Cichanoŭskaja raspaviała pra vyniki pieramoŭ z pradstaŭnikami «Vialikaj siamiorki»
Na ministerskim samicie G7 u Italii ŭpieršyniu była pradstaŭlena Biełaruś i jaje intaresy. Lidarka demsił Śviatłana Cichanoŭskaja raskazała pra vyniki sustreč z pradstaŭnikami krain «Vialikaj siamiorki».
Cichanoŭskaja adznačyła, što siońnia, 18 krasavika, sustrakałasia ź ministrami zamiežnych spravaŭ «Vialikaj Siamiorki».
«Maja meta tut — viarnuć Biełaruś u mižnarodny paradak dnia, kab mižnarodnaja supolnaść adroźnivała biełaruski režym ad naroda, a izalujučy Łukašenku — nie izalavała biełarusaŭ. Ja zaklikała ministraŭ praciahvać padtrymku našaj hramadzianskaj supolnaści i miedyjaŭ. Raspaviała pra losy našych palitviaźniaŭ, u tym liku Maryi Kaleśnikavaj, Alesia Bialackaha, i što takoje inkamunikada. My havaryli pra pryciahnieńnie režymu da adkaznaści, nie tolki za vajnu suprać Ukrainy, ale i za represii suprać biełarusaŭ.
I biezumoŭna, padymała pytańnie abarony našaj niezaležnaści — Biełaruś nie pavinna stać suciašalnym pryzam dla Pucina. Biełaruś musić być jeŭrapiejskaj, svabodnaj, niezaležnaj i demakratyčnaj dziaržavaj», — raspaviała Cichanoŭskaja.
Ź dziaržaŭnym sakratarom ZŠA Entani Blinkienam jana abmiarkoŭvała padtrymku dla Ukrainy i Biełarusi.
«U hetyja dni prymajecca važnaje rašeńnie ab dapamozie Ukrainie — i ja spadziajusia, što jano budzie pryniataje. Bo losy našych krainaŭ — Biełarusi i Ukrainy — uzajemaźviazanyja», — skazała jana.
Pavodle jaje słoŭ, dziaržsakratara ZŠA vielmi chvaluje los našych palitviaźniaŭ, i ZŠA prykładvajuć namahańni dla ich vyzvaleńnia.
Ź ministarkaj zamiežnych spravaŭ Analenaj Bierbok jany havaryli pra padtrymku Hiermanijaj niezaležnych miedyjaŭ, NDA, pra prahramy reabilitacyi dla palitviaźniaŭ.
Ź ministram zamiežnych spravaŭ Vialikabrytani Devidam Kemieranam abmierkavali mahčymaści praviadzieńnia stratehičnych kansultacyjaŭ ź Vialikabrytanijaj, jak heta ŭžo zroblena z ZŠA. Jon raspavioŭ pra svaju niadaŭniuju sustreču z pradstaŭnikami biełaruskaj hramadzianskaj supolnaści.
A ź Viarchoŭnym pradstaŭnikom ES Žazepam Barelem abmierkavali padtrymku dla biełaruskaj hramadzianskaj supolnaści, a taksama prablemy biełarusaŭ u vyhnańni.
«Ja padziakavała za apošnija rašeńni ES pa Biełarusi, u pryvatnaści padtrymlivać mabilnaść biełarusaŭ i kantakty pamiž ludźmi. Biełarusam patrebna bolš vizaŭ, bolš stypiendyjaŭ, bolš kantaktaŭ ź jeŭrapiejcami.
My niadaŭna praviali sustreču z pradstaŭnikami ES pa tym, jak zrabić dapamohu ES dla Biełarusi bolš efiektyŭnaj, dla miedyjaŭ, hramadzianskaj supolnaści, pryvatnaha biźniesu, jaki vyjechaŭ praz represii. Upieršyniu Jeŭrapiejski sajuz vydzieliŭ hrošy na papularyzacyju biełaruskaj movy i kultury. Ja radaja, što Žazep Barel amal u kožnym vystupie zhadvaje, što budučynia Biełarusi — u Jeŭropie», — raspaviała Cichanoŭskaja.
Naprykancy jana padziakavać usim biełarusam, jakija praciahvajuć zmahacca za pieramieny ŭ našaj krainie. «Viedajcie, svabodny śviet nas padtrymlivaje. A ja budu rabić usio mahčymaje, kab pytańnie Biełarusi nie sychodziła ź mižnarodnaha paradku dnia», — skazała jana.
Maładuju supracoŭnicu «Pielenha» aryštavali za «zakliki da naniasieńnia škody Biełarusi». Joj pahražaje da 12 hadoŭ3
Kamientary