Zamiest zajaŭlenych šmatdzietnych siemjaŭ u novabudoŭlu ŭ Minsku zasialajuć achoŭnikaŭ Łukašenki

Chto novyja žychary?

Pavodle infarmacyi «Lusterka», u navabudoŭli pa adrasie vuł. Vałhahradskaja, 74 bolš za pałovu kvater akazalisia źviazanymi sa Słužbaj biaśpieki Łukašenki i jaje supracoŭnikami. Dva dziasiatki pamiaškańniaŭ aficyjna znachodziacca ŭ apieratyŭnym kiravańni hetaj struktury, a kala saraka novych uładalnikaŭ nieruchomaści fihuravali va ŭciečkach jak słužboŭcy achovy Łukašenki.

Naprykład, u śpisie ŭładalnikaŭ novych kvater — Ilja Pahulajeŭ, jaki šmat razoŭ traplaŭ na fota ź mierapryjemstvaŭ z udziełam Łukašenki. Padčas finału konkursu «Mis Biełaruś» u vieraśni 2025 hoda jon siadzieŭ prosta pierad palitykam pa susiedstvu ź jaho pres-sakratarkaj Natallaj Ejsmant.

Pavialičyć

Achoŭnik Uładzisłaŭ Kavaleŭski zasłaniaŭ saboj palityka ŭ Biškieku niekalkimi miesiacami paźniej. A były milicyjanier Andrej Puzyrenka stajaŭ za śpinami naviedvalnikaŭ chrama ŭ Raŭbičach, kali Łukašenka pryjechaŭ tudy ŭ studzieni 2026 hoda.

Pavialičyć

Trochpakajoŭka ŭ novym domie dastałasia ciełaachoŭniku Arciomu Sabiaščanskamu, jaki niekalki razoŭ traplaŭ na fota jak supravadžalnik Mikałaja Łukašenki. Jahony novy susied Alaksandr Paškievič čaściej pracavaŭ na mierapryjemstvach z udziełam staršyni Pałaty pradstaŭnikoŭ Ihara Sierhijenki, a Raman Karačan kantralavaŭ abstanoŭku padčas pajezdki ŭ Iran Ramana Hałoŭčanki.

Pavialičyć

Varta adznačyć, što nie ŭvieś 16‑paviarchovy dom pierajšoŭ da słužby biaśpieki. Z dapamohaj «Kibierpartyzan» i bota «Voka Zmahara» «Lusterka» daviedałasia, što niekatoryja žychary fihuravali va ŭciečkach u suviazi sa słužbaj u strukturach MUS. U śpisie ŭładalnikaŭ taksama znajšlisia imiony niekalkich supracoŭnikaŭ Minharvykankama.

Piać kvater znachodziacca ŭ kiravańni Apieratyŭna-analityčnaha centra pry Łukašenku (AAC) — adnaho z samych zakrytych viedamstvaŭ Biełarusi, jakoje aficyjna abaraniaje ad uciečak dziaržtajamnicy i «inšyja źviestki, jakija achoŭvajucca ŭ adpaviednaści z zakanadaŭstvam». Taksama tam mohuć žyć i zvyčajnyja ludzi, nie źviazanyja ź dziaržsłužbaj.

Dla kaho budavali hety kvartał?

Zakazčykam hetaha doma było Upraŭleńnie kapitalnaha budaŭnictva Centralnaha rajona Minska, raboty vykonvała arhanizacyja «Mapid». Pobač adzin za adnym pabudavali adrazu piać šmatpaviarchovikaŭ: pačali ŭ lipieni 2023-ha, a skončyli ŭ śniežni 2025-ha.

Kiraŭnik administracyi Pieršamajskaha rajona Vadzim Pieradnia paviedamlaŭ, što ŭsie piać damoŭ pryznačanyja dla tych, chto maje patrebu ŭ palapšeńni žyllovych umoŭ. ŚMI nie raz nazyvali hetaje miesca «novym kvartałam dla šmatdzietnych».

Pavialičyć

Dla čatyroch damoŭ možna znajści aficyjnyja prajektnyja dekłaracyi, dzie paznačanyja ŭmovy kupli kvater. U kožnaj zhadvałasia, što šmatpaviarchoviki budujuć «dla hramadzian, u pieršuju čarhu šmatdzietnych siemjaŭ, jakija stajać na ŭliku takich, jakija majuć patrebu ŭ palapšeńni žyllovych umoŭ».

Pavialičyć

A voś dla hetaha piataha doma — № 74, dzie ŭ vyniku raźmiaścilisia tyja, chto harantuje biaśpieku Łukašenki, taki dakumient znajści nie ŭdałosia. Mahčyma, jaho nie było, albo publikacyju zrabili ŭ niedastupnym dla pošuku farmacie.

Supracoŭniki achovy Łukašenki mahli stajać u čarzie na palapšeńnie žyllovych umoŭ razam z 171 600 inšymi minskimi siemjami. Pavodle infarmacyi «Lusterka», da atrymańnia novych kvater u mnohich ź ich nie było svajoj nieruchomaści ŭ Minsku. U niekatorych žyłpłošča była, ale kvadratnych mietraŭ mahło nie chapać. A voś šmatdzietnyja siarod navasiołaŭ daloka nie ŭsie, u bolšaści siemjaŭ — pa 1—2 dziciaci

Kolki kaštuje takoje žyllo?

Novyja kvatery nie byli biaspłatnymi, adnak mahli abyścisia značna tańniej za rynačnuju canu dla Minska. Canu kvadratnaha mietra ŭ «siłavym» domie № 74 nie publikavali, žychary susiednich šmatpaviarchovikaŭ taho ž zabudoŭščyka nazyvali žurnalistam sumy ŭ 2100—2300 rubloŭ za kvadrat.

Pavialičyć

Jak daviedałasia «Lusterka», mnohija navasioły sa Słužby biaśpieki afarmlali lhotnyja kredyty ad «Biełarusbanka» na 20 hadoŭ, sumy pazyk skłali ad 50 da 90 tysiač rubloŭ. Kvatery, nabytyja na takich umovach, nielha pradavać da pahašeńnia zapazyčanaści.

A voś tyja, chto nabyŭ žytło biez bankaŭskaj pazyki, majuć prava vystavić jaho na prodaž. U internecie možna znajści adzinkavyja abjavy pra pieraprodaž kvater u niepubličnym domie № 74. U ich paznačali ceny ŭ 5400 i 6460 rubloŭ za mietr.

Pavialičyć

Vierahodna, takoj mahčymaściu skarystaŭsia Alaksiej Škut sa Słužby biaśpieki. U studzieni 2026‑ha jaho siamja aformiła trochpakajovuju kvateru ŭ navabudoŭli na vulicy Vałhahradskaj, a ŭ lutym pradała jaje (suma ździełki nieviadomaja). Užo ŭ sakaviku siamja kupiła ŭčastak i dom u Dziaržynskim rajonie. Darečy, biez žytła ŭ Minsku Alaksiej nie zastaŭsia: jašče z 2014‑ha na jaho była aformlenaja ipatečnaja adnapakajoŭka na vulicy Tyškievičaŭ.

• 0
• 3
• 2
• 6
• 0
• 0
• 12
• 0