Budučy kredyt pad 1% na novabudoŭli abrastaje padrabiaznaściami. Jak źmienicca rynak nieruchomaści?
«Druhasny rynak stracić 20—30% pakupnikoŭ — tych, kamu nie treba kuplać mienavita zaraz i chto moža paćvierdzić banku dachody», — miarkuje Natalla Litoŭskaja.
Rynak nieruchomaści žyvie ŭ čakańni kredytnaj prahramy Biełarusbanka, jakaja moža istotna źmianić situacyju z kuplaj kvater.
Pavodle papiaredniaj infarmacyi, dziaržaŭny bank budzie vydavać kredyty na kuplu novabudoŭlaŭ pad vyhadny pracent: pieršyja dva hady pad simvaličny 1%. A pa skančeńni hetaha pieryjadu — pad 15,4% hadavych.
Zaraz Biełarusbank padpisvaje partniorskija pahadnieńni z zabudoŭščykami, jakija buduć uklučanyja ŭ prahramu.
Pa źviestkach ekśpierta pa nieruchomaści Natalli Litoŭskaj na stadyi padpisańnia amal usie minskija kamiercyjnyja zabudoŭščyki.
«Padazraju, da 10 žniŭnia ŭsie, chto padpisaŭ partniorku, zapuściać rekłamu — kab paśpieć zafiksavać uvahu pakupnikoŭ», — piša jana.
Litoŭskaja adznačaje, što staŭka paśla hrejs-pieryjadu składzie 15,4% hadavych, pryčym z pryviazkaj da staŭki refinansavańnia.
Rezkaha rostu cen na starcie Litoŭskaja nie čakaje. Na jaje dumku, častka zabudoŭščykaŭ padymie ceny prykładna na 4% — na kamisiju banka.
Najmacniej ža prahrama ŭdaryć pa druhasnaj nieruchomaści.
Pavodle acenki Litoŭskaj, druhasny rynak stracić 20—30% pakupnikoŭ — tych, kamu nie treba kuplać mienavita zaraz i chto moža paćvierdzić banku dachody: «Da zabudoŭščykaŭ z partniorskim kredytam pojduć baćki, jakija kuplajuć dzieciam kvateru na vyrast, i tyja, chto razhladaje žyllo jak piensijnuju padušku biaśpieki.
Pry hetym prapanova na druhasnym rynku pačnie raści. «Kali ŭ ciabie jość «lišniaja» nielikvidnaja kvatera, samy čas jaje pradać, uziać kredyt i za dva hady pahasić jaho, pakul staŭka 1%, — heta značyć, pavialičyć likvidnaść amal bieź pierapłat. Kali jašče taki varyjant padvierniecca?» — razvažaje Litoŭskaja.
Na jaje dumku, pry padzieńni popytu baza prapanoŭ budzie nazapašvacca, a pradaŭcy — nie adrazu, miesiacy praz dva, bo rynak iniertny — stanuć bolš zhavorlivymi, pryčym va ŭsich siehmientach.
Dastaniecca i inviestaram, jakija tolki vychodziać na druhasny rynak u jakaści pradaŭcoŭ i raźličvajuć pradać mietry daražej, čym takija ž na stadyi budaŭnictva. «Zrešty, jany mohuć i pačakać zakančeńnia ščodraj akcyi — partniorskaja prahrama Biełarusbanka nie biesterminovaja», — piša ekśpiertka.
Sam Biełarusbank płany ab ipatecy pakul aficyjna nie anansavaŭ.
Kamientary