«Hruzinskaja mara» pieramahaje ŭ pravincyi, prajhraje ŭ vialikich haradach Vynik pakul niepradkazalny
U CVK Hruzii užo apracavali biuleteni z 70% učastkaŭ.
Partyja «Hruzinskaja mara», jakaja ciapier pry ŭładzie, nabiraje pakul 53% hałasoŭ — ale padličanyja pieravažna vyniki na małych, viaskovych učastkach. U Tbilisi, Rustavi i Batumi padlik hałasoŭ jašče nie skončany.
Akramia taho, pavodle papiarednich aficyjnych danych, čatyry apazicyjnyja partyi nibyta pieraadoleli paroh u 5% i prachodziać u parłamient. «Kaalicyja pieramienaŭ» nabiraje 11,19%, «Adzinstva — nacyjanalny ruch» — 9,79%, «Mocnaja Hruzija» — 9,05%, «Hacharyja — za Hruziju» — 8,26%.
Adrazu paśla zaviaršeńnia hałasavańnia, niahledziačy na adsutnaść kančatkovych vynikaŭ, prychilniki «Hruzinskaj mary» pačali śviatkavać pieramohu ŭ Tbilisi, zapuskajučy saluty kala svajho ofisa, i ŭžo atrymali vinšavańni ad premjera Vienhryi Viktara Orbana. Hanarovy staršynia partyi (faktyčny jaje zakulisny kiraŭnik) Bidzina Ivanišvili padziakavaŭ prychilnikam, padkreśliŭšy, što «partyja damahłasia redkaha pośpiechu ŭ ciažkich umovach».
Apazicyja, adnak, taksama abviaściła pra svaju pieramohu.
Zhodna z ekzitpołam Edison Research, apublikavanym telekampanijaj Formula, apazicyjnyja siły ŭ sukupnaści nabirajuć 51,9%, tady jak «Hruzinskaja mara» — 40,9%. Ekzitpoł pravodziŭsia na ŭsioj terytoryi Hruzii, akramia niekantralavanych centralnym uradam Abchazii i Paŭdniovaj Asieci.
Prezidentka Hruzii Sałome Zurabišvili taksama pavinšavała prajeŭrapiejskija siły ź pieramohaj, adznačyŭšy, što, pavodle jaje źviestak, apazicyja nabrała 52% hałasoŭ, i heta jašče biez uliku hałasoŭ dyjaspary. Na svajoj staroncy ŭ sacsietcy Ch jana napisała: «Jeŭrapiejskaja Hruzija pieramahaje z 52% niahledziačy na sproby falsifikacyi vybaraŭ».
Raniej miascovyja ŚMI paviedamlali, što na vybarčy štab apazicyjnaj partyi «Nacyjanalny ruch» (partyja ciapier źniavolenaha byłoha prezidenta Michaiła Saakašvili) adbyŭsia napad. Na terytoryju štab ŭvarvalisia nieviadomyja z dubinkami i ŭčynili bojku z prychilnikami partyi.
Kamientary