Zvyčajnaja pravadnica stała Nacyjanalnaj lehiendaj Ukrainy. Čym admietnaja Iryna Jurčanka
Razam z hienierałam, kultavaj śpiavačkaj, baksioram Vusikam hanarovaje zvańnie «Nacyjanalnaja lehienda Ukrainy» atrymała pravadnica Ukrainskaj čyhunki. Jana stała simvałam stojkaści maci-ŭkrainki, syn jakoj trapiŭ u pałon. Ale jana stała taksama simvałam čyhunki, jakaja ratavała ludziej ad vajny. Voś što pra jaje viadoma.
Zvańnie «Nacyjanalnaja lehienda Ukrainy» zasnavali ŭ 2021 hodzie. Z taho času im štohod adznačajucca ludzi, jakija zrabili ŭniosak u stanaŭleńnie niezaležnaj Ukrainy, abaronu dziaržavy, raźvićcio nacyjanalnaj ekanomiki, navuki, adukacyi, kultury, mastactva, sportu, achovy zdaroŭja, a taksama za aktyŭnuju dabračynnuju i hramadskuju dziejnaść.
U hetym hodzie zvańnie atrymalii 11 čałaviek. Bryhadny hienierał vajskovaj kontrraźviedki SBU Ivan Łukaševič — chrosny baćka marskich dronaŭ, dziakujučy jakim Ukraina viarnuła sabie kantrol nad Čornym moram, dvuchrazovaja alimpijskaja čempijonka pa fiechtavańni Volha Charłan, kampazitar Ihar Pokład — i pravadnica «Ukrzaliznyci» Iryna Jurčanka.
Čym admietnaja Iryna Jurčanka?
Ukraincam jana viadoma jak maci znakamitaha syna — Dźmitryja «Aresta» Kazackaha, pres-aficera abaroncaŭ «Azoŭstali» ŭ Maryupali. Jaho zdymki z atočanaha horada ŭ 2022 hodzie stali viadomyja ŭsiamu śvietu. Paśla čatyroch miesiacaŭ pałonu Kazacki vyjšaŭ na svabodu i praciahvaje słužbu ŭ vojsku.
Maci taksama vyznačajecca svaim hieraizmam, ale ŭ paŭsiadzionnym žyćci. Kali jaje Dźmitryj razam ź inšymi abaroncami «Azoŭstali» trymaŭ abaronu, Iryna tydniami pracavała na evakuacyjnych rejsach, jakija dastaŭlali biežancaŭ z uschodu na zachad Ukrainy.
U intervju ŭkrainskamu Vogue Iryna, jakaja maje 30 hadoŭ stažu pravadnicy, zhadvała pra žachi pieršaha evakuacyjnaha rejsu z Kijeva ŭ Užharad, kali ŭ kupe było pa 6—8 pasažyraŭ, jakija vieźli z saboj košak, sabak, papuhajaŭ. Ludźmi byli zapoŭnieny tambury.
«Voś darosłaja para ź niemaŭlom. Iryna cudam vyzvalaje ich miesca ŭ kupe. U mužčyny zryŭ, žančyna dahaniaje, biažyć za im u tambur. Daremna: u niervovym prystupie mužčyna vybivaje rukoj škło, uryvajecca ledzianoje pavietra.
Amierykanski žurnalist naziraje za tym, što adbyvajecca. U jaho jość bilet, ale jon staić usiu darohu z čamadanam u prachodzie, sastupajučy miesca žančynam.
Nie ŭsie takija vietlivyja. Hrupa zamiežnych studentaŭ, niahledziačy na zahad sadžać u ciahnik tolki žančyn i dziaciej, zajmaje apošniaje kupe, tambur i prybiralniu, nie dajučy ŭvajści ŭ jaje inšym. Vychodziačy, jany pakidajuć paśla siabie bardak niby ŭ filmie žachaŭ.
Niejkaja žančyna, razmachvajučy biletam, sprabuje lehčy spać na palicu, dzie ciesna maładym mamie z małym i dziadulu ź invalidnaściu. Jana nie choča čakać, pakul jany vyjduć na prypynku, da jakoha ŭsiaho hadzina. Irynie kaštuje niejmaviernych sił strymlivacca».
Pra toje, što jaje syn znachodzicca na «Azoŭstali», žančyna daviedałasia 1 sakavika, na 6-y dzień vajny. Jasna, što tam — piekła. Rasijanie bambili horad z usiaho, što tolki jość. Z synam jana imknułasia kantaktavać kožny dzień. Kožny ranak žančyna pačynała z esemeski synu. Pišaš — i nie viedaješ, ci budzie adkaz.
15 krasavika Dźmitryj napisaŭ, što druhi raz naradziŭsia. U tuju noč snarad trapiŭ u miesca, dzie jon lažaŭ. Vybuchovaj chvalaj mužčynu vykinuła z łožka, a łožak całkam nakryła kavałkam abrynutaj ściany.
Kali b Dźmitryj zastaŭsia na svaim miescy, to jaho ŭžo b nie było ŭ žyvych, a tak askiepki tolki paranili jamu hałavu. Paśla jon z-pad zavałaŭ dastaŭ dziaŭčynu-kalehu. Jana zastałasia žyvaja.
«Ja słuchała jaho, u mianie serca razryvałasia», — dzialiłasia paźniej svaimi pieražyvańniami z žurnalistami Iryna.
Paśla taho, jak zdymki Dźmitryja stali šyrokaviadomyja, a jon sam trapiŭ u rasijski pałon, u Iryny nie raz brali intervju. Jana stała simvałam mužnaści i nadziei maci-ŭkrainki. Jana šmat raskazvała pra syna i jaho vychavańnie, dzialiłasia tym, jak joj dajucca doŭhija dni i miesiacy čakańnia. Jana nie maŭčała, a raskazvała śvietu pra svaju dolu i dolu svajoj krainy.
«Ja pavinna trymacca dziela taho, kab jon pryjšoŭ i pabačyŭ mianie ŭ adekvatnym psichičnym stanie. Trymaje taksama rabota», — kazała Iryna.
21 vieraśnia 2022 hoda, kali žančyna była na pracy, joj pazvanili ź nieznajomaha numaru. «Synku, to ty?» — spytała žančyna. «Mama, ja va Ukrainie. Mianie abmianiali», — pačuła ŭ adkaz.
«Ja čuju jaho, ale nie mahu ŭśviadomić, pierapytvaju jaho znoŭ i znoŭ», — dzialiłasia Iryna.
Tak zdaryłasia, što Iryna pracavała na pieršym ciahniku, jaki pryjšoŭ u vyzvaleny Chierson. «Ludzi płakali, abdymali pravadnic, nieśli im vosieńskija kvietki», — uspaminaje jana.
Da hetaj pary Iryna Jurčanka praciahvaje pracavać na ciahnikach, jakija ciapier dachodziać da polskaha Chełma.
Žančyna praciahvaje vystupać publična, daje intervju, kab padtrymać ludziej, kab jany nie stracili nadzieju. «Ja viedaju, jak heta — čakać svajo dzicia z pałonu», — havoryć Iryna.
Na cyrymonii ŭručeńnia premii — Iryna Jurčanka pryjšła ŭ vyšyvancy, a ŭ zale siadzieŭ i jaje syn — jana z hodnaściu pacisnuła ruku nie tolki prezidentu Zialenskamu, ale i jahonaj žoncy Alenie, jakaja taksama viedaje, što takoje — pieražyvać za muža.
Kamientary