Pryščapicca ad śvinoha hrypu ŭ Minsku možna za 30 tys.

U Minsku 1 lutaha pačałasia płatnaja vakcynacyja suprać pandemičnaha hrypu A (H1N1).

Jak paviedamiła zahadčyca adździała imunaprafiłaktyki Minskaha haradskoha centra hihijeny i epidemijałohii Iryna Hlinskaja, pryščepki suprać hrypu dastupnyja va ŭsich darosłych paliklinikach i ŭ šerahu dziciačych paliklinik: u 10‑j dziciačaj paliklinicy Zavodskaha rajona, 25‑j dziciačaj paliklinicy Frunzienskaha rajona, haradskim centry vakcynaprafiłaktyki na bazie Dziciačaj infiekcyjnaj balnicy.

Košt pryščepak składaje da 30 tys. rubloŭ.

Imunizacyja ažyćciaŭlajecca vakcynaj «Monahrypoł plus» rasijskaj vytvorčaści. Usiaho jaje dla Minska zakuplena 5 tys. doz. «Heta pieršaja partyja. Dalej my budzie hladzieć, nakolki ŭ joj jość zacikaŭlenaść», — adznačyła Hlinskaja.

Pavodle jaje słoŭ, u Rasii vakcyna «Monahrypoł plus» vykarystoŭvajecca ŭžo bolš za dva miesiacy i dobra siabie zarekamiendavała. Kolkaść postvakcynalnych reakcyj na jaje «vielmi nievialikaja», i pa vynikach vyprabavańniaŭ, jakija pravodzilisia pry daśledavańni vakcyny, ustanoŭlena jaje «vysokaja efiektyŭnaść».

Vakcyna ŭvodzicca ŭ vyhladzie injekcyi adnarazova darosłym i dzieciam, jakim bolš za šeść hadoŭ.

Dzieciam ad 2 da 6 hadoŭ vakcyna ŭvodzicca dvuchrazova ź intervałam u miesiac. Imunitet suprać hrypu A (H1N1) vypracoŭvajecca paśla 14—18 dzion paśla vakcynacyi.

Pavodle infarmacyi Hlinskaj, da 1 lutaha praktyčna zaviaršyłasia biaspłatnaja imunizacyja nasielnictva suprać pandemičnaha hrypu A (H1N1) za košt srodkaŭ respublikanskaha biudžetu. Vakcynacyju prajšli kala 58 tys. čałaviek, hałoŭnym čynam rabotniki arhanizacyj achovy zdaroŭja i słužbaŭ, jakija zabiaśpiečvajuć bieśpierabojnaje funkcyjanavańnie žyćciova važnych sistem (MNS, transpart, ŽKH i inš.). 1—2 lutaha buduć zroblenyja apošnija biaspłatnyja pryščepki.

Jak paviedamiła zahadčyca epidemijałahičnaha adździeła Minskaha haradskoha centra hihijeny i epidemijałohii Alena Fisienka, z 25 pa 31 studzienia na VRVI i hryp u Minsku zachvareła 26.217 čałaviek, ale hryp skłaŭ mieniej jak 1% (56 vypadkaŭ). Kolkaść zachvarełych u paraŭnańni z papiarednim tydniem pavialičyłasia na 2,5 tys. Bolšaść vypadkaŭ zachvorvańnia (14.733) zarehistravanaja siarod dziaciej da 18 hadoŭ. Kolkaść špitalavanych skłała 437, u paraŭnańni z papiarednim tydniem jana pavialičyłasia na 50 čałaviek.

«Epidemičnyja parohi zachvorvańnia ŭ Minsku pakul nie pieravyšanyja, choć pavyšany ŭzrovień VRVI rehistrujecca siarod dziaciej da šaści hadoŭ», — adznačyła śpiecyjalist.

• 0
• 0
• 0
• 0
• 0
• 0
• 0
• 0