«Pakinuli tolki adnu cyharetu». Što ciapier adbyvajecca pry pierachodzie biełaruska-litoŭskaj miažy

Ad «vykidajcie ŭsie» da pravierki skroź palcy

Ludzi, jakija dniami pierasiakali miažu ź Litvoj, dzielacca, jak adbyvajecca kantrol.

Adnyja padarožniki raspaviadajuć, što litoŭskija mytniki pry praviercy zapatrabavali vykinuć absalutna ŭsiu ježu i napoi.

Žančyna, jakaja ŭčora jechała ź dziciem praz punkt propusku «Bieniakoni», śćviardžaje, što ŭ jaje vypadku litoŭski mytnik prymusiŭ vykinuć navat pakusany jabłyk, jaki jeła dzicia, bo, maŭlaŭ, heta sielhaspradukcyja.

«Mytnik papaŭsia vielmi strohi i pryncypovy, skazaŭ vykinuć usie pradukty, navat adkryty pačak čypsaŭ, jabłyki, u tym liku pakusany», — śćviardžaje žančyna.

Tym, kamu niešta nie padabałasia, prapanavali razam z usimi praduktami viartacca ŭ Biełaruś.

Inšyja kažuć, što im traplali bolš humannyja supracoŭniki. 

Ludzi, jakija ŭčora jechali aŭtobusam ź Minska ŭ Vilniu, śćviardžajuć, što prajšli litoŭski bok mienš čym za hadzinu. 

«Valizki dahladali, ale paviarchoŭna, bolš dla vyhladu, jak mnie padałosia, byli pryjaznyja, pytalisia pra śpirtnoje, cyharety, pradukty. U mianie praktyčna ničoha nie było aproč sucharykaŭ i čypsy dla pierakusu. Ničoha z hetaha vykidać nie prasili», — piša karystalnica čata.

Pavialičyć

Pakidajuć tolki adnu cyharetu

Pasažyrka aŭtobusa, jaki jechaŭ ź Minska ŭ Vilniu ranicaj 5 červienia, situacyju z pravierkami apisvaje ŭ čacie nastupnym čynam:

«Valizki pilna hladziać, usiu ježu zabirajuć, ałkahol taksama, adkryty pačak cyharet zabrali, pakinuli 1 cyharetu».

Inšyja padarožniki, jakija jechali ŭčora praz «Miedniki», taksama kažuć, što litoŭskaja mytnia zahadała vykinuć usie pradukty i napoi. U tym liku tyja, što byli nabytyja ŭ Duty Free. 

«Zamiežny ałkahol z Duty Free taksama zahadali vykinuć, choć biełaruskaha ŭ im ničoha nie było», — kaža padarožnik, jaki jechaŭ praz «Miedniki».

Z tranzitam praściej, ale nie ŭsio tak adnaznačna

Što tyčycca tych, chto jedzie tranzitam, to pravierki taksama vyhladajuć pa-roznamu. Adnyja kažuć, što prajazdžali biez prablem, bo mieli polskija DNŽ i hetaha dakumientu było dastatkova, kab dakazać, što jedzieš nie ŭ Litvu, a ŭ Polšču.

Tym, chto śćviardžaŭ, što jedzie tranzitam, kazali zapaŭniać dekłaracyi. 

Inšyja kažuć, što čuli na litoŭskaj mytni, što tranzitam možna vieźci nie bolš za 2 kiłahramy praduktaŭ. Hałoŭnaje, kab upakoŭka była adkrytaja. Kali Litva — kančatkovy punkt znachodžańnia, to naohuł nijakich praduktaŭ uvozić nielha.

Možna mierkavać, što strohaść vykanańnia abmiežavańniaŭ zaležyć jak ad źmieny ŭ cełym, tak i ad asoby mytnika ŭ pryvatnaści.

U ŚMI pišuć, što kiroŭcam aŭtobusaŭ i maršrutak dazvalajuć mieć z saboj adnu adkrytuju pačku cyharet i butelku vady.

@nashaniva Na miažy ź Litvoj — hory praduktaŭ, napojaŭ i pakietaŭ #biełaruś #litva #hranica #našaniva #biełaruśnovosti #novostibiełarusi ♬ Crime Scene - Avery Alexander

A što z čerhami?

Siarod inšych źmien možna nazvać adsutnaść vielizarnych čerhaŭ ź Litvy ŭ Biełaruś. Ale heta źviazana nie tolki z tym, što litoŭcam ciapier niama sensu jeździć da nas na zakupy, bo im taksama nielha ničoha pravozić.

Nie małuju častku mašyn, jakija stajali ŭ čarzie ź Litvy ŭ Biełaruś, składali aŭtamabili na tranzitnych numarach, jakija hnali z roznych krain Jeŭropy ŭ Biełaruś. Ale z 4 červienia vypuskajuć tolki mašyny, starejšyja za 5 hadoŭ. 

Pavialičyć

Tak, naprykład, učora dniom možna było prajechać abiedźvie miažy ŭ bok Biełarusi praz «Miedniki» ŭsiaho za dźvie hadziny. Karystalnik čata nazvaŭ heta «cudam». 

Pa stanie na 15:30 5 červienia čerhaŭ na vyjezd ź Litvy ŭ Biełaruś siarod lehkavikoŭ niama, što davoli nietypova paśla taho, jak na miažy zastalisia dziejnymi tolki dva z šaści punktaŭ propusku.

Čaho nie skažaš pra vielikahruzy. U «Miednikach» čakajuć ujezdu ŭ Biełaruś 720 fur, a ŭ «Salečnikach» — 664 fury.

• 11
• 0
• 5
• 7
• 1
• 2
• 6
• 0