«Paranoikaŭ zaŭsiody chapała»

U niadzielu, u dzień minskaha kancertu Rammstein, udzielniki litaraturna-mastackaj akcyi «Abaronim maładuju biełaruskuju dziaržaŭnaść ad ekstremizmu» spalili ŭ Sievastopalskim parku knihi Mikałaja Čarhinca.

«U historyi było šmat amataraŭ abaranić svaju dziaržavu ad ekstremizmu. Paranoikaŭ zaŭsiody chapała», – kamientavaŭ, raspalvajučy vohnišča, «kandydat u kandydaty», viadomy błohier Jaŭhien Lipkovič.

Inicyjataram akcyi byŭ sam Lipkovič.

Napiaredadni akcyi jon zaprasiŭ usich achvočych sabracca ŭ Sievastopalskim parku, kab «abaranić maładuju biełaruskuju dziaržaŭnaść ad ekstremizmu». U svaim błohu jon zaklikaŭ nieabyjakavych da zajavaŭ i inicyjatyvy kiraŭnika Hramadskaj rady pa maralnaści Mikałaja Čarhinca zachapić z saboj ramany hienierała.

U pryznačany čas u parku sabrałosia prykładna dziesiać čałaviek, u tym liku, biezumoŭna, Jaŭhien Lipkovič, jaki źbirajecca bałatavacca pa Vałhahradskaj vybarčaj akruzie № 54. Kandydat u kandydaty ŭ deputaty pryjšoŭ padrychtavany: z kardonnaj skryniaj i zaplečnikam, napchanym ramanami Mikałaja Čarhinca (u tym liku i našumiełymi, uličvajučy zajavy zmahara za maralnaść, «Tajamnicami avalnaha kabinieta»).

Zrazumieła, što akcyja prachodziła biez sankcyi čynoŭnikaŭ. Tym nie mienš, pradstaŭnikoŭ uładaŭ nie nazirałasia, što možna było rastłumačyć tym, što pažarnaj niebiaśpieki ŭ hetym miescy možna było nie bajacca, abo salidarnaściu ź idejaj zajaŭlenaj akcyi.

– Ci treba mastaku prasić dazvołu ŭ Minharvykankamie na napisańnie karciny? – zadaŭ rytaryčnaje pytańnie Lipkovič.

I paśla karotkaj paŭzy sam ža i adkazaŭ:

«Hetaja akcyja – litaraturna-mastackaja. Tak što navošta ŭ kahości prasić na jaje dazvołu...»

Hrupa padtrymki sabrałasia nievialikaja. Adnak, adznačyŭ «kandydat u kandydaty», hałoŭnaje nie masavaść, a duchoŭnaja padtrymka. Ja pravioŭ by hety fłešmob, – dadaŭ jon, – navat kali b nie źbiraŭsia bałatavacca ŭ deputaty».

Raspalvajučy vohnišča, Lipkovič kazaŭ, što historyja pamiataje mnohich amataraŭ abaranić svaju dziaržavu ad ekstremizmu. Da prykładu, paśla taho, jak u 1865 hodzie ŭ Amierycy było skasavanaje rabstva, źjaviŭsia ku-kłuks-kłan. Ci kali ŭ 1949 hodzie eks-ministr abarony ZŠA Džejms Forestał vykinuŭsia z akna z krykam «Ruskija iduć!».

– Paranoikaŭ zaŭsiody chapała. I zaŭsiody znojducca tyja, kamu tolki daj što-niebudź paabaraniać, – skazaŭ Lipkovič. – Narod u nas lanivy, siudy pryjšło ŭsiaho niekalki čałaviek. Ale, viedaju, mnohija z zadavalnieńniem spalili b knihi Čarhinca, i heta źviazana nie tolki z kancertam Rammstein.

Nahadajem, Biełaruskaja hramadskaja rada pa maralnaści, jakuju ŭznačalvaje Mikałaj Čarhiniec, zapatrabavała ad arhanizataraŭ kancertu Rammstein u Minsku zrabić papiaredni prahlad prahramy vystupleńnia hurta. U Radzie paličyli, što muzyki buduć «razburać biełaruskuju dziaržaŭnaść». Praŭda, kiraŭnictvam Ministerstva kultury prośba Čarhinca była adchilenaja.

Udzielniki fłešmobu praciahvali razmaŭlać kala vohnišča, a ŭ hety čas u Sievastopalskim parku, dziela jakoha Lipkovič i vyrašyŭ bałatavacca ŭ deputaty (kab adstajać jaho zachavańnie), atrymlivali asałodu ad cišyni adzinokija łyžniki i sabakavody.

• 0
• 0
• 0
• 0
• 0
• 0
• 0
• 0