Statuetka «Oskara» Paŭła Tałankina zhubiłasia padčas pieralotu ź Ńju-Jorka ŭ Frankfurt
Padčas pieralotu ź Ńju-Jorka ŭ Frankfurt-na-Majnie zhubiłasia statuetka «Oskar», jakuju rasijski videohraf Pavieł Tałankin atrymaŭ za dakumientalny film «Spadar Nichto suprać Pucina», paviedamiŭ surežysior stužki Devid Barenštejn.
Pavodle jaho słoŭ, 29 krasavika Tałankin prybyŭ u aeraport imia Džona Kienedzi ŭ Ńju-Jorku i źbiraŭsia vylecieć u Jeŭropu, a statuetku «Oskara» chacieŭ pravieźci ŭ ručnoj pakłažy. U aeraporcie supracoŭnica transpartnaj biaśpieki nie dazvoliła jamu pranieści statuetku na bort samalota, paličyŭšy, što jana moža być vykarystana jak zbroja, piša «Nastojaŝieje vriemia».
Pakolki ŭ Tałankina nie było dadatkovaj sumki, kab zdać statuetku ŭ bahaž, jaje pakłali ŭ kardonnuju skrynku i adpravili rejsam avijakampanii Lufthansa, jakim jon lacieŭ. Adnak skrynka sa statuetkaj tak i nie prybyła ŭ Frankfurt.
«Ja šukaŭ, ale nie znajšoŭ nivodnaha inšaha vypadku, kali kahości prymušali zdavać statuetku «Oskar» u bahaž. Ci pastupili b tak z Paŭłam, kali b jon byŭ viadomym akcioram? Ci kali b svabodna razmaŭlaŭ pa-anhlijsku?» — adznačyŭ Barenštejn.
U svaim dopisie jon źviarnuŭsia da Lufthansa z prośbaj znajści statuetku. Praź niekalki hadzin avijakampanija adkazała ŭ kamientary da dopisu Barenštejna, što stavicca da takich vypadkaŭ vielmi surjozna i hatova dapamahčy znajści statuetku.
Ciapier čytajuć
Pamiatajecie Daniiła z Ofisa Cichanoŭskaj, jakomu za dva dni sabrali hrošy na ankałahičnuju apieracyju? Jamu napisaŭ toj samy adnakłaśnik, jaki jaho ŭdaryŭ — z čaho ŭsio i pačałosia4
Kamientary