Niamieckija navukoŭcy: piva bahataje na vitamin B6, u tym liku i biezałkaholnaje
Novaje daśledavańnie, vyniki jakoha apublikavanyja ŭ reśpiektabielnym navukovym časopisie, pakazała, što čałaviek moža atrymlivać istotnuju kolkaść adnaho patrebnaha dla mozhu vitamina ź piva, piša Bi-bi-si.
Heta vitamin B6. Jon karysny dla mozhu, kryvi i imunnaj sistemy i źmiaščajecca ŭ mnohich vidach ježy.
Aŭtary daśledavańnia vyśvietlili, što kielich piva moža dać kala 15% toj kolkaści vitaminu B6, što patrebna čałavieku ŭ dzień, i krynicaj vitaminu moža być navat biezałkaholnaje piva.
Hety vitamin utrymlivajuć inhredyjenty piva — jačmień ci pšanica, a taksama piŭnyja droždžy — i jaho nie całkam zabivaje praces bradžeńnia.
Vitamin B6 možna atrymlivać z samych roznych praduktaŭ charčavańnia. Jaho dastatkova šmat u miasie i rybie, jon taksama źmiaščajecca ŭ aŭsianych šmatkach, bulbie i nucie.
Mocny niedachop vitaminu B6 u čałavieka sustrakajecca redka, adnak časam jaho ŭzrovień byvaje panižanym — časta adnačasova ź inšymi vitaminami hrupy B, naprykład vitaminam B12, niedachop jakoha moža pryvodzić da padvyšanaj stamlalnaści i młosnaści.
U jakich hatunkach piva vitaminu bolš
Vyvučyŭšy 65 roznych hatunkaŭ piva, kuplenych u supiermarkietach Hiermanii, aŭtary daśledavańnia vyśvietlili:
- Bolš za ŭsio B6 źmiaščaje mocnaje niamieckaje piva bok. Za im iduć zvyčajnyja łahiery, zatym — ciomnyja łahiery, zatym — pšaničnaje piva.
- Mienš za ŭsio B6 — u rysavym pivie.
- U biezałkaholnym pivie, ź jakoha paśla poŭnaj fiermientacyi vydalajuć etanoł, źmiaščajecca bolš vitaminu B6, čym u biezałkaholnym pivie, zvaranym z vykarystańniem droždžaŭ, jakija vypracoŭvajuć mienš etanołu.
- U siarednim kielich łahiera daje 20% rekamiendavanaj dzionnaj dozy B6.
- Adzin z pratestavanych hatunkaŭ biezałkaholnaha piva daŭ amal 59%.
Zhodna z rekamiendacyjami brytanskaj Nacyjanalnaj słužby achovy zdaroŭja, mužčynam u dzień treba kala 1,4 mh vitaminu B6, žančynam — kala 1,2 mh.
Litr piva, jak ustanavili aŭtary daśledavańnia, moža ŭtrymlivać ad 0,3 mh da 1 mh.
Jak kaža aŭtar daśledavańnia, prafiesar Mikael Rychlik, takoj kolkaści vitaminu niedastatkova dla taho, kab rehulatary dazvolili pivavaram pisać pra jaho na etykietkach, ale heta ŭsio ž davoli prykmietnaja kolkaść.
Prafiesar Rychlik padkreślivaje, što vyniki daśledavańnia mohuć prydacca tolki tym spažyŭcam, jakija «chočuć aptymizavać pryjom vitaminaŭ».
Tradycyjny niamiecki bok źmiaščaje bolš za ŭsio vitaminu B6, tamu što ŭ im bolš ałkaholu — ad 6,5%.
Najlepšaja krynica vitaminu B6 — charčavańnie
Brydžet Bieniełam z Brytanskaha fondu zdarovaha charčavańnia kaža, što niedachop vitaminu B6 u žycharoŭ Brytanii sustrakajecca redka, pakolki jon źmiaščajecca ŭ mnohich praduktach charčavańnia.
«My b nie stali rekamiendavać piva ci luby inšy ałkaholny napoj u jakaści hałoŭnaj krynicy pažyŭnych rečyvaŭ. Jany pavinny być u zvyčajnym racyjonie, — kaža jana. — Vielmi małavierahodna, kab u vas byŭ niedachop B6, chiba što kali ŭ vas vielmi abmiežavany racyjon».
Pa słovach Bieniełam, prablemy z hetym vitaminam mohuć uźnikać, naprykład, u ludziej z ałkahalizmam ci zachvorvańniami nyrak. U takich vypadkach jana rekamienduje źviarnuć uvahu i na inšyja važnyja vitaminy hrupy B — B12 i rybafłavin (B2), jakija zvyčajna źmiaščajucca ŭ małočnych praduktach i žyviolnaj ježy.
«Jany ŭdzielničajuć u mietabaliźmie i vyzvaleńni enierhii», — tłumačyć Bieniełam.
Viehanam jana raić atrymlivać hetyja vitaminy z uzbahačanych zamieńnikaŭ małaka i johurtaŭ.
Ci patrebnaja biełaruskaja mova tym, chto razmaŭlaje pa-rusku? Azaronak zadaŭsia takim pytańniem na STB, a vypusknik Akademii MUS prapanavaŭ zamianić uroki fakultatyvami4444
Kamientary