«Z 1 kastryčnika nichto pracavać nie budzie». U Biełarusi začyniajucca pryvatnyja damy sastarełych

Z 1 lipienia 2024 hoda ŭ Biełarusi ŭstupili ŭ siłu novyja normy zakanadaŭstva, jakija praduhledžvajuć licenzavańnie pryvatnych sacyjalnych pansijanataŭ. Dziejničać jany pačnuć z 1 kastryčnika.

Vypadkova ci nie, ale atrymałasia, što takija abmiežavańni prymierkavany da Mižnarodnaha dnia pažyłych ludziej. Tym časam pa stanie na 1 studzienia 2023 hoda ŭ Biełarusi pražyvała bolš za 1,5 miljona hramadzian va ŭzroście 65 hadoŭ i starejšych.

Pravierki pryvatnych pansijanataŭ pačalisia jašče ŭ 2022 hodzie. Jak śćviardžajuć prapahandysty z «Minskaj praŭdy», adbyłosia heta na fonie «pastajannych skarhaŭ» ad svajakoŭ, čyje rodnyja byli pastajalcami pansijanataŭ pryvatnaj formy ŭłasnaści.

U kožnaj vobłaści Biełarusi byli sfarmiravany manitorynhavyja hrupy pad kaardynacyjaj Ministerstva pracy i sacyjalnaj abarony, jakija nazirali za pryvatnymi pansijanatami. Z 2022 hoda z 35 pryvatnych pansijanataŭ dla sastarełych i ludziej ź invalidnaściu było začyniena 11 — niekatoryja pa rašeńni suda, niekatoryja spynili dziejnaść samastojna.

Taja ž «Minskaja praŭda» zajaŭlaje, što na vypraŭleńnie parušeńniaŭ i atrymańnie nieabchodnaj licenzii času ŭ pryvatnikaŭ było dastatkova. Bolš za toje, pavodle słoŭ prapahandy, «dziaržava pajšła nasustrač pryvatnamu biznesu, bo ŭ skład manitorynhavych hrup uvachodzili pradprymalniki, jakija ŭnieśli niamała prapanoŭ».

Ale nasamreč situacyja vyhladaje žachliva. Adzin z čytačoŭ «Našaj Nivy» raspavioŭ, što jamu patelefanavali z doma sastarełych, dzie znachodzicca jaho sastarełaja svajačka (žančyna lažačaja, joj nieabchodny pastajanny dahlad) i paprasili na bližejšych vychodnych zabrać jaje, bo z kastryčnika pansijanat pracavać nie moža. Jak vyrašyć pytańnie, mužčyna nie razumieje, a pa telefonie «haračaj linii», jamu nie vielmi dapamahli: rastłumačyli, što ŭ čarhu pastavić mohuć, ale kali jana padydzie — nichto nie skaža, bo achvotnych našmat bolš, čym miescaŭ u dziaržaŭnych ustanovach.

Miž inšym naprykancy 2023 hoda Alaksandr Łukašenka padpisaŭ zakon, zhodna ź jakim trapić u dziaržaŭnyja damy-internaty stała bolš składana.

Usie novaŭviadzieńni byli nakiravany na toje, kab ludziej, jakija majuć patrebu ŭ pastajannaj apiecy i dapamozie, svajaki ŭ bolšaści vypadkaŭ trymali doma. Pieravieści ich u dom-internat zmohuć u tym vypadku, kali stan zdaroŭja nie dazvalaje znachodzicca ŭ svaim žylli.

Jak patencyjnaja klijentka, jakaja šukaje terminova miesca ŭ pryvatnym pansijanacie dla taty, žurnalistka «Našaj Nivy» źviarnułasia ŭ roznyja pryvatnyja ŭstanovy, ale ŭsiudy atrymała admovu. Va ŭsich ich adkazali, što na hety momant praz adsutnaść licenzii zabraniravać miesca dla svajaka niemahčyma.

Niedzie adrazu kažuć, što praca adnoŭlena nie budzie i rajać šukać dziaržaŭnyja ŭstanovy — bo dziaržava ž abiacała dapamahčy kožnamu. Niedzie sprabujuć być aptymistami i kazać, što praca spyniena časova. Ale na pytańnie, kali ž čakać, što ŭstanova adnović pracu, hučyć sumnaje:

— Takija pytańni tolki da orhanaŭ ułady. My b z zadavalnieńniem vykonvali b svaju pracu dalej. Ale jość jak jość.

A ŭ adnym z pryvatnych damoŭ sastarełych situacyju rastłumačyli bolš padrabiazna:

— Nichto z pryvatnikaŭ nie budzie pracavać z 1 kastryčnika. Licenzii niama ni ŭ kaho.

Surazmoŭca śćviardžaje, što patrabavańni, jakija pačali pradjaŭlać da pryvatnych damoŭ sastarełych, nievykanalnyja. Asnoŭnyja pretenzii adnosiacca da budaŭničych normaŭ, a taksama pažarnaj biaśpieki. Reč u tym, što bolšaść damoŭ sastarełych abstalavanyja ŭ zvyčajnych žyłych damach, jakija nichto nie prajektavaŭ z zachavańniem standartaŭ balnic.

Pry hetym jon adznačaje:

— Z dośviedu mahu skazać, što nie va ŭsich pryvatnych damach sastarełych usio sumlenna i dobra. Tamu pravierki i patrabavańni dziaržavy ŭ niekatorym sensie abhruntavanyja. Ale inšaje pytańnie, što pracavać ciapier nie dajuć usim.

Pavialičyć

• 3
• 2
• 0
• 1
• 6
• 5
• 21
• 0