Kiraŭnik asacyjacyi aŭtadyleraŭ: Rynak novych mašyn spyniŭsia

Biełaruskija aŭtamabilnyja dylery i imparciory faktyčna prypynili svaju dziejnaść, paviedamiŭ kiraŭnik biełaruskaj Aŭtamabilnaj asacyjacyi «BAA» Siarhiej Michnievič.

Pavodle jaho słoŭ, jašče

ŭ śniežni aŭtadylery pradali amal usie najaŭnyja zapasy lehkavych aŭtamabilaŭ. «U apošnija dni minułaha hoda mašyny adpuskalisia ŭ aŭtacentrach dziesiatkami. Usiaho ŭ śniežni dylery pradali niekalki tysiač aŭtamabilaŭ», — adznačyŭ Michnievič.

Pavodle padlikaŭ kiraŭnika BAA, reštki aŭtamabilaŭ dylery pradaduć na praciahu studzienia. Pakul ža amal usie aŭtadylery prypynili prodažy. «Jany prosta nie viedajuć pravilnaha miechanizmu farmiravańnia cen na mašyny. Infarmacyja na hety kont supiarečlivaja», — padkreśliŭ Michnievič.

«Pavodle zajaŭ adnoj z krynic, ukaz №546, što vyznačaje bazu źbirańnia PDV, jašče dziejničaje. Inšyja krynicy śćviardžajuć, što ŭkaz padlahaje karekcyi abo admienie, i karekcyja adbudziecca na praciahu studzienia», — adznačyŭ kiraŭnik BAA.

Jon rastłumačyŭ, što pavodle ŭkazu №546 bazaj źbirańnia PDV źjaŭlajecca roźnica pamiž canoj realizacyi i canoj nabyćcia. «Kali kiravacca adnoj z redakcyj Padatkovaha kodeksa, što byŭ uchvaleny ŭ kancy minułaha hoda i kančatkovuju viersiju jakoha my pakul nie možam atrymać, to tam padobnaja lhota nie značyłasia. U suviazi z hetym dylery apynulisia ŭ tupiku. Jany faktyčna prypynili pracu, čakajučy tłumačeńniaŭ», — skazaŭ Michnievič.

Pavodle jaho słoŭ, dylery raźličvajuć, što admieny dziejnaj ilhotnaj staŭki źbirańnia PDV nie adbudziecca. Razam z tym Michnievič nie vyklučyŭ, što kampanii, jakija pradajuć aŭtamabili ciapier, vielmi ryzykujuć. «Potym ich abvinavaciać u niapravilnym farmiravańni cen, i im daviadziecca dapłacić u biudžet pavyšany PDV», — adznačyŭ kiraŭnik BAA.

Što da papaŭnieńnia amal pustych składoŭ novymi lehkavuškami, to, pavodle słoŭ Michnieviča, mytnyja punkty nie vałodajuć dakładnaj infarmacyjaj ab novych miechanizmach uvozu i realizacyi impartnych aŭtamabilaŭ, što ŭvoziacca ŭ ramkach Mytnaha sajuza. «Navat kali b my i chacieli zavieźci peŭnuju kolkaść aŭtamabilaŭ, dumaju, nie zmahli b ich aformić pa novych praviłach», — kanstatuje kiraŭnik Aŭtamabilnaj asacyjacyi «BAA».

• 0
• 0
• 0
• 0
• 0
• 0