Paŭstahodździa tamu ŭ Amierycy znajšli cieła nieviadomaha mužčyny. Tolki ciapier palicyja zmahła vyśvietlić jaho imia
I zroblena heta było amal vypadkova.
16 studzienia 1977 hoda — u adnu z samych chałodnych zim u historyi Piensilvanii (ZŠA) — dvoje turystaŭ, jakija zajmalisia chajkinham, znajšli cieła źmiorzłaha maładoha čałavieka, piša «Mieduza».
U spravazdačy palicyi jon byŭ apisany jak bieły mužčyna va ŭzroście ad 25 da 35 hadoŭ z rudavatymi doŭhimi vałasami, rostam 177-180 santymietraŭ i vahoj 70 kiłahramaŭ. U jaho była hustaja barada, a taksama nievialiki šnar na padbarodku.
Mužčyna byŭ apranuty ŭ kurtku z zamšy i alenievaj skury, džynsy, viazany švedar i pachodnyja čaraviki. Na im taksama była termabializna, palčatki i soniečnyja akulary. Na palcy ŭ jaho byŭ załaty piarścionak, a ŭ kišeniach — rasčoska, ałovak, zapałki i drabiaza. Dakumientaŭ u zahinułaha nie było.
Ahlad miesca zdareńnia nie vyjaviŭ śladoŭ złačynstva, a ŭskryćcio pakazała, što pryčynaj śmierci stała pieradaziroŭka barbiturataŭ. Śmierć paličyli samahubstvam. Pra źniknieńnie nichto nie paviedamlaŭ, mužčynu pachavali na municypalnych mohiłkach, i spravu zakryli. Kim jon byŭ, zastałosia nieviadomym.
Nadzieja vyśvietlić asobu mužčyny źjaviłasia tolki praz šmat dziesiacihodździaŭ, kali ŭ ZŠA pačała pracavać Nacyjanalnaja sistema źnikłych bieź viestak i nieapaznanych asob (NamUS) — pravaachoŭnyja orhany pa ŭsioj krainie dadavali tudy infarmacyju ab źnikłych ludziach i znojdzienych ciełach, i ałharytmy šukali siarod ich supadzieńni. Źviestki zahinułaha ź Piensilvanii trapili ŭ NamUS u 2009 hodzie. Praź dziesiać hadoŭ — u 2019 hodzie — baza pakazała dva patencyjnyja supadzieńni z mužčynami z Fłarydy i Ilinojsa, źnikłymi ŭ 1975 hodzie.
Cieła zahinułaha ekshumavali i adpravili ŭ miascovuju balnicu, dzie jaho ahledzieli patołahaanatamy, sudovy antrapołah i sudovy adantołah. Usie miedycynskija zapisy byli ŭniesieny ŭ NamUS — akazałasia, što zahinuły nie maje dačynieńnia da źnikłych u Fłarydzie i Ilinojsie mužčynaŭ.
Paśla ekshumacyi ŭ zahinułaha taksama ŭziali ŭzory DNK. Ich adpravili va ŭniviersitet Paŭnočnaha Techasa ŭ centr, jaki śpiecyjalizujecca na identyfikacyi ludziej, a paźniej i ŭ pryvatnuju kampaniju. Ni taja, ni inšaja sproba vynikaŭ nie dali — supadzieńniaŭ pa bazie ni z adnym čałaviekam nie znajšłosia. Śledčyja taksama płanavali zrabić źlepki čerapa niabožčyka, kab skłaści na ich asnovie fotarobat, ale heta nie ŭdałosia, bo niekatoryja kostki byli paškodžanyja pry ekshumacyi.
Adnak asobu mužčyny ŭ vyniku ŭsio roŭna ŭdałosia ŭstanavić — faktyčna vypadkova.
U NamUS paprasili śledčych ź Piensilvanii abnavić infarmacyju pa adbitkach palcaŭ pamierłaha: u bazie nie było aryhinała, a tolki kopii, jakija byli zanadta nievyraznymi i nie padychodzili dla identyfikacyi. Aryhinał ličyŭsia zhublenym, i palicyja daŭno admoviłasia ad sprobaŭ jaho znajści — paśla atrymańnia zapytu adzin z detektyvaŭ, vyvučajučy archivy ŭ žniŭni 2024 hoda, natknuŭsia na aryhinalnyja adbitki.
Danyja byli pieradadzienyja ŭ NamUS, i pa ich ekśpiert zmoh znajści supadzieńnie — mužčyna byŭ identyfikavany jak 27-hadovy Nikałas Poł Hrab z pryharada Fiładelfii Fort-Vašynhton, raźmieščanaha prykładna za 200 kiłamietraŭ ad miesca, dzie znajšli cieła zahinułaha.
Kab ustanavić pa adbitkach palcaŭ asobu mužčyny, imia jakoha zastavałasia nieviadomym 47 hadoŭ, ekśpiertu spatrebiłasia mienš za hadzinu.
Śledčyja źviazalisia z adnym sa svajakoŭ Hraba, jaki paćvierdziŭ jaho asobu i addaŭ palicyi dakumienty i jaho fatahrafii. Svajaki vykazali žadańnie atrymać cieła mužčyny, kab pachavać jaho na mohiłkach, dzie znachodziacca mahiły inšych členaŭ siamji. U ofisie koraniera zajavili, što na praciahu bližejšych šaści miesiacaŭ paŭtorna rasśledujuć abstaviny śmierci Hraba z ulikam pakazańniaŭ jaho svajakoŭ i siabroŭ — mahčyma, jaho śmierć nie była samahubstvam.
U Minsku zatrymali partnioraŭ Maziepina pa «Urałkalii», adnych z samych bahatych biełarusaŭ Rasii10
Kamientary