Jašče dvuch palitviaźniaŭ asudzili za «złosnaje niepadparadkavańnie administracyi kałonii»
U Biełarusi praciahvajuć sudzić palitźniavolenych pavodle art. 411 Kryminalnaha kodeksa (złosnaje niepadparadkavańnie administracyi kałonii) za drobnyja abo sfabrykavanyja parušeńni. Tak, u Babrujsku pavodle hetaha artykuła niadaŭna asudzili 22‑hadovaha palitviaźnia Illu Vieramiejeva i 54‑hadovaha Siarhieja Kanavałava, piša «Viasna».
Siarhiej Kanavałaŭ da zatrymańnia pracavaŭ na Viciebskaj dystancyi sihnalizacyi i suviazi UP «Viciebskaje adździaleńnie Biełaruskaj čyhunki». Jaho zatrymali 6 sakavika 2022 hoda. Zhodna z danymi MUS, mužčyna nibyta płanavaŭ vyviadzieńnie sa stroju sistem, jakija harantujuć biaśpieku čyhunačnaha ruchu.
U vieraśni 2022 hoda Siarhieja asudzili pa kryminalnaj spravie ab «raspalvańni nacyjanalnaj i inšaj sacyjalnaj varožaści» (art. 130 KK) i ab «padrychtoŭcy da ździajśnieńnia akta teraryzmu» (č. 1 art. 13, č. 2 art. 289 KK). Jamu pryznačyli 15 hadoŭ kałonii va ŭmovach uzmocnienaha režymu, a taksama štraf u pamiery 300 bazavych vieličyniaŭ.
Vosieńniu 2024 hoda administracyja babrujskaj kałonii № 2 inicyjavała zaviadzieńnie spravy suprać Siarhieja pavodle č. 2 art. 411 KK (złosnaje niepadparadkavańnie administracyi kałonii). Tady sudździa Pavieł Karcinin pryznačyŭ jamu jašče dva hady kałonii ŭ dadatak da 15 hadoŭ.
Ciapier stała viadoma, što ŭ papraŭčaj kałonii № 14 u Navasadach suprać Siarhieja zaviali druhuju zapar kryminalnuju spravu pavodle art. 411 KK. 17 krasavika 2026 hoda nad im adbyŭsia sud. Vynik — čarhovyja dva hady pazbaŭleńnia voli. Ciapier ahulny termin palitviaźnia składaje 19 hadoŭ.
Pra novy sud nad palitviaźniem Illoj Vieramiejevym paviedamiła «Homielskaja Viasna». Jaki termin pryznačyli chłopcu — pakul nieviadoma.
24 lutaha 2022 hodu Illa Vieramiejeŭ z Homiela pačaŭ pierapisku ŭ Telegram ź siastroj Janaj kala piataj ranicy. Pryčyna — uvarvańnie rasijskich vojskaŭ va Ukrainu i abstreł horada Mikałajeŭ, u jakim žyła na toj momant jahonaja siastra. Illa vielmi chvalavaŭsia za jaje. Praz try dni chłopca zatrymali paśla jahonych zaklikaŭ u miascovym čacie akazvać supraciŭ i pačać dziejničać suprać vajny: na miescy zboru z hamielčukami jaho čakali siłaviki.
Illu asudzili da šaści z pałovaj hadoŭ kałonii. Paźniej KDB uklučyŭ chłopca ŭ «śpis asobaŭ, datyčnych da terarystyčnaj dziejnaści», a MUS — u «śpis ekstremistaŭ». Adbyvać termin jaho nakiravali ŭ babrujskuju kałoniju № 2.
Natalla Dulina publična adkazała na paklop z boku druhoj palitźniavolenaj, Haliny Dzierbyš
Vyjšła na svabodu palitźniavolenaja Volha Čukarava, jakaja ŭ źniavoleńni amal aślepła
Na dziaržTB pakazali schudniełaha manacha, jakoha pieradali Polščy razam z Pačobutam
«Pry znajomstvie pradstaŭlałasia: «Maryna». Hutarka z byłoj hałoŭnaj redaktarkaj Tut.by, palitźniavolenaj i švačkaj homielskaj kałonii
Kamientary