Žurnalist-rasśledavalnik: «Paŭnočny patok» padarvała byłaja niu-madel z Kijeva
Rasśledavańnie padryvu hazapravodaŭ «Paŭnočny patok» u vieraśni 2022 hoda praciahvajecca dahetul. Niahledziačy na toje, što ŭłady Hiermanii padazrajuć u dyviersii hrupu ŭkraincaŭ i navat damahlisia ekstradycyi adnaho ź ich ź Italii, poŭnaja karcina zdareńnia zastajecca tajamnicaj. Novuju viersiju padziej prapanuje amierykanski žurnalist-rasśledavalnik Bojan Pančeŭski, jaki śćviardžaje, što asabista sustreŭsia z arhanizatarami i vykanaŭcami dyviersii.
Pra heta paviedamlaje vydańnie BILD.
Bojan Pančeŭski — uradženiec Makiedonii i šef-karespandent pa jeŭrapiejskaj palitycy vydańnia The Wall Street Journal. Heta žurnalist z šmathadovym vopytam i łaŭreat prestyžnych brytanskich i niamieckich premij, jaki daŭno aśviatlaje temy rasijskaj ahresii, špijanažu i jeŭrapiejskaj biaśpieki. U krasaviku 2026 hoda vyjšła jahonaja kniha «Padryŭ «Paŭnočnaha patoka». Praŭdzivaja historyja dyviersii, jakaja ŭzrušyła Jeŭropu», dzie raskryvajucca niečakanyja detali toj apieracyi.
Pavodle infarmacyi Pančeŭskaha, ataku spłanavała ŭkrainskaje elitnaje padraździaleńnie pad kiraŭnictvam dvuch vieteranaŭ śpiecsłužbaŭ, jakija razhladali pastaŭki rasijskaha hazu ŭ Hiermaniju jak hałoŭny instrumient upłyvu Maskvy. Dla nadzvyčaj ryzykoŭnaj misii im spatrebilisia vadałazy, adnak zamiest daśviedčanych ahientaŭ jany pryciahnuli cyvilnych asob. Siarod ich apynułasia navat eratyčnaja madel.
U padkaście šef-redaktara BILD Paŭla Roncchajmiera žurnalist raskazaŭ, što «samym śmiełym vadałazam va ŭsioj hrupie była žančyna». Pančeŭski nie nazyvaje jaje sapraŭdnaha imia, vykarystoŭvajučy psieŭdanim Freja. U maładości jana była častkaj načnoha žyćcia Kijeva.
«Časam jana padzarablała madellu i paziravała dla pravakacyjnych fatahrafij, — cytuje vydańnie słovy žurnalista. — Na adnym adkrytym zdymku, jaki staŭ vokładkaj eratyčnaha časopisa, na joj byŭ kapitanski płašč. Zahałovak abviaščaŭ: «Čamu krymskaje sonca abudžaje sieksualnyja pačućci?»».
Dziaŭčyna zachaplałasia dajvinham, i paśla pačatku poŭnamaštabnaj vajny jaje žyćcio kardynalna źmianiłasia.
«Jaje zdolnaść nyrać u mora na hłybiniu mienš za sto mietraŭ bolš nie była zapatrabavanaja, — śćviardžaje Pančeŭski. — Adnak zatym praz kaleh pa dajvinhu ź joj źviazałasia padraździaleńnie śpiecsłužbaŭ. Vyśvietliłasia, što jaje navyki ŭsio ž patrebnyja ŭzbrojenym siłam. Vysokapastaŭlenyja aficery spytali jaje, ci hatovaja jana ŭdzielničać u misii, nakiravanaj suprać krynic finansavańnia, z dapamohaj jakich Rasija viadzie vajnu suprać jaje krainy. Havorka išła pra składanuju i patencyjna śmiarotna niebiaśpiečnuju apieracyju. «Dzie padpisać?» — spytała Freja».
Pry ŭstanoŭcy ŭzryŭčatki pad vadoj žančyna adyhryvała klučavuju rolu. Niahledziačy na kiepskaje nadvorje, jana nieadnarazova apuskałasia na hłybiniu z vaśmidziesiaćciu kiłahramami ryštunku. Niamieckija śledčyja, jakija paźniej vyjšli na jaje śled, byli šakavanyja znachodkaj.
«Palicyja znajšła pra Freju praktyčna biaskoncuju kolkaść materyjałaŭ. Zatym jany natknulisia i na jaje aholenyja fatahrafii, niekatoryja ź ich byli vielmi adkrytymi. U supracoŭnikaŭ uźnikła pytańnie: «Ci moža heta być adna i taja ž žančyna? Abo heta iłžyvy śled?»» — piša amierykanski rasśledavalnik.
Siońnia ž byłaja madel navučaje inšych bajcoŭ taktyčnamu dajvinhu. Jak dadaje Pančeŭski, «jana pryniataja na słužbu i aficyjna ličycca vajskoŭkaj».
-
Novaja lidarka Vieniesueły pad kantrolem Biełaha doma praviała čystki va ŭładzie paśla źviaržeńnia Madura
-
«Čas pakłaści kaniec iranskaj mašynie zabojstvaŭ!». Tramp iznoŭ pryhraziŭ źniščyć jadziernyja abjekty Irana ŭ vypadku pravału pieramovaŭ u Pakistanie
-
Litoviec, jaki špijoniŭ na karyść režymu Łukašenki, padaŭ u sud na prezidenta Litvy, bo jaho nie abmianiali na biełaruskich palitviaźniaŭ
Kamientary
https://nashaniva.com/364732
Tam taksama było pra žančynu-dajviera, jakaja pradstaŭlałasia Darjaj, a ŭ hetym materyjale Freja. Z novaha tolki padrabiaznaści jaje žyćcia pierad apieracyjaj, jakija nie tyčacca apieracyi.
Samastojnaja hrupa Čarvinskaha, jakaja sama šukała sponsara, a Załužnaha prainfarmavała ŭ apošni momant, tut nazvana "ŭkrainskim elitnym padraździaleńniem", "padraździaleńniem śpiecsłužbaŭ".
Takaja žoŭcieńkaja stereatypnaja padača pra "elitu śpiecsłužbaŭ" pryncypova inakš padaje historyju, jakaja ŭ viersii "Špihiela" była pra samastojnuju inicyjatyvu ŭkrainskich patryjotaŭ.
Chto tut bolš maje racyju? Abo viersija padryvu ŭsio ž adna i taja ž, a Pančeŭski, abo Pančeŭski ŭ pierakazie ad BILD prosta inakš, ź inšymi akcentami raskazvaje jaje?
Ich achoúvali rabiaty z Masadu .