Litoviec, jaki špijoniŭ na karyść režymu Łukašenki, padaŭ u sud na prezidenta Litvy, bo jaho nie abmianiali na biełaruskich palitviaźniaŭ
Adbyvajučy dzieviacihadovy termin za špijanaž na karyść aficyjnaha Minska, litoŭski juryst Mantas Danielus vyrašyŭ, što dziaržava abaviazanaja abmianiać jaho na svaich hramadzian. Atrymaŭšy admovu, jon acaniŭ ułasnyja maralnyja pakuty ŭ salidnuju sumu i pajšoŭ sudzicca z kiraŭnikom krainy.
Jak paviedamlaje litoŭskaje nacyjanalnaje vydańnie LRT, na nastupnym tydni Rehijanalny administracyjny sud pačnie razhlad biesprecedentnaj skarhi. Źniavoleny turmy «Pravianiškies-2» Mantas Danielus patrabuje spahnać z Kancylaryi prezidenta Litvy Hitanasa Naŭsiedy 100 tysiač jeŭra kampiensacyi maralnaj škody. Pryčynaj takoha abureńnia stali adkazy prezidenckaha aparata nakont inicyjavańnia abmienu ź Biełaruśsiu, jakija zdalisia asudžanamu špijonu niezdavalniajučymi.
Žadańnie Danielusa chutčej pakinuć litoŭskuju turmu całkam zrazumiełaje. Jašče ŭ mai minułaha, 2025 hoda jon źviarnuŭsia da Hitanasa Naŭsiedy z patrabavańniem nieadkładna inicyjavać jahony abmien na hramadzian Litvy, jakija ŭtrymlivajucca ŭ biełaruskich kałonijach. Svaju pazicyju jon arhumientavaŭ tym, što Kryminalny kodeks krainy praduhledžvaje rolu prezidenta ŭ padobnych pracedurach.
Adnak biurakratyčnaja mašyna demakratyčnaj dziaržavy pracuje pavodle strohich pracedur, a nie pa žadańni asudžanaha. U Kancylaryi prezidenta patłumačyli, što skarhu špijona nie pryznajuć, bo ź jahonych listoŭ navat nie vynikała, što jon prosić mienavita ab pamiłavańni, jakoje źjaŭlajecca bazavym jurydyčnym krokam dla luboha abmienu.
Sam ža Danielus skardzicca žurnalistam, što administracyja turmy admaŭlajecca vieści pieramovy z zamiežnymi pasolstvami praz adsutnaść paŭnamoctvaŭ, a jahony ŭłasny advakat baicca kantaktavać z dypłamatami z-za mahčymaha pieraśledu z boku Departamienta dziaržaŭnaj biaśpieki Litvy.
Danielus byŭ zvyčajnym infarmataram, jaki ź lidzienia 2022 hoda pa luty 2023 hoda absłuhoŭvaŭ intaresy biełaruskaj prapahandystki Ksienii Lebiedzievaj, ciesna źviazanaj sa śpiecsłužbami.
Karystajučysia davieram biełaruskaj dyjaspary ŭ Vilni, jon uciraŭsia ŭ šerahi apazicyjnych arhanizacyj, źbiraŭ źviestki pra ich finansavańnie, prajekty i asabistyja danyja aktyvistaŭ, čym stvaraŭ pramuju pahrozu dla ludziej, jakija ŭciakli ad teroru. Jahonaj samaj cyničnaj apieracyjaj stała sustreča z byłym dobraachvotnikam pałka imia Kastusia Kalinoŭskaha: Danielus pierakanaŭ bajca, što dziejničaje ŭ intaresach pasolstva ZŠA, tajemna zapisaŭ razmovu i adpraviŭ jaje ŭ Minsk. U mai 2025 hoda Apielacyjny sud Litvy pastaviŭ kropku ŭ jahonaj spravie, zaćvierdziŭšy prysud u vyhladzie dzieviaci hadoŭ pazbaŭleńnia voli.
-
Mužčyna rasstralaŭ vaśmiarych dziaciej u ZŠA
-
Iran admaŭlajecca ad sustrečy z amierykancami ŭ Isłamabadzie. Bajkot vydaje hłyboki raskoł u Tehieranie
-
«Spynić situacyju, kali ludzi znachodziacca na ŭtrymańni dziaržavy ad samaha pryjezdu». Irłandyja prapanuje ŭkraincam ščodryja vypłaty za viartańnie dadomu
Kamientary
Tak što siadzi svaje zakonnych 9 hadoú, letuva-vatnik!
Moža spadar Danielus źvierniecca z adpaviednym zapytam da Łukašenki? Tym bolš što ŭ adroźnieńni ad łukašystaŭ Litoŭskaja Respublika nie praktykuje dla viaźniaŭ režym incomunicado aka hvałtoŭnaje źniknieńnie.