Usiaho 100 pradstaŭnikoŭ apazicyi va ŭčastkovych kamisijach

U skład učastkovych vybarčych kamisij na miascovych vybarach uklučana 100 z 912 pradstaŭnikoŭ palityčnych partyj i subjektaŭ, jakija ŭvachodziać u kaalicyju Abjadnanych demakratyčnych sił. Dola pradstaŭnikoŭ demsił va ŭčastkovych kamisijach składaje 0,15%.

«U toj ža čas palityčnyja partyi, jakija padtrymlivajuć uładu, takija jak Biełaruskaja sacyjalna-spartyŭnaja partyja, Ahrarnaja partyja, Kamunistyčnaja partyja Biełarusi i Respublikanskaja partyja pracy i spraviadlivaści atrymali va ŭčastkovych kamisijach 1.333 miescy», — adznačajecca ŭ paviedamleńni prezidyuma ADS.

U pracentnych adnosinach pradstaŭnictva demakratyčnych partyj va ŭčastkovych vybarkamach akazałasia «značna mienšym», čym u akruhovych (0,5%). Heta tłumačycca tym, što «mienavita na vybarčych učastkach idzie realny padlik padadzienych za kandydataŭ hałasoŭ».

Prezidyum ADS zajaŭlaje, što farmiravańnie ŭčastkovych kamisij prachodziła tajkom ad hramadskaści i partyjnych struktur. Pradstaŭniki dempartyj časta nie tolki nie zaprašalisia na pasiadžeńni vykanaŭčych kamitetaŭ, na jakich vyrašalisia pytańni, źviazanyja z farmiravańniem učastkovych kamisij, ale i «śviadoma dezaryjentavalisia pradstaŭnikami vykanaŭčych orhanaŭ ułady ab miescy i časie praviadzieńnia pasiadžeńniaŭ».

U mnohich vypadkach pradstaŭnikam ADS admaŭlałasia ŭ pravie ŭvajści ŭ składy kamisij pa całkam nadumanych pryčynach, naprykład, u suviazi z adsutnaściu vopytu. U kamisii nie byli ŭklučany byłyja deputaty parłamienta i miascovych savietaŭ, daktary i kandydaty navuk, dypłamavanyja jurysty. «U toj ža čas skroź členami vybarčych kamisij bieśpieraškodna zaćviardžalisia 18-20-hadovyja členy «hramadska-dziaržaŭnych» Biełaruskaha respublikanskaha sajuza moładzi i respublikanskaha hramadskaha abjadnańnia «Biełaja Ruś», — padkreślivajecca ŭ paviedamleńni.

Prezidyum ADS adznačaje, što ŭłady praciahvajuć kampaniju cisku na ŭdzielnikaŭ vybaraŭ ź liku svaich apanientaŭ, a taksama na ich svajakoŭ. Takija fakty adznačany ŭ Mahilovie, Babrujsku, Hrodnie, Astraŭcy, Krupkach, Oršy, Słonimie, Baranavičach.

«U padkantrolnych uładam ŚMI dziejnaść apazicyjnych partyj aśviatlajecca praduziata i vyklučna ŭ niehatyŭnym śviatle. U toj ža čas rehijanalnyja dziaržaŭnyja vydańni zakryvajuć vočy na šmatlikija parušeńni vybarčaha zakanadaŭstva, što dapuskajucca z boku miascovych uładaŭ», — havorycca ŭ zajavie.

Na dumku prezidyuma ADS, nieprazrystaje farmiravańnie kamisij «moža śviedčyć ab płanavańni ŭładami masavych vybarčych falsifikacyj».

Vybary ŭ miascovyja saviety projduć 25 krasavika.

• 0
• 0
• 0
• 0
• 0
• 0
• 0
• 0