Kiraŭnik MZS Litvy: Pakul Biełaruś dapamahaje Rasii, padstavaŭ dla skasavańnia sankcyjaŭ niama

Pakul Biełaruś padtrymlivaje rasiejskuju ahresiju suprać Ukrainy i praciahvaje hibrydnyja dziejańni suprać susiednich krainaŭ, padstavaŭ dla źmieny sankcyjnaj palityki niama. Pra heta ministr zamiežnych spravaŭ Litvy Kiastucis Budrys zajaviŭ u intervju prajektu «Vot Tak». Pavodle Budrysa, Vilnia nie bačyć pryčynaŭ źmianiać ciapierašni padychod da Miensku, praciahvaje kaardynavać dziejańni z sajuźnikami i adnačasova rychtujecca da mahčymaha ŭzmacnieńnia pahrozaŭ z boku Rasiei.

Sankcyi suprać Biełarusi źmianiać nie buduć

Pavodle słovaŭ Kiastucisa Budrysa, Litva rehularna abmiarkoŭvaje sa Złučanymi Štatami jak ahulnuju palityku ŭ dačynieńni Biełarusi, tak i pytańni vyzvaleńnia palitviaźniaŭ.

«My abmiarkoŭvajem sa Złučanymi Štatami jak ich ahulnuju palityku ŭ dačynieńni Biełarusi, tak i kankretnyja namahańni dla vyzvaleńnia palityčnych źniavolenych. Litva aktyŭna ŭdzielničaje ŭ hetym. My nadajem łahistyčnuju dapamohu, dajem prytułak abaroncam demakratyčnych kaštoŭnaściaŭ i pravoŭ čałavieka ź Biełarusi, a taksama pradstaŭnikam apazicyi. Hetuju pracu my praciahniem i nadalej. My taksama kansultujemsia nakont sankcyjaŭ Jeŭrapiejskaha Źviazu, ich pierśpiektyvaŭ i pryčynaŭ, praź jakija jany byli ŭviedzienyja», — skazaŭ Budrys.

Ministr padkreśliŭ, što pazicyja Litvy zastajecca niaźmiennaju.

«Pakul Biełaruś padtrymlivaje rasiejskuju ahresiju suprać Ukrainy, ździajśniaje hibrydnyja dziejańni suprać susiednich krainaŭ — Litvy i Polščy, a ciapier na fonie ŭzmacnieńnia nielehalnaj mihracyi i suprać Łatvii, — niama nijakich padstavaŭ śćviardžać, što pryčyny dla sankcyjaŭ źnikli», — zajaviŭ jon.

Budrys adznačyŭ, što sankcyi ES buduć dziejać jak minimum da pačatku nastupnaha hoda.

«Ja nie baču nijakich prykmietaŭ taho, što ciapier hetuju palityku treba mianiać. My i nadalej budziem prytrymlivacca raniejšaha kursu. My bačym, što Złučanyja Štaty časam vykarystoŭvajuć inšy padychod i zadziejničajuć sankcyi jak instrumient dla vyzvaleńnia palityčnych źniavolenych. Ale Litva maje inšy pohlad na situacyju, bo škoda ad dziejańniaŭ Biełarusi nanosicca biespasiarednie nam», — skazaŭ ministr.

Pavodle słovaŭ kiraŭnika litoŭskaha MZS, havorka idzie nie tolki pra mihracyjny kryzis, ale i pra inšyja instrumienty cisku z boku Miensku.

«Havorka idzie i pra ŭžo zhadanuju nielehalnuju mihracyju, i pra vykarystańnie kantrabandy jak instrumientu cisku, i pra inšyja zachady. Heta pastajanny cisk. Ja liču, što sankcyi pracujuć, jany nieabchodnyja, a dziejańni ŭ hetaj śfiery pavinny kaardynavacca jak minimum na rehijanalnym uzroŭni», — adznačyŭ Budrys.

Rasieja raźličvaje na praciahłaje supraćstajańnie

Pavodle acenki Budrysa, Maskva rychtujecca da doŭhaterminovaj kanfrantacyi z Zachadam i moža pasprabavać pravieryć hatoŭnaść NATO.

«Pamyłkaj Rasii moža stać sproba vyprabavać adzinstva NATO — pravieryć nas u tym ci inšym miescy. My ŭžo ciapier bačym u publičnaj prastory niamała padobnych sihnałaŭ, što razmovy i dyskusii pra takija płany ŭ Rasiei sapraŭdy adbyvajucca», — skazaŭ Budrys.

Pry hetym ministr padkreśliŭ, što rychtavacca da takich scenaroŭ nieabchodna zahadzia.

«Nie treba čakać kankretnaha papiaredžańnia, kab pačać rychtavacca. Treba prosta rabić svaju spravu. Kali našaja hatoŭnaść budzie vysokaj, kali my zahadzia pradumajem rašeńni i budziem dziejać chutka i ŭzhodniena, Rasieja nie zmoža skarystacca ni šeraj zonaj, ni zatrymkaj u pryniaćci rašeńniaŭ», — zajaviŭ jon.

Pavodle słovaŭ Budrysa, sajuźnikam nie treba nanova šukać vyrašeńnia

«Mnie zdajecca, nam nie varta zabyvacca, što nasamreč my viedajem, što treba rabić. Ciapier nieabchodna naroščvać temp realizacyi našych płanaŭ», — skazaŭ ministr.

Budrys taksama prakamientavaŭ rasiejskija sudovyja pazovy suprać krainaŭ Bałtyi. Pavodle jaho, Vilnia zahadzia viedała pra rychtavańnie hetych krokaŭ i papiaredžvała partnioraŭ ź Jeŭraźviazu.

«My daviedalisia pra hety namier užo niekatory čas tamu. Ja asabista razam z kalehami — ministrami zamiežnych spravaŭ inšych krainaŭ Bałtyi — infarmavaŭ ministraŭ zamiežnych spravaŭ dziaržavaŭ — čalcoŭ ES pra płany Rasii. Tady heta byŭ jašče tolki namier, a ciapier jon užo realizavany: Rasieja źviarnułasia ŭ sud», — raspavioŭ Budrys.

Jon pierakanany, što havorka idzie nie pra pravavuju sprečku, a pra vykarystańnie sudovych miechanizmaŭ u palityčnych metach.

«Heta adzin ź instrumientaŭ prapahandy. Heta pieratvareńnie prava ŭ zbroju, vykarystańnie jurydyčnych miechanizmaŭ dla dasiahnieńnia palityčnych metaŭ. Takija niebiaśpiečnyja precedenty dyskredytujuć i sami pravavyja miechanizmy», — zajaviŭ jon.

Sa słovaŭ kiraŭnika litoŭskaha MZS, abvinavačańni Maskvy nie vytrymlivajuć krytyki.

«Ja bačyŭ hetyja abvinavačańni. Usie jany vysmaktanyja z palca i nie majuć ničoha ahulnaha z rečaisnaściu. Ale my razumiejem, što jany važnyja dla toj realnaści, jakuju Rasieja stvaraje dla ŭłasnaha nasielnictva i sprabuje raspaŭsiudžvać dalej, u krainach našych sajuźnikaŭ i nie tolki», — skazaŭ Budrys.

Jon dadaŭ, što Litva daŭno sutykajecca z rasijskimi infarmacyjnymi apieracyjami i navučyłasia im supraćstajać.

«My jość mišeńniu prapahandysckaj i dezynfarmacyjnaj vajny. My taksama jość metaj tak zvanych apieracyjaŭ FIMI — zamiežnaha infarmacyjnaha manipulavańnia i ŭmiašańnia. My ŭžo bačyli mnostva prykładaŭ taho, jak Rasija zadziejničaje roznych udzielnikaŭ i arhanizacyi ŭ inšych krainach. I my ŭmieli supraćstajać takim dziejańniam raniej i praciahvajem heta rabić ciapier», — adznačyŭ ministr.

Akramia taho, kiraŭnik litoŭskaj dypłamatyi ličyć, što adnoju z hałoŭnych pamyłak było b sprabavać adkazvać Rasii ŭ miežach naviazanaha joju infarmacyjnaha paradku dnia.

«Ale važna nie trapić u raskručany Rasiejaj prapahandyscki młyn: kali my pačynajem apraŭdvacca ŭ miežach jaje naratyvu, my tolki ŭzmacniajem jaho. My ŭžo bačyli, jak vydumanyja parušeńni pravoŭ čałavieka vykarystoŭvalisia jak nahoda dla vajny suprać Ukrainy ŭ 2014 hodzie», — zajaviŭ Budrys.

• 2
• 0
• 0
• 1
• 0
• 1
• 0
• 0