Z Homielskaha teatra lalek zvolnili dyrektara Dźmitryja Harelika, paviedamlaje «Zierkała» sa spasyłkaj na krynicy. Z pačatku hoda svaich kiraŭnikoŭ stracili ŭžo niekalki teatraŭ.
Kali mienavita adbyłosia zvalnieńnie, nie ŭdakładnili. Na sajcie teatra pasada dyrektara ciapier vakantnaja. Proźvišča Harelika nie zhadvajecca ŭ tekście pra historyju teatra, choć jon kiravaŭ Homielskim lalečnym z 1 červienia 1992 hoda. Viadoma tolki, što pa stanie na 14 maja 2024 hoda pasada ŭžo była vakantnaj.
Pryčynaj zvalnieńnia ź vialikaj dolaj vierahodnaści stali represii. U studzieni hetaha hoda Harelika sudzili pavodle č. 2 art. 19.11 KaAP (raspaŭsiud ekstremisckich materyjałaŭ). Pravaabaroncy tady tak i nie daviedalisia, u čym abvinavačvali mužčynu i jakoje rašeńnie pryniaŭ sud.
Kali situacyja z sudom stała publičnaj, imia Harelika nie było prybrana z sajta kalektyvu — jon pa-raniejšamu byŭ pakazany jak dyrektar.
Zvalnieńnie Harelika całkam upisvajecca ŭ represiŭnuju palityku ŭładaŭ u śfiery kultury: apošnim časam zvalnieńni ŭ biełaruskich teatrach stali rehularnymi:
- u lutym 2024 hoda była zvolnienaja dyrektarka Minskaha abłasnoha teatra lalek «Batlejka» Śviatłana Čajeŭskaja;
- u sakaviku svaju pasadu straciŭ dyrektar staličnaha Muzyčnaha teatra Siarhiej Pukita;
- u pačatku krasavika — mastacki kiraŭnik Viciebskaha teatra «Lalka» Viktar Klimčuk;
- u traŭni byŭ zvolnieny mastacki kiraŭnik Nacyjanalnaha teatra opiery i baleta Valancin Jelizarjeŭ;
- u žniŭni stała viadoma ab zvalnieńni dyrektara Respublikanskaha teatra biełaruskaj dramaturhii Śviatłany Karukinaj.
U krasaviku taksama byŭ zvolnieny dyrektar Biełaruskaha teatra lalek Dźmitryj Siamionaŭ. Praŭda, paźniej vyśvietliłasia, što jon pajšoŭ na pavyšeńnie — staŭ namieśnikam kiraŭnika ŭpraŭleńnia kultury Minharvykankama.
Kamientary