U pałonie va ŭkraincaŭ ciapier bolš za 4000 rasijan. Praporcyja rezka źmianiłasia za apošni čas
Prezident Ukrainy Uładzimir Zialenski padčas sustrečy z žurnalistami ŭ Miunchienie paviedamiŭ, što ŭkrainski bok maje ŭ pałonie bolš za 4 tysiačy rasijskich vajskoŭcaŭ.
Zialenski adznačyŭ, što heta stanoŭčaja navina, bo raniej va ŭkrainskim pałonie było tolki 1,5 tysiačy rasijan, a ciapier kolkaść pieravysiła 4 tysiačy.
Praŭda, u rasijskim pałonie znachodzicca amal udvaja bolš — kala 7 tysiač ukrainskich vajennapałonnych. I heta maje tłumačeńnie.
U pieršyja ž dni vajny, karystajučysia efiektam niečakanaści, kliny rasijskich vojskaŭ hłyboka ŭvajšli na terytoryju Ukrainy. U pieršyja ž tydni vajny ŭ akružeńnie trapiŭ harnizon Maryupala — hety horad pratrymaŭsia daŭžej, čym Bresckaja krepaść. Jany pryniali ŭdar na siabie, adciahnuli na siabie bajazdolny kułak rasijskaj armii. Vynikam takoj abarony Maryupala staŭ niepaźbiežny pałon. U pieršyja tydni rasijanie ŭ pałon amal nie traplali, a ŭkraincaŭ zdavałasia šmat: pamiežniki, bajcy Unutranych vojskaŭ, jakija ścierahli Čarnobylskuju AES, siłaviki-tyłaviki ŭ zachoplenych pieršym udaram haradach.
Usie abmieny pałonnymi pačynajučy z 2022 hoda pravodzilisia pa formule «adzin na adzin». Usiaho z pačatku vajny da siońnia va Ukrainu viarnulisia prykładna 6 600 čałaviek.
Na sustrečy z žurnalistami mižnarodnych infarmacyjnych ahienctvaŭ 5 červienia 2024 hoda Uładzimir Pucin zajaŭlaŭ, što ŭ rasijskim pałonie znachodzicca 6465 ukrainskich vajskoŭcaŭ. Tady ž jon nazvaŭ ličbu ŭ 1348 rasijskich vajskoŭcaŭ, jakija znachodziacca va ŭkrainskim pałonie. Heta značyć, što z taho času ŭ pałon traplali pieravažna rasijskija vajskoŭcy.
Prezident Ukrainy padkreśliŭ, što idealna było b pravieści abmien «usich na ŭsich», ale Ukraina hatovaja i da abmienu pavodle pryncypu «tysiača na tysiaču». Dy i ŭvohule — hałoŭnaje, kab praces choć by niejak išoŭ.
«Dobra, kali jany buduć hatovyja pamianiać navat «sto na sto». Luby krok dla nas u hetym kirunku — heta stanoŭčaje rašeńnie», — skazaŭ Uładzimir Zialenski.
Užo sam fakt taho, što bolš za 10 tysiač rasijskich vajskoŭcaŭ trapili ŭ pałon, śviedčać pra nievysokuju bajazdolnaść i nizki maralny duch rasijskaj armii. Dla paraŭnańnia: za čas vojnaŭ u Iraku i Afhanistanie, kali amierykancy praciahły čas akupavali varoža nastrojenyja terytoryi, u pałon trapiła ŭsiaho 7 amierykanskich vajskoŭcaŭ.
Rasijski pieramoŭnik Uładzimir Miadzinski, pahražajučy Ukrainie, niadaŭna pravioŭ paralel z Paŭnočnaj vajnoj, jakaja doŭžyłasia 21 hod.
Adnak cana, jakuju płacić Rasija, moža być zavialikaja navat dla maskoŭskaha kiraŭnictva.
Svajaki ŭkrainskaha sałdata, jaki ličyŭsia zahinułym, ale viarnuŭsia z pałonu, abaviazany viarnuć 300 tysiač jeŭra pachavalnych
Padčas abmienu pałonnymi vyzvalili byłoha biełaruskaha vajskoŭca Hienadzia Ščerbania, jakoha Rasija ŭtrymlivała amal čatyry hady
Ukraina viarnuła damoŭ 157 vajennapałonnych
U Abu-Dabi damovilisia pra abmien 314 vajennapałonnymi
Kamientary