Biełaruski dom u Varšavie nie viedaje, što budzie ź jaho pamiaškańniem u 2025 hodzie
U minułym hodzie Biełaruski dom u Varšavie sutyknuŭsia z prablemami finansavańnia pamiaškańnia — Polšča admoviłasia pakryvać vydatki. Na toj čas atrymałasia załahodzić spravu, ale, što budzie sioleta, pakul nieviadoma, raskazaŭ Biełsatu kiraŭnik Biełaruskaha domu ŭ Varšavie Aleś Zarembiuk.

Aleś Zarembiuk raskazaŭ polskamu vydańniu «Gazeta Prawna», što ŭ 2024 hodzie ŭpieršyniu nie było padtrymańnia ŭ finansavańni budynku na Kryničnaj, 6 u Varšavie ad Departamentu raźvićcia supracy MZS.
Što budzie ŭ 2025 hodzie, stanie jaśniej u najbližejšy čas, adznačaje Zarembiuk u razmovie z «Biełsatam».
«Naš budynak naležyć Respublicy Polšča. Jak budzie vyhladać situacyja ŭ hetym hodzie, my absalutna nie viedajem, tamu što hod tolki pačaŭsia. Zvyčajna niejkija konkursy ministerstvaŭ na padtrymańnie startujuć albo ŭ lutym, albo ŭ sakaviku. Jak budzie vyhladać situacyja ŭ hetym hodzie ani my, ani budź-jakoje ministerstva pakul nie moža skazać. Ale my pracujem i praciahvajem tuju ž dziejnaść, jakoj zajmalisia», — kaža Aleś Zarembiuk.
«Gazeta Prawna» nahadała, što Polšča abmiežavała i pracu Centru dapamohi pałka imia Kastusia Kalinoŭskaha na Kryničnaj, 6. Jon byŭ zakryty ŭ kancy červienia 2024 hoda.
«My takim čynam chacieli paźbiehčy błakady finansavańnia i atrymlivali sihnały, što, kali my heta zrobim, situacyja moža źmianicca. Ale ŭ vyniku heta nie pryniesła rezultataŭ», — skazaŭ Zarembiuk.
Jon adznačyŭ, što centr nie finansavaŭsia ni ź jakich donarskich hrošaj. Bolš za ŭsio dapamahała biełaruskaja dyjaspara z usiaho śvietu. Tym nie mienš, centr pryjšłosia zakryć. Pavodle «Gazeta Prawna», praz toje, što Polšča chacieła paźbiehnuć abvinavačvańniaŭ u rychtavańni napadu na Biełaruś. Vierahodna, reč była ŭ tym, što na Kryničnaj, 6 pravodziŭsia taksama rekrutynh biełarusaŭ u połk Kalinoŭskaha. Pavodle infarmacyi pałka, z krasavika 2024 hoda nabor viadziecca praz čat-bot PKK.
«My atrymali infarmacyju, što moža być prafinansavany budynak, kali ŭ hetym budynku nie budzie dapamohi centru. Prosta prapahanda łukašenkaŭskaja i rasiejskaja padajuć heta jak dapamohu «nacystam» i jak vajskovuju dapamohu. Ale tut nie było vajskovaj dapamohi. Heta była dapamoha humanitarnaja. Pra heta śviedčać sotni zdymkaŭ, jakija zastalisia. Na ich možna pabačyć, što heta broniekamizelki dla našych chłopcaŭ, biełarusaŭ, jakija vyrašyli baranić Ukrainu. Heta byli leki, kansiervy, mašyny.
I kab nie było praz heta nieparazumieńniaŭ, my spynili pracu hetaha centru naprykancy červienia minułaha hoda. Z taho času tut bolš nie adbyvajecca nijakaj dapamohi», — padvioŭ rysu Aleś Zarembiuk.
Kamientary
Hałodnyja , chałodnyja , jany paprasili niejkuju paradu - dzie , što , kudy biehčy u Polščy .
Kiraúnik hetaj ,,ustanovy,, im navat harbaty z chlebam nie prapanavaú , hroša paškadavaú