Čamu patok luksavych aŭto išoŭ praz Polšču i jak ich buduć uvozić ciapier
Nočču 23 sakavika ŭ admysłovych čatach, a paźniej u ŚMI pačała źjaŭlacca infarmacyja pra toje, što Polšča prypyniła propusk nabytych u roznych krainych Jeŭropy aŭtamabilaŭ z abjomam ruchavika bolš za 1,9 litra. «Napeŭna, ministr prosta byŭ u šoku ad taho, kolki premijalnych aŭto staić u čarzie na vyjezd u Biełaruś», — razvažajuć pieravozčyki. «Naša Niva» razabrałasia, što adbyvajecca na polskim kirunku i jakaja situacyja z ujezdam praź Litvu i Łatviju.
Na aficyjnym uzroŭni nijakaj infarmacyi pra novyja abmiežavańni niama. Navat biełaruskaja mytnia ŭ svaim paviedamleńni kaža, što daviedałasia pra novyja patrabavańni polskaha boku sa ŚMI.
Adzinaja krynica infarmacyi — nadrukavanyja papierki, jakija polskija mytniki raźmiaścili ŭ punkcie propusku «Tarespal» («Brest).
U ich havorycca, što dla ekspartu aŭto z abjomam ruchavika vyšej za 1,9 litra polskaj mytni patrebna daviedka ad vytvorcy, dzie budzie paznačała, što vytvorca viedaje pra toje, što aŭtamabil nakiroŭvajecca tranzitam praz terytoryju Biełarusi i Rasii. A taksama, što vytvorca viedaje, dzie znachodzicca punkt pryznačeńnia, kim źjaŭlajecca pradaviec i pakupnik. Usio heta nibyta patrebna dla taho, kab nie byli parušany sankcyi.
Abmiežavańni tyčacca tolki Rasii
Što da sankcyj, to z usich krain JEAES jany tyčacca tolki Rasii. Adnak zabarona na ekspart u Rasiju mašyn z ruchavikom abjomam bolš za 1,9 litra abo daražejšych za 50 tysiač jeŭra (u niezaležnaści ad abjomu ruchavika) dziejničaje jašče z 23 červienia 2023 hoda.
Na Biełaruś hetyja sankcyi nie raspaŭsiudžvajucca. Biełarusy, jak i raniej majuć prava nabyvać u ES i ekspartavać u Biełaruś lubyja aŭtamabili, u niezaležnaści ad koštu i abjomu ruchavika.
Na Bałtyjskim kirunku — bieź pieramien
Pa pryčynie taho, što staryja sankcyi na Biełaruś nie raspaŭsiudžvajucca, a niejkich novych abmiežavańniaŭ niama, aŭtamabili z ruchavikom bolš za 1,9 litra i koštam bolš za 50 tysiač jeŭra praciahvajuć pastupać u Biełaruś. Apošnija dni, praŭda, u asnoŭnym praź Litvu i Łatviju.
«Našaj Nivie» ŭdałosia parazmaŭlać ź niekalkimi pieravozčykami, jakija za vychodnyja i noč paniadziełka ŭžo paśpieli pravieźci praź miažu ź Litvoj darahija aŭto ź vialikim abjomam ruchavika.
«Nočču (25.03. — NN) praź miažu ź Litvoj u nas prajechała 4-hadovaja BMW z ruchavikom abjomam 2 litry, i novy Mercedes-Benz z matoram 2,2 litra (2,143 sm³. — NN). Nijakich dadatkovych pytańniaŭ z boku litoŭskaj mytni nie było», — zapeŭnivaje pieravozčyk.
Pa jaho słovach, Litva daŭno stroha sočyć za tym, kab mašyna nakiroŭvałasia mienavita ŭ Biełaruś, a nie ŭ Rasiju.
«Dla taho, kab paśpiachova vyvieźci aŭto praź Litvu, treba mieć poŭny pakiet dakumientaŭ, jakija paćviardžajuć, što pakupnik ź Biełarusi. Dla hetaha davodzicca mieć z saboju paćviardžeńnie pieravodu ad pakupnika, jaki raźličvaŭsia za mašynu praź biełaruski bank, a taksama paćviardžeńnie ad pradaŭca, što jon pryniaŭ hetyja hrošy ad biełaruskaha pakupnika bankaŭskim pieravodam.
Kali ekspartnyja robiacca ŭ Litvie, to ad pakupnika patrabujuć napisać list, dzie jon paćviardžaje, što kuplaje aŭto dla siabie, a nie dla pieraprodažu na RF», — tłumačyć pieravozčyk.
Z roŭnymi dakumientami — praź Litvu, a z «kryvymi» — praz Polšču
Pa słovach surazmoŭcy, u tych, chto kuplaje mašynu nie dla siabie, a na pieraprodaž, časta majucca prablemy z paćviardžeńniem płaciažu, bo ŭ chod iduć nie tolki najaŭnyja raźliki, ale i, naprykład, kryptavaluta.
«Tamu ŭsie mašyny ź niapoŭnym abo «kryvym» kamplektam dakumientaŭ zajazdžali ŭ Biełaruś mienavita praz Polšču. Palaki byli samymi łajalnymi. Jany vypuskali mašyny biez dadatkovych pytańniaŭ, ich nie cikaviła, chto i jak zapłaciŭ za aŭto, kudy jano nakiroŭvajecca, čamu pakupnik — adzin čałaviek, a viazie inšy».
Na dumku pieravozčyka, praz heta stvaryłasia situacyja, što bolšaja častka premijalnych aŭto jechała mienavita praz Polšču. Pakolki punkt propusku «Brest» — pasažyrski pierachod, to ŭsie mašyny prajazdžali svaim chodam. Za styrnom čaściakom znachodzilisia ludzi, jakija nie mieli nijakaha dačynieńnia da aŭto, jakoje pieravozili.
«Maładyja chłopcy za 100 jeŭra pierahaniali hetyja mašyny z Tarespala ŭ Brest. Invojsy ŭ takich aŭto, jak i JECH (ekspartnaja dekłaracyja. — NN), byli aformlenyja na inšaha čałavieka. U vyniku, u čarzie možna było nazirać za tym, jak maładyja chłopcy raśsiakajuć na darežeznych «Majbachach», «Aŭdzi», «BMV», «Łambardžyni».
Praz Łatviju i Litvu ŭvoziać mašyny ź lubym abjomam i canoj
U adroźnieńni ad palakaŭ, litoŭcy daŭno nie prapuskajuć praz svaju miažu mašynu, kali za styrnom znachodzicca nie sam pakupnik aŭto. Płaciež za aŭto, invojs i JECH musiać być aformlenyja na taho, chto niepasredna vyvozić mašynu.
«Kali ŭ čałavieka z dakumientami ŭsio dobra, to praź Litvu biez prablem prajazdžajuć u tym liku i svaim chodam», — kaža surazmoŭca.
Inšy surazmoŭca, jaki jeździć u tym liku praz Łatviju, taksama śćviardžaje, što na łatvijskim kirunku nijakich źmien nie adbyłosia, afarmleńnie mašyn na Biełaruś praciahvajecca ŭ štatnym režymie, jak i raniej.
«Adzinaje, što Łatvija, naprykład, nie vypuskaje niamieckija aŭto na «žoŭtych» (karotkaterminovych tranzitnych) numarach. Jany spasyłajucca na toje, što jany pryznačany tolki dla ruchu pa ES, tamu tym, chto jedzie praz Łatviju, davodzicca kuplać u Hiermanii «čyrvonyja» (doŭhaterminovyja tranzity). Jany kaštujuć da 350 jeŭra, kali «žoŭtyja» da 150», — tłumačyć pierahonščyk.
Čamu Polščy pajšła na taki krok?
Nakolki viadoma, zabarona na propusk aŭto z abjomam ruchavika bolš za 1,9 litra z polskaha boku źjaviłasia paśla taho, jak Tarespal naviedaŭ polski ministr transpartu.
«Vyhladaje, što jon prosta byŭ u šoku ad taho, što ŭbačyŭ, kolki premijalnych aŭto staić u čarzie na vyjezd u Biełaruś, tamu prydumaŭ hetaje praviła, jakoje niemahčyma vykanać», — dzielicca adzin z surazmoŭcaŭ.
Nakolki viadoma, poŭnaja zabarona na prajezd nabytych u ES aŭto z abjomam ruchavika bolšym za 1,9 litra praź miažu z Polščaj praciahniecca da 1 krasavika. Paźniej nibyta musiać źjavicca tłumačeńni.
Niekatorym udajecca praskočyć praz Polšču?
Pry hetym, adzin z surazmoŭcaŭ zapeŭniŭ, što navat paśla źjaŭleńnia zabarony jon viedaje vypadki, kali mašyny z bolšym abjomam ruchavika prajazdžali praz polska-biełaruskuju miažu.
«Ludzi, jakija zmahli paćvierdzić, što hetaje aŭto nabytaje dla siabie, paspračaŭšysia i paskandaliŭšy z polskimi mytnikami, zdoleli aformić ekspart i vyjechać u Biełaruś. Kali z dakumientami ŭsio dobra i sam pakupnik jedzie za styrnom, to ŭ ich prosta niama zakonnych padstaŭ nie vypuścić hetaje aŭto, tamu ŭ vyniku niekatorym udavałasia prajechać i paśla źjaŭleńnia novych patrabavańniaŭ.
Inšaja sprava, kali za styrnom mašyny, jakaja kaštuje 100 i bolš tysiač jeŭra, siadzić 20-hadovy chłopiec sa studenckaj abo pracoŭnaj viza. Naturalna, što mytniki razumiejuć, što mašynu jon tolki pierahaniaje praź miažu. Jany bačać, što i pa dakumientach kiroŭca nie źjaŭlajecca ŭłaśnikam, voś takich dakładna nie prapuskajuć».
Mahčyma, paśla 1 krasavika stanie praściej
Surazmoŭca kaža, što polskaja mytnia (na ŭnutranych punktach, dzie afarmlajuć ekspartnyja dakumienty) praciahvaje afarmlać ekspartnyja dekłaracyi (JECH) na aŭto, jakija pryznačanyja dla ekspartu ŭ Biełaruś biez azirańnia na košt i abjom ruchavika.
Mužčyna vykazvaje mierkavańnie, što palaki naprydumlali hetyja patrabavańni vyklučna dziela taho, kab nie prapuścić da 1 krasavika mašyny, jakija ź vialikaj vierahodnaściu mohuć trapić u RF, paśla taho, jaki ich razmytniać u Biełarusi.
Nahadajem, ad 1 krasavika rasijanam treba budzie dapłačvać roźnicu ŭ mycie za aŭto, jakija byli razmytnienyja ŭ Biełarusi z vykarystańniem lhoty.
Čytajcie taksama:
U Biełarusi novyja staŭki ŭtylizacyjnaha zboru na aŭto. Niekatoryja mašyny mocna padaražejuć, a inšyja naadvarot stanuć tańniejšyja
U Rasii pad inšym brendam adnavili vypusk papularnych u nas biudžetnikaŭ Hyundai i KIA. Novaja nazva i ceny
«Ciabie b baćka praklaŭ»: u Barysavie šyrycca sapraŭdnaja pryčyna maŭčańnia Hienadzia Skitava, centralnaj fihury «małočnaj spravy»3
Kamientary