Prezidenckaja honka ŭ ZŠA radykalna padzialiła maładych žančyn i mužčyn. U kaho jakija pryjarytety?
U toj čas, jak maładyja žančyny padtrymlivajuć demakrataŭ, ich ravieśniki-mužčyny vykazvajuć padtrymku Donaldu Trampu, što źjaŭlajecca rezkim razvarotam u paraŭnańni ź pieradvybarčaj honkaj 2020 hoda. U čym pryčyna?
Ab biesprecedentnym raskole siarod moładzi da 30 hadoŭ piša The Wall Street Journal. U lutym i lipieni 2024 hoda vydańnie apytała vybarcaŭ (500 i 250 čałaviek) va ŭzroście da 30 hadoŭ pa šerahu aktualnych dla amierykanskaha hramadstva pytańniaŭ i paraŭnała vyniki z apytańniem AP VoteCast, praviedzienym napiaredadni prezidenckich vybaraŭ u 2020 hodzie.
Vydańnie adznačaje, što vybarcy va ŭzroście da 30 hadoŭ byli aporaj Demakratyčnaj partyi jak minimum z momantu zakančeńnia prezidenctva Ronalda Rejhana ŭ 1989 hodzie. Ale ciapier hetaja hrupa hłyboka padzielena pa hiendarnaj prykmiecie. Apytańnie pakazała, što bolšaść maładych mužčyn vystupaje za pieramohu respublikancaŭ, u toj čas jak maładyja žančyny zastajucca prychilnicami demakrataŭ.
Istotnaje razychodžańnie ŭ pohladach
Paraŭnańnie vynikaŭ apytańnia 2020 hoda i apytańniaŭ 2024 hoda śviedčyć, što maładyja mužčyny va ŭzroście ad 18 da 30 hadoŭ za čatyry hady całkam źmianili svaje palityčnyja simpatyi. Ciapier kožny druhi (50%) padtrymlivaje Donalda Trampa, u toj čas jak za demakrataŭ vykazvajecca 36%.
Kali havaryć pra žančyn, to zaŭvažna źnižeńnie absalutnaj padtrymki imi abodvuch kankurentaŭ. Ale pry hetym suadnosiny zastalisia praktyčny bieź źmienaŭ. U padtrymku demakrataŭ ciapier vykazvajucca 60% žančyn.
Kali havaryć pra staŭleńnie da asnoŭnych prablem, jakija turbujuć amierykancaŭ, to vyniki apytańniaŭ 2024 hoda pakazali istotnaje razychodžańnie ŭ pazicyi maładych mužčyn i žančyn.
Tak, mužčyny ŭ adroźnieńnie ad žančyn značna mienš vystupajuć za terminovyja dziejańni, nakiravanyja na praduchileńnie źmienaŭ klimatu (adpaviedna 32% i 67%). Ich taksama mienš turbujuć palityčnyja debaty ab lehalizacyi abortaŭ (heta chvaluje 53% žančyn i 16% mužčyn).
Značnaje razychodžańnie pamiž dźviuma hrupami nazirajecca adnosna pytańnia hiendarnaj identyčnaści. Kožnaja druhaja maładaja žančyna (52%) vystupaje za toje, kab dazvolić dzieciam va ŭzroście da 18 hadoŭ vybirać svaju hiendarnuju identyčnaść biez zhody baćkoŭ. U toj čas, jak dva z troch mužčyn (67%) vykazvajucca suprać.
Siarod maładych mužčyn značna bolš prychilnikaŭ praciahu palityki, nakiravanaj na źnižeńnie padatkaŭ. A siarod žančyn — tych, chto vystupaje suprać budaŭnictva ściany na miažy ź Mieksikaj.
U čym pryčyna?
Wall Street Journal adznačaje, što hety biesprecedentny raskoł aznačaje saboj kulminacyju šmathadovaha zmahańnia za raznastajnaść, spraviadlivaść i inkluziŭnaść, jakoje padtrymlivajuć demakraty.
Niekatoryja mužčyny śćviardžajuć, što stracili ekanamičny, kulturny i palityčny ŭpłyŭ z-za akcentu na roŭnaść i raznastajnaść. Jany ličać, što ŭvaha da hetych pytańniaŭ pryviała da źnižeńnia ich roli i mahčymaściej u hramadstvie.
Inšyja vykazvajuć niezadavolenaść fieminisckimi i prahresiŭnymi pohladami, jakija, na ich dumku, daminujuć va ŭniviersitetach, industryi zabaŭ i na mnohich pracoŭnych miescach.
Mnohija maładyja mužčyny adčuvajuć siabie pakinutymi demakratami i ličać, što respublikanskija palityki źviartajucca da ich napramuju. Administracyja Bajdena zasiarodziłasia na palityčnych zvarotach da žančyn, niabiełych ludziej («people of color») i inšych vybarcach demakrataŭ.
Vydańnie zaŭvažaje, što niekatoryja apytanyja mužčyny zajavili, što bajacca krytyki z boku žančyn i vykazvajuć svajo abureńnie tolki sam-nasam i ź inšymi mužčynami. Niekatoryja skazali, što chavajuć svaje kansiervatyŭnyja pohlady, bo znajomyja žančyny zajavili, što nie buduć sustrakacca z mužčynami pravych pohladaŭ.
Ciapier pytańnie ŭ tym, ci zmoža kandydat ad demakrataŭ Kamała Charys viarnuć padtrymku maładych mužčyn ci jašče bolš adšturchnie ich.
Usiu Biełaruś pačali razmaloŭvać prymityŭnymi murałami ad BRSM 7
Kamientary