Z-błohier «Vajavoda viaščaje» sa 170 tysiačami padpisčykaŭ paabiacaŭ skončyć žyćcio samahubstvam. Ale, zdajecca, vyžyŭ

Lotčyk bajavoha viertalota Ka-52, staršy lejtenant Alaksiej Ziamcoŭ (pazyŭny «Vajavoda») i aŭtar Z-kanała «Vajavoda viaščaje» (bolš za 160 000 padpisčykaŭ) skončyŭ žyćcio samahubstvam z-za cisku namieśnika hałoŭkama VKS, hienierał-lejtenanta Uładzimira Kraŭčanki, jakomu nie padabaŭsia telehram-kanał «Vajavody». Taksama lotčyk u svaim samahubstvie abvinavaciŭ kamandzira častki Aŭramienku i vajennaha śledčaha Kantemirava, paviedamlaje telehram-kanał «Astra».

Da 2023 hoda Ziamcoŭ byŭ administrataram kanała «Paviernutyja na vajnie», ale ŭ vieraśni adździaliŭsia i zavioŭ svoj kanał. Z-za krytyčnych publikacyj Ziamcova adchilili ad palotaŭ.

Akramia taho, Kraŭčanku nie spadabaŭsia post u «Paviernutych na vajnie» ab tym, što lotčykaŭ-źniščalnikaŭ Su-34 prymušali zajmacca strajavoj padrychtoŭkaj paśla bajavych vyletaŭ. Za hetuju publikacyju Kraŭčanka prapanavaŭ Ziamcovu adpravicca ŭ špital i takim čynam zvolnicca, ale zatym «Vajavodzie» daravali. Ziamcoŭ adznačyŭ, što Kraŭčanka rehularna adpraŭlaŭ lotčykaŭ u špitali i takim čynam zvalniaŭ sa słužby.

Uvosień 2025 hoda Ziamcoŭ paśla kamandziroŭki daviedaŭsia, što jamu zdradžvaje žonka, złaviŭ jaje paluboŭnika, vyviez u les i daŭ jamu «pi*lej, ale nie žorstka».

Za heta jaho adpravili ŭ SIZA na 4,5 miesiaca, abvinavaciŭšy ŭ pahrozie zabojstvam, psavańni majomaści i vymahalnictvie ŭ asabliva bujnym pamiery, bo paluboŭnikam byŭ pamočnik Ziamcova, jaki atrymlivaŭ ad jaho zarpłatu.

Viasnoju 2026 hoda Ziamcova pa chadajnictvie kamandzira voinskaj častki, pałkoŭnika Aŭramienki vyciahnuli ź SIZA, adpraviŭšy lotčyka jak zeka ŭ šturmavoje padraździaleńnie.

4 krasavika 2026 hoda Ziamcoŭ pakazaŭ u svaim kanale niajakasnuju kasku adnaho z vajskoŭcaŭ motastrałkovaha padraździaleńnia, paprasiŭšy padpisčykaŭ «nie śmiajacca». Na nastupny dzień na jaho nacisnuli i «Vajavodzie» pryjšłosia publikavać pa prośbie «abviaržeńnie» z demanstracyjaj jakasnaj ekipiroŭki sałdat.

Ziamcova viarnuli ŭ avijacyju pad kiraŭnictvam pałkoŭnika Aŭramienki, ale na apošniaha nacisnuła načalstva, pryhraziŭšy spravaj ab «pieravyšeńni paŭnamoctvaŭ», bo Aŭramienka nibyta adpraviŭ lotčyka Ziamcova vajavać u piachotu. Tamu pałkoŭnik Aŭramienka spałochaŭsia i vyrašyŭ adpravić Ziamcova ŭ SIZA, abvinavaciŭšy ŭ «dyskredytacyi armii RF». Ziamcoŭ śćviardžaŭ, što Aŭramienka heta rabiŭ pa ŭkazcy Kraŭčanki, na jakoha Ziamcoŭ mieŭ kampramat.

Taksama Ziamcoŭ źviarnuŭsia da kiraŭnika Śledčaha kamiteta RF Alaksandra Bastrykina z prośbaj razabracca z rastoŭskim vajenna-śledčym upraŭleńniem, a mienavita sa staršym lejtenantam Kantemiravym, jaki padmanam vybivaŭ pakazańni ź Ziamcova.

«Ja nie spraviŭsia ź ciskam Kraŭčanki, Aŭramienki i Kantemirava», — skazaŭ «Vajavoda», spadziejučysia na spraviadlivaje pakarańnie hetych vajennasłužačych.

U svaim zvarocie «Vajavoda» adznačyŭ, što jaho kanał — heta adzinaje, što jon nažyŭ u žyćci, tamu prosić pieradać administravańnie Z-błohieru Kiryłu Fiodaravu. Taksama Ziamcoŭ pierad śmierciu padziakavaŭ kamandziru čačenskaha śpiecnaza «Achmat» Apci Ałaŭdzinavu.

«Žyć z hańbaj, z «dyskredytacyjaj» rasijskaj armii ja nie źbirajusia», — zajaviŭ błohier Alaksiej Ziamcoŭ u pieradśmiarotnym zvarocie.

Zrešty, u vyniku vyśvietliłasia, što jon nibyta žyvy. Maŭlaŭ, jaho vyratavali ŭ apošni momant blizkija.

• 10
• 0
• 24
• 10
• 1
• 1
• 0
• 0