Spała 6 hadzin, pracavała, vučyłasia ŭ vychodnyja, na kursy zarabiła sama: cana 100 bałaŭ na CE dla školnicy ź Bierazina

Rychtavacca da CE Hanna pačała ŭžo pracujučy. U 16 hadoŭ — biez zhody baćkoŭ — jana ŭładkavałasia barystaj, potym barmenam. Usie zaniatki z repietytarami apłačvała samastojna.

Padličym razam:

• ruskaja mova — kala 2500 rubloŭ (zaniatki ź lipienia).
• hramadaznaŭstva — kala 2700 rubloŭ.
• historyja Biełarusi (kursy «Kiedr») — 554 rubli za 3 miesiacy.

Usiaho na padrychtoŭku — bolš za 5 tysiač rubloŭ. Hanna zarabiła hetyja hrošy sama.

— Kolki hadzin na dzień? Kali pracuju — nie zajmajusia naohuł. U vychodnyja — pa 3‑4 hadziny. Spała 6‑7 hadzin, časam 8, kali šancavała, — raskazvaje dziaŭčyna.

Klučavoj fihuraj u padrychtoŭcy Hanny stała Julija Hienadźjeŭna Sušynskaja, repietytarka. Jana raniej pracavała ŭ himnazii, a ciapier zajmajecca tolki pryvatnaj praktykaj. I padychod u jaje nie «natreniravać na testy», a navučyć razumieć materyjał.

— Kali pracuješ na razumieńni, a nie na słovach-markierach, to i z farmuloŭkami prablem niama, — tłumačyć Hanna.

Vidać, heta pracuje: pa hramadaznaŭstvie — 100 bałaŭ.

Na pytańnie pra toje, što adciahvaje sučasnych školnikaŭ, Hanna adkazvaje koratka:

— Ja ŭvohule čałaviek asacyjalny. Ni TikTok, ni doŭhich pasiadziełak u sacsietkach.

— Siabroŭ mała, hulać nie kličuć. Zamiest hetaha — praca, kanśpiekty i adna zvyšmeta.

U 2025 hodzie prachadny bał na fakultet fiłasofii i sacyjalnych kamunikacyj (dzie vučyłasia mama Hanny) składaŭ 382.

U Hanny pa sumie troch pradmietaŭ — 389—390 plus historyja na 99 bałaŭ (adna pamyłka).

Pieršy CE pa hramadaznaŭstvie prajšoŭ dla Hanny spakojna: jana vyciahnuła lubimy numar 14, sieła za piaty varyjant i «nikoha nie čapała».

A voś na ruskaj movie atmaśfiera była inšaj.

— Paśla taho jak na pieršym CE znajšli parušeńni, na druhim zachodziła kamisija, zdymali fajły, vytrasali kišeni. Atmaśfiera była vielmi napružanaja, — uspaminaje dziaŭčyna.

U samy adkazny momant adbyŭsia zboj: pieranosiačy adkazy ŭ błank, jana pierabłytała zadańni. Zakreśliła, vypraviła.

— Dumała: kampjutar nie pračytaje. Ale čałaviek, moža, zrazumieje.

Pavialičyć

Patelefanavała repietytaru z adnym pytańniem pra frazu «pavietra było nasyčana tajamnicaj» — heta dapaŭnieńnie ci častka vykaźnika? Supakoiłasia.

A potym pryjšła SMS.

— Siadzieła, abnaŭlała sajt RIKV z treciaj hadziny. Sajt «loh». U Telegram napisali: čakajcie SMS. Praz paŭhadziny pryjšła. Ja ŭzdychnuła z palohkaj.

Hanna pieraličvaje, čym zapłaciła za pośpiech.

— Nie malavała, nie čytała, ničoha sa starych zachapleńniaŭ nie rabiła. Tolki vučyłasia, pracavała i spała.

Navat zdaroŭje nie vytrymała: abvastryŭsia atapičny dermatyt. Paśla ekzamienaŭ daviałosia lehčy ŭ balnicu, kab lačyć ruki.

— Hanna, Bierazino dla ciabie niešta značyć?

— Viadoma. Tut prajšło majo dziacinstva. Ja lublu babulu, viedaju ŭsich jaje siabroŭ. Heta moj horad, i jon prynios mnie ŭdaču.

Hanna samastojna vyvučyła chimiju, fiziku i matematyku za paŭtara hoda. Ciapier płanuje pastupać na žurfak abo fakultet fiłasofii — tudy, dzie vyvučajuć infarmacyju i kamunikacyju. Jak mama.

• 1
• 0
• 0
• 1
• 0
• 0
• 0
• 0