Aŭstralijskija daśledčyki pasprabavali adkazać na pytańnie, ci zdolny čałaviek razmnažacca pa-za miežami Ziamli. Dla hetaha jany praviali niezvyčajny ekśpierymient — prapuścili śpiermu praź minijaciurnuju «pałasu pieraškod», jakaja imituje ŭmovy mikrahravitacyi.
Pytańnie ab tym, ci zdolnaje čałaviectva stać mižpłanietnym vidam, napramuju zaležyć ad mahčymaści paśpiachovaha začaćcia i naradžeńnia dziaciej u kosmasie. Niadaŭniaje daśledavańnie aŭstralijskich navukoŭcaŭ z Univiersiteta Adełaidy pralivaje śviatło na toje, jak umovy mikrahravitacyi ŭpłyvajuć na repraduktyŭnyja pracesy.
Jak piša The Telegraph, dla pravierki zdolnaści śpiermatazoidaŭ da vyžyvańnia ŭ ekstremalnych umovach daśledčyki stvaryli śpiecyjalnuju minijaciurnuju «pałasu pieraškod» z płastyka, jakaja imituje žanočyja repraduktyŭnyja šlachi. Unutry jaje śpiermatazoidy pavinny byli «prapłyści» ad adnaho kanca da druhoha. Kab uznavić umovy kosmasu, pryładu pastajanna krucili, stvarajučy efiekt amal poŭnaj adsutnaści hravitacyi. U takich umovach pravieryli śpiermu jak čałavieka, tak i myšej.
Vyniki pakazali, što ŭ mikrahravitacyi śpiermatazoidy značna horš aryjentujucca: ich zdolnaść prajści «trasu» źniziłasia prykładna na 50%. U vyniku ahulnaja vierahodnaść paśpiachovaha apładnieńnia ŭpała prykładna na tracinu ŭ paraŭnańni z zvyčajnymi ziamnymi ŭmovami. Takija danyja paćviardžajuć, što praces začaćcia ŭ kosmasie budzie patrabavać ad arhanizma značna bolšych resursaŭ.
Adnak vyniki daśledavańnia, apublikavanyja ŭ časopisie Communications Biology, utrymlivajuć i niečakanyja vysnovy. Navukoŭcy zaŭvažyli, što mikrahravitacyja vystupaje ŭ roli žorstkaha pryrodnaha filtra. Stresavyja ŭmovy adsiejvajuć słabyja kletki, dazvalajučy dasiahnuć mety tolki samym žyćciova zdolnym śpiermatazoidam, što moža stać peŭnaj pieravahaj dla kaśmičnaj repradukcyi.
Tym nie mienš asnoŭnaja pahroza dla budučych kałanistaŭ toicca nie ŭ samim začaćci, a ŭ pieršych sutkach paśla jaho. Daśledčyki vyjavili, što praz 24 hadziny paśla apładnieńnia situacyja rezka paharšajecca: kolkaść sfarmavanych embryjonaŭ istotna źmianšajecca, a tyja, što vyžyvajuć, majuć prykmiety nizkaj jakaści.
Daśledčyki miarkujuć, što dla paśpiachovaha razmnažeńnia pa-za Ziamloj nieabchodna budzie znajści sposaby abaranić embryjon u hetyja krytyčnyja pieršyja hadziny.
Siońnia niekatoryja futurysty, u tym liku zasnavalnik SpaceX Iłan Mask, budujuć ambitnyja płany pa pieratvareńni čałaviectva ŭ mižpłanietny vid šlacham stvareńnia pasieliščaŭ na Miesiacy, a zatym i na Marsie. Isnujuć prahnozy, što pieršaje dzicia, začataje pa-za miežami Ziamli, moža źjavicca ŭ vyniku pałavoha aktu pary padčas turystyčnaha kaśmičnaha palotu.
Adnak navukovaja supolnaść zaklikaje da strymanaści, padkreślivajučy, što apładnieńnie — heta tolki pačatkovy etap nadzvyčaj składanaha pracesu. Napieradzie jašče šmat hadoŭ daśledavańniaŭ, pierš čym čałaviectva ŭbačyć pieršaje dzicia, začataje i narodžanaje ŭ kosmasie.
Kamientary