20 hadoŭ tamu Litva pieršaja zajaviła ab svaim vychadzie sa składu SSSR

Litva adznačaje 20‑hodździe adnaŭleńnia niezaležnaści. 11 sakavika 1990h. pozna ŭviečary tahačasny novaabrany staršynia Viarchoŭnaha Savieta Litoŭskaj SSR Vitaŭtas Łandśbierhis abviaściŭ vyniki pajmiennaha hałasavańnia za akt «Ab adnaŭleńni Niezaležnaj Litoŭskaj Dziaržavy». Nivodzin z deputataŭ nie prahałasavaŭ «suprać».

Litva i, najpierš, Vilnia, rychtujecca da ŭračystaściaŭ, ale sioleta ŭ Litvie zaŭvažajuć, što brakuje plakataŭ, upryhožvańniaŭ da Dnia niezaležnaści — arhanizatary vinavaciać kryzis. Z‑za aščadnaści prezydent taksama pryniała rašeńnie ab bolš ścipłaj uznaharodzie padpisantam Akta ab adnaŭleńnia niezaležnaści, čym planavałasia raniej.

«Heta sapraŭdy vielmi važnaja dla data, i, chacia našaja dziaržava siońnia pieražyvaje nie najlepšyja časy, i šmat ludziej znachodziacca ŭ składanaj sytuacyi, hetaje śviata dla nas i radasnaje, i pačesnaje. My vinšujem adzin adnaho i śviatkujem razam z maładziejšym pakaleńniem, tłumačym im, jakoje značnaje heta śviata dla našaj krainy i ŭsich, chto žyvie ŭ Litvie», — skazaŭ u interviju napiaredadni śviata eŭraparlamantar Zihmantas Balčycis.

Jak buduć śviatkavać

Bližejšyja čatyry dni ŭ Litvie buduć vychodnymi.

Siońnia ranicaj ad 10‑j hadziny ludzi pačnuć źbiracca la Katedralnaha saboru dla ŭračystaha šeścia, u Sojmie budzie dzień adkrytych dźviarej, planujucca adkrytyja kancerty, festy i pačastunki, praspekt Hiedymina ŭpryhožyli vitražy, zroblenyja rukami vilenskich vučniaŭ. Abjadnany demakratyny ruch Litvy ładzić uračystaść na Turavaj hary, uračystuju prahramu padrychtavaŭ ruch Sajudzis.

Adzin ź viadomych litoŭskich navukoŭcaŭ, prafesar universyteta Vitaŭta Vialikaha Branisłavas Hinzialis adznačyŭ, što šmatlikija krytyčnyja vodhuki, jakija možna pačuć ad žycharoŭ Litvy adnosna palityčna‑ekanamičnaj sytuacyi ŭ krainie śviedčać, što samy hałoŭny zdabytak adnaŭleńnia niezaležnaści Litva atrymała:

«Heta dakazvaje, što my — sabodnyja, i svabodu hetuju treba canić. Dziaržavu stvaraje nichto inšy, jak my sami. Dziaržava — heta my ŭsie, nu, a ŭrad — taki, jaki my abrali. Siońnia my šmat krytykujem naš urad, i abhruntavana, ale dziaržava, suverenitet — heta zusim inšaje. I toje, što my majem dastatkova demakratyčnuju krainu, što kožny moža biaz strachu kazać, što žadaje, heta śviedčyć pra našyja dasiahnieńni ŭ demakratyi, svabodzie i niezaležnaści».

Kaho zaprasili, i chto pryjedzie

Na uračystaści zaprošanyja kiraŭniki dziaržavaŭ i ŭradavyja delehacyi. U Vilni čakajucca 5 prezydentaŭ — susiednich Polščy, Łatvii, Estonii, a taksama Finlandyi i Słavienii dy ŭradavyja delehacyi niekalkich krain, u ich liku i Biełarusi, i Rasiei. Prezydenty Rasiei i Biełarusi ŭ Vilniu siońnia nia pryjeduć, ale Łukašenka i Miadźviedzieŭ dasłali ŭ Litvu vinšavalnyja listy i zaprasili prezydenta Litvy naviedać abiedźvie hetyja krainy ŭ luby zručny dla jaje čas.

U Litvie rychtavalisia da sustrečy prezydenta Biełarusi, i pieršy kiraŭnik adnoŭlenaj niezaležnaj Litvy Vitaŭtas Łandsberhis, jaki raniej rezka krytykavaŭ aficyjny Miensk za parušeńni demakratyčnych normaŭ, padtrymaŭ hetaje zaprašeńnie i stanoŭča adznačyŭ sproby Łukašenki nie adryvać svaju krainu ad eŭrapiejskich karanioŭ. Adkaz na persanalnaje zaprašeńnie prezydenta Litvy Dali Hrybaŭskajcie ad Alaksandra Łukašenki pryjšoŭ tolki napiaredadni śviata. U śviacie 11 sakavika voźmuć udzieł vice‑premjer Biełarusi Viktar Bura, jaki ŭznačalić biełaruskuju aficyjnuju delehacyju, i staršynia rasiejskaj mižuradavaj kamisii.

Pavodle prezydenta Litvy, vielmi važny ŭžo sam fakt aficyjnaha vinšavańnia ź Dniom adnaŭleńnia niezaležnaści Litvy z boku Miensku i Maskvy,

čaho Vilnia «dačakałasia ŭpieršyniu za apošnija hady».

Vinšavańni da 20‑hodździa adnaŭleńnia niezaležnaści žycharam Litvy dasłaŭ prezydent ZŠA Barak Abama. U vinšavalnym pasłańni Abama zajaviŭ, što padziei 11 sakavika byli vyznačalnymi dla viartańnia demakratyčnych kaštoŭnaściaŭ u Centralnaj i Ŭschodniaj Eŭropie.»Adnaŭleńnie niezaležnaści Litvy 20 hadoŭ tamu stałasia majakom nadziei dla narodaŭ śvietu, jakija imknulisia da svabody», — adznačyŭ prezydent ZŠA.

• 0
• 0
• 0
• 0
• 0
• 0
• 0
• 0