Katałoniju ŭznačaliŭ praciŭnik adździaleńnia ad Ispanii.
Lidar katałonskich sieparatystaŭ Karles Pučdemon, abvieščany ispanskimi ŭładami ŭ vyšuk, paśla źjaŭleńnia ŭ Barsiełonie znoŭ pakinuŭ krainu. Pra heta ŭ piatnicu paviedamiŭ jahony advakat Hansała Boje, piša Deutsche Welle.
«Pučdemon znachodzicca za miežami ispanskaj dziaržavy», — cytuje jurysta katałonskaja radyjostancyja RAC1.
Były kiraŭnik Katałonii adpraviŭsia ŭ bielhijski horad Vaterłoa, dzie jon pravioŭ papiarednija siem hadoŭ vymušanaj emihracyi, paviedamiŭ hienieralny sakratar jaho partyi «Razam za Katałoniju» Žordzi Turul.
«Jon zajmaŭsia svajoj palityčnaj pracaj i, skončyŭšy jaje, adpraviŭsia dadomu, jak heta robiać usie», — zajaviŭ juryst Pučdemona žurnalistam, majučy na ŭvazie niečakanaje źjaŭleńnie palityka ŭ Barsiełonie.
Pučdemon 8 žniŭnia vystupiŭ pierad tysiačami svaich prychilnikaŭ, paśla čaho znoŭ źnik. Palicyja nie zmahła jaho zatrymać.
Katałoniju ŭznačaliŭ praciŭnik adździaleńnia ad Ispanii
U toj ža dzień, 8 žniŭnia, parłamient Katałonii zaćvierdziŭ kiraŭnikom rehijanalnaj administracyi sacyjalista Salvadora Illu. Jon stanie pieršym z 2010 hoda kiraŭnikom Katałonii, jaki adchilaje jaje imknieńnie da adździaleńnia ad Ispanii.
Na nastupny dzień, 9 žniŭnia, hienieralny sakratar partyi «Razam za Katałoniju» Žordzi Turul dapuściŭ, što jahonaja frakcyja moža spynić padtrymku ŭrada ŭ nižniaj pałacie parłamienta Ispanii. Pa słovach Turula, na źmianieńnie jaho pazicyi paŭpłyvała zaćviardžeńnie Salvadora Illi ŭ jakaści kiraŭnika Katałonii, a taksama admova Viarchoŭnaha suda Ispanii zaćvierdzić amnistyju Pučdemona, niahledziačy na pryniaćcie parłamientam u Madrydzie adpaviednaha zakona.
Kamientary