023 hoda košt vyras da $3,05 miljona (tady heta byŭ samy darahi dom u Drazdach, vystaŭleny na prodaž). Ciapier ža ŭłaśnik choča atrymać za VIP-katedž užo $3,26 dołara.
Kali vy pakul nie navažylisia vydatkavać takuju sumu na kuplu žylla, možacie dla pačatku arandavać katedž − Viktoryja Azaranka ŭsio jašče šukaje arandatara. Dom znakamitaj tenisistki znachodzicca niepadalok i zdajecca za $6500 za miesiac.
A što Šajeŭ? Jak u 2015 hodzie jaho zvolnili sa Śledčaha kamiteta, to jon bolš nidzie i nie ŭspłyŭ. U 2017 jon pierastaŭ być navat staršynioj Biełaruskaj fiederacyi valejboła. Z taho času nivodnaj zhadki ŭ publičnaj prastory.
Watch on TikTokČytajcie taksama:
Ciešča eks-staršyni Śledčaha kamiteta pradaje niedarobleny katedž u Drazdach za $900 tysiač FOTY
Były pamočnik Łukašenki pradaje dom u Drazdach. Suma ŭražvaje, interjery nie asabliva
Ź niedabudavanaha doma Uciuryna ŭ Drazdach źniali aryšt. Toj pradaje jaho za $1,3 miljona
Kamientary