Ukraina nanosić udary pa rasijskich centrach kaśmičnaj suviazi. Što heta daje?

Pra ŭdar pa centry kaśmičnaj suviazi rasijskaha Hienieralnaha štaba ŭ pasiołku Biełaomut Maskoŭskaj vobłaści stała viadoma 1 lipienia. Pra heta napisali ŭkrainskija manitorynhavyja kanały, jakija taksama raspaŭsiudzili kadry nastupstvaŭ udaraŭ, źniatyja na samim abjekcie.

Raniej, u noč na 26 červienia, jak śćviardžaje ŭkrainskaja presa, USU nanieśli ŭdar pa inšym centry kaśmičnaj suviazi — «Miaščeryna-1», raźmieščanym pablizu pasiołka Miniajeva ŭ Maskoŭskaj vobłaści. Pra hety ŭdar stała viadoma 1 lipienia z publikacyj va ŭkrainskaj presie.

U noč na 30 červienia ŭ Padmaskoŭi ŭkrainskija drony paŭtorna atakavali teleport u Dubnie. Pra ŭdar paviedamiŭ prezident Ukrainy Uładzimir Zialenski. Upieršyniu hety abjekt parazili ŭ noč na 22 červienia.

25 červienia ŭkrainskija bieśpiłotniki parazili Centr kaśmičnaj suviazi «Uładzimir» kala horada Huś-Chrustalny.

Dakładnych danych pra nastupstvy nalotaŭ niama. Infarmacyja pra paškodžańni na abjektach pastupała albo ad aficyjnych ukrainskich krynic, albo na padstavie vyvučeńnia spadarožnikavych zdymkaŭ.

Pavialičyć

Miž tym uviečary 1 lipienia telehram-kanał «VČK-OHPU» sa spasyłkaj na adnu krynicu napisaŭ, što paśla ŭdaraŭ BPŁA pa centrach kaśmičnaj suviazi ŭ Dubnie, Biełaomucie i Huś-Chrustalnym byli vyviedzienyja sa stroju niekatoryja kanały ŭradavaj suviazi, a taksama suviaź pamiž kampanientami Sistemy papiaredžańnia ab rakietnym napadzie, uklučajučy hałoŭny centr SPRN u «Sołniečnahorsku-7». Hetaja sistema adsočvaje puski mižkantynientalnych balistyčnych rakiet. Jana atrymlivaje danyja sa spadarožnikaŭ i naziemnych radyjołakacyjnych stancyj.

Pravieryć dastaviernaść infarmacyi pra paškodžańnie SPRN pa adkrytych krynicach niemahčyma. Rasijskija ŭłady nijak nie kamientavali ŭdary pa vajskovych abjektach u Biełaomucie i Miniajevie.

30 červienia hubiernatar Padmaskoŭja Andrej Varabjoŭ paviedamiŭ, što «ŭ Dubnie ŭ vyniku padzieńnia abłomkaŭ BPŁA paškodžany administracyjny budynak. Paciarpiełych niama». U samim FDUP «Kaśmičnaja suviaź» zajavili: «Funkcyjanavańnie televizijnaha viaščańnia i suviazi nie parušana. Prymajucca miery pa likvidacyi nastupstvaŭ. Piersanał CKS nie paciarpieŭ».

Što paškodžana

Dakładnych danych pra vyniki ŭdaraŭ USU pa centrach spadarožnikavaj suviazi niama. Ukrainski manitorynhavy kanał Exilenova+ apublikavaŭ fatahrafii, jakija, jak śćviardžajuć aŭtary, byli zroblenyja na abjekcie ŭ Biełaamucie paśla ŭdaru. Na ich, jak miarkujecca, bačnaja mocna paškodžanaja antena na dachu budynka, u jakim vybityja vokny. Na inšych zdymkach bačnyja niaznačnyja paškodžańni inšych voknaŭ i dźviarej.

Stupień škody, naniesienaj centru suviazi ŭ Miniajevie, taksama vyznačyć davoli ciažka — ukrainskija navinavyja vydańni paviedamlajuć, što, pavodle spadarožnikavych danych, dźvie pabudovy na terytoryi centra suviazi atrymali paškodžańni. Što heta za pabudovy, nie paviedamlajecca.

Pavialičyć

Rasijski pravajenny telehram-kanał «Vojennyj ośviedomitiel» praanalizavaŭ spadarožnikavyja zdymki centra «Uładzimir» u Huś-Chrustalnym paśla ŭdaru i acaniŭ paškodžańni jak «surjoznyja».

«Paškodžańni atrymali dva budynki, uklučajučy aparatna-prahramny i aparatna-techničny karpusy, a taksama hałoŭnaja 25‑mietrovaja antena kompleksu i inšaje abstalavańnie na jaho terytoryi», — havorycca ŭ publikacyi.

Hienštab USU zajaviŭ, što va «Uładzimiry» taksama ŭdałosia parazić centralnuju častku budynka kompleksu, dzie raźmieščanyja zały spadarožnikavych mademaŭ i multypleksaraŭ, a taksama centralny kamutacyjny vuzieł, da jakoha sychodziacca vałakonna-aptyčnyja linii suviazi ź inšymi kaśmičnymi centrami.

Akramia taho, jak śćviardžaje Hienštab, paškodžańnie atrymaŭ aparatna-techničny korpus №1, u jakim raźmieščanyja pieradajučy i prymajučy kompleksy, centralnaja kamutacyjnaja kabielnaja trasa antennych pastoŭ CKS i abstalavańnie dla achaładžeńnia pieradatčykaŭ i elektroniki hałoŭnaj anteny kompleksu.

Paškodžańnie aparatnych karpusoŭ patencyjna moža całkam vyvieści sa stroju ŭvieś kompleks suviazi — usio zaležyć ad taho, ci była paškodžanaja elektronika i jakaja mienavita. Paškodžańnie anteny taksama vypravić davoli ciažka.

Padčas pieršaha nalotu na kompleks u Dubnie, pavodle danych Hienštaba USU, udałosia trapić u aparatna-modulny kompleks 32‑mietrovaj anteny MARK-IV, a taksama ŭ techničny budynak pobač z hetaj antenaj.

Akramia taho, ukrainski Hienštab paviedamiŭ pra paražeńnie hałoŭnaha vytvorča-administracyjnaha (aparatna-prahramnaha) korpusa, što pryviało da častkovaha razbureńnia adnoj sa ścien. Hety korpus uklučaje ŭ siabie centralnuju aparatnuju liniju suviazi, abstalavańnie naziemnaha kompleksu kiravańnia i centralny pult kiravańnia spadarožnikavaj sietki.

Što heta za abjekty

 Centry kaśmičnaj suviazi, abo, jak ich jašče nazyvajuć, teleporty, — heta anteny, jakija pieradajuć sihnał na spadarožniki i prymajuć jaho ź ich. Takija teleporty patrebnyja dla vialikich patokaŭ danych i suviazi sa spadarožnikami na vysokaj arbicie.

Pavialičyć

Naprykład, na hieastacyjanarnaj, vyšynia jakoj 35 786 km. Na joj, u pryvatnaści, raźmiaščajucca spadarožniki suviazi, u tym liku i vajskovyja. Jany ruchajucca na takoj chutkaści adnosna Ziamli, kab uvieś čas znachodzicca nad peŭnym punktam na jaje pavierchni. Usie jany raźmiaščajucca nad ekvataram. Sihnał z takoha spadarožnika moža pieradavacca na vielmi vialikuju adlehłaść, a mahutnaść aparata takaja, što jon zdolny pieradavać vielizarnyja masivy danych.

Takich spadarožnikaŭ niašmat. Jany vykarystoŭvajucca dla ŭradavaj suviazi, pieradačy televizijnaha sihnału. Adzin spadarožnik moža vykonvać adrazu šmat funkcyj suviazi. Pry hetym sam spadarožnik, jak i antena, nie zajmajecca šyfravańniem sihnału — heta adbyvajecca ŭ naziemnych infarmacyjnych centrach.

Architektura takoj spadarožnikavaj hrupoŭki adroźnivajecca ad sietki, padobnaj da Starlink, dzie spadarožnikaŭ, naadvarot, vielmi šmat i jany raźmiaščajucca nizka nad Ziamloj. Dla suviazi sa spadarožnikami na nizkaj kalaziamnoj arbicie nie patrebnyja vialikija anteny i mahutnyja aparatnyja kompleksy — dastatkova nievialikaha terminała.

Druhaja funkcyja teleporta — kiravańnie spadarožnikami. Kab pastajanna znachodzicca na hieastacyjanarnaj arbicie, jany pavinny manieŭravać, karektujučy svajo stanovišča. Hetaja karekcyja vykonvajecca pry dapamozie bartavych ruchavikoŭ, a kirujuć joj ź Ziamli. Mahčyma, teleport taksama moža padtrymlivać suviaź sa spadarožnikami na inšych arbitach.

Sietkavaja struktura «Kaśmičnaj suviazi»

Centry suviazi ŭ Biełaomucie i Miniajevie naležać rasijskamu Ministerstvu abarony, jany, jak miarkujecca, źviazanyja ź inšymi spadarožnikami. Miarkujučy pa infarmacyi sajta «VČ-kontakt», zadača biełaomuckaha centra zaklučajecca ŭ tym, kab kantralavać spadarožniki na arbicie i zabiaśpiečvać pieradaču danych praź ich.

Ukrainskija telehram-kanały i navinavyja veb-sajty śćviardžajuć sa spasyłkaj na krynicy, što centr u Miniajevie źjaŭlajecca sakretnaj vajskovaj čaściu Hałoŭnaha raźviedvalnaha ŭpraŭleńnia Rasii. Pravieryć hetuju infarmacyju praz adkrytyja krynicy niemahčyma.

Akramia centraŭ kaśmičnaj suviazi ŭ Dubnie ci Husi-Chrustalnym u FDUP «Kaśmičnaja suviaź» taksama jość teleporty ŭ Maskoŭskaj vobłaści «Miadźviedžyja Aziory» i «Skołkava», a taksama «Žaleznahorsk» u Krasnajarskim krai i «Chabaraŭsk» na Dalokim Uschodzie. Akramia taho, infrastruktura pradpryjemstva ŭklučaje techničny centr u Maskvie na vulicy Šabałaŭka.

Infrastruktura «Kaśmičnaj suviazi» ŭładkavanaja pa pryncypie sietki. Najaŭnaść u joj niekalkich teleportaŭ pavyšaje ŭstojlivaść usioj sistemy i dazvalaje pieraraźmiarkoŭvać častku funkcyj pamiž niekalkimi placoŭkami ŭ vypadku prablem na adnoj ź ich. Ale pry hetym nahruzka na ich mocna ŭzraście.

Adnak z-za taho, što dakładnych danych pra atrymanyja paškodžańni niama, zrazumieć, nakolki mahła ŭzraści nahruzka na astatnija centry kaśmičnaj suviazi, niemahčyma.

U publikacyjach rasijskich kaśmičnych kanałaŭ amal niama infarmacyi pra nastupstvy nalotaŭ, a adzin ekśpiert u halinie kasmanaŭtyki, ź jakim pahavaryła Ruskaja słužba Bi-bi-si, adznačyŭ, što danych pra maštabnyja zboi ŭ pracy sistem spadarožnikavaj suviazi ŭ jaho niama.

Karespandent Ukrainskaj słužby Bi-bi-si Aleh Čarnyš uziaŭ intervju ŭ ekśpierta ŭ halinie kasmanaŭtyki, u minułym — supracoŭnika ŭkrainskaha Dziaržaŭnaha kaśmičnaha ahienctva Andreja Kaleśnika.

Pavodle słoŭ Kaleśnika, CKS «Dubna» śpiecyjalizujecca na dziaržaŭnaj suviazi, a «Uładzimir» — na kiravańni rasijskaj sistemaj spadarožnikavaj navihacyi HŁONASS. Klučavym, na jaho dumku, źjaŭlajecca paražeńnie mienavita spadarožnikavych anten, a nie telemietryčnaj aparatury. Ramont anten, a asabliva padjomnych i pavarotnych miechanizmaŭ da ich — heta «nietryvijalnaja zadača», skazaŭ śpiecyjalist.

U cełym, pa acenkach ekśpierta, ukrainskaja kampanija ŭdaraŭ pa centrach kaśmičnaj suviazi moža mieć pośpiech, kali budzie praciahłaj pa časie i nie daść Rasii mahčymaści adnaŭlać paškodžanyja abjekty.

• 8
• 0
• 0
• 0
• 0
• 0
• 0
• 0