U Čyrvonym kaściole abiacali ŭ pieršym kvartale pačać budaŭničyja raboty. Što z hetym ciapier?
U Minskim harvykankamie raniej zajaŭlali, što budaŭničyja raboty ŭ zakrytym chramie pavinny pačacca sioleta ŭ pieršym kvartale. Da jaho kanca zastałosia niekalki dzion, i što z rabotami? Pytańniem zacikaviłasia vydańnie Katolik.life.
Prajšło 18 miesiacaŭ z taho času, jak dźviery katalickaha chrama Śviatoha Symona i Śviatoj Aleny (Čyrvonaha kaścioła) u Minsku apiačatanyja. 25 vieraśnia 2022 hoda tut apošni raz celebravali śviatuju Imšu. U nastupnuju noč u chramie adbyŭsia pažar pry dziŭnych abstavinach, paśla jakoha ŭłady abviaścili ab tym, što dalejšaja ekspłuatacyja budynka niebiaśpiečnaja i jon maje patrebu ŭ ramoncie.
26 vieraśnia 2022 hoda kaścioł, jaki naviedvali kala 10 tysiač parafijanaŭ, zakryli dla viernikaŭ.
Z taho času praktyčna nijakija raboty ŭ chramie nie pravodzili, ale abiacali, što jany pačnucca ŭ pieršym kvartale 2024 hoda. Ciapier idzie apošni tydzień pieršaha kvartała, adnak abiacanyja raboty tak i nie pačalisia, udakładnili Katolik.life u parafii. Jak śćviardžajuć vierniki, situacyja nijak nie źmianiłasia ŭ apošni čas:
«Nijakich prykmiet pačatku rabot pakul nie nazirajem, i na hety kont nam ničoha nie paviedamlali. Padčas Vialikaha postu parafijanie malilisia ab tym, kab haradskija ŭłady zachacieli adkryć dla viernikaŭ kaścioł na Vialikdzień».
U kastryčniku 2023 hoda namieśnik staršyni Minskaha harvykankama Arciom Curan, niadaŭna abrany staršynioj Minskaha harsavieta, zajaŭlaŭ:
«Rekanstrukcyja chrama viadziecca pa płanie, raboty nie spynialisia ni na adzin dzień, heta moža paćvierdzić dyrektar KUP «Minskaja spadčyna» [dziaržpradpryjemstva, jakomu aficyjna naležyć budynak chrama]. Padrychtavanaja prajektnaja dakumientacyja, i ŭ pieršym kvartale 2024 hoda pavinny pačacca raboty ŭ budynku. Paśla ich zaviaršeńnia budzie pryniata rašeńnie ab adnaŭleńni dziejnaści kaścioła».
Takuju ž infarmacyju paŭtaryła ŭ listapadzie administracyja Maskoŭskaha rajona Minska:
«Prajekt rekanstrukcyi budynka kaścioła zapuščany ŭ pracu. Pa abjekcie rekanstrukcyi raspracavana prajektna-kaštarysnaja dakumientacyja, jakaja prachodzić usie nieabchodnyja ŭzhadnieńni. Pačatak budaŭničych prac płanujecca ŭ 1 kvartale 2024 hoda».
Paśla hetaha nijakaj novaj infarmacyi aficyjnyja orhany nie publikavali.
Ź dźviarej Čyrvonaha kaścioła źnik dakumient ab apiačatvańni. Restaŭracyja ŭžo pačałasia?
Źjavilisia śviežyja fotazdymki Čyrvonaha kaścioła. Vidovišča biazradasnaje
Prybrali z muzieja, bo ludzi praciahvali na jaho malicca. Vykuplenyja biełarusami eskizy pralivajuć śviatło na nieviadomy raniej abraz z Čyrvonaha kaścioła
Eskizy ałtarnych rośpisaŭ minskaha Čyrvonaha kaścioła vykupili biełarusy zamiežža
Hod jak zakryty Čyrvony kaścioł. Kolki čakać jašče?
Paśla vystupleńnia Łuhanskaha teatra ŭ Minsku adna z hladačak vyhuknuła «Słava Ukrainie!»5
Kamientary