Vikinh suprać anhłasaksa: Chołand i Kiejn vyvodziać Narviehiju i Anhliju na apošni boj
Chto najlepšy Erlinh Chołand ci Hary Kiejn? Daznajemsia siońnia nočču.
Siońnia apoŭnačy adny z najvydatniejšych forvardaŭ u sučasnaj historyi samaj papularnaj futbolnaj lihi śvietu — anhlijskaj Premjer-lihi — vyvieduć svaje zbornyja na vyrašalnuju bitvu za vychad u paŭfinał čempijanatu śvietu. Dva hihanty suśvietnaha futboła — narviežac Erlinh Chołand i anhličanin Hary Kiejn — syducca tvaram da tvaru i, mahčyma, narešcie pastaviać kropku ŭ sprečcy pra toje, chto ź ich najlepšy i čamu, piša Bi-bi-si.
Supraćstajańnie Kiejn — Chołand nie takoje jarkaje i vostraje, jak bolš viadomyja dueli Miesi — Ranałdu abo Jamal — Bielinhiem, pakolki jany praviali ŭ adnoj lizie ŭsiaho adzin siezon. Ale ich karjery ciesna pieraplalisia, i matč Anhlija — Narviehija stanie dla abodvuch redkaj mahčymaściu asabista vyśvietlić, chto macniejšy.
Hary Kiejn — lidar i tvar zbornaj Anhlii. Erlinh Chołand — taran i talisman zbornaj Narviehii. Abodva — nacyjanalnyja simvały. Na hetym padabienstva zakančvajecca i pačynajucca cikavyja adroźnieńni.
Kiejn — siamiejny, razvažlivy i strymany čałaviek. Chołand — svoj chłopiec, zdarovy i mahutny, vyhladaje krychu dzikavata, ale zaŭsiody šyroka ŭśmichajecca i ŭsim zadavoleny. Naprykancy lipienia Kiejnu spoŭnicca 33 hady, Chołandu — 26. U Chołanda — 60 miljonaŭ padpisčykaŭ u Instagram, u Kiejna — utraja mienš.
Chołand — idealny hieroj dla sacyjalnych sietak.
Pa-za polem jon pastajanna žartuje i dureje, stvarajučy samy papularny virusny kantent. A na poli jamu amal niama roŭnych: navat ludzi, dalokija ad futboła, dzielacca rolikami, u jakich Chołand vyhladaje sapraŭdnym vołatam.
Voś jon — uvasableńnie niastrymnaj siły: imčyć pa poli siamimilnymi krokami i lohka raskidvaje nazojlivych abaroncaŭ u štrafnoj. Voś jon — uvasableńnie niepachisnaj pieraškody: staić, jak skała, ad jakoj adzin za adnym kamična adlatajuć usie, chto sprabuje źbić jaho z noh abo chacia b zrušyć ź miesca.
Kiejn — poŭnaja supraćlehłaść. Jaho ład žyćcia bolš ścipły.
Jon žanaty sa svajoj školnaj kachanaj, vychoŭvaje čaćviarych dziaciej. Publična addaje pieravahu razmovam pra siamju, kamandu i dabračynnaść. Heta nadziejny i dyscyplinavany prafiesijanał, pavažany lidar.
Jaho hałoŭnaje zachapleńnie — holf. Nie samy ŭdały vobraz dla TikTok i Instagram.
Roźnica ŭ charaktary dvuch hihantaŭ anhlijskaha futboła dziŭnym čynam adlustroŭvaje i roźnicu ich šlachu da pośpiechu.
U Kiejna — doŭhi i pakutlivy šlach praź cierni da zorak. U Chołanda — jarki i imklivy praryŭ, sapraŭdny vołataŭski naskok.
Z Kiejnam asacyjujucca pakuty anhlijskich zaŭziataraŭ i nievynosna doŭhaje čakańnie momantu, kali Kubak śvietu narešcie «vierniecca dadomu», jak śpiavajuć fanaty mužčynskaj zbornaj Anhlii, čyj apošni i adziny tryumf na čempijanacie śvietu adbyŭsia 60 hadoŭ tamu — u 1966 hodzie. Navat čempijanat Jeŭropy mužčynskaja zbornaja nie moža vyjhrać, tady jak žanočaja ŭžo dvojčy zapar stała čempijonkaj Jeŭropy i dajšła da finału čempijanatu śvietu.
I asabista Kiejnu nie šancavała ŭsie 14 siezonaŭ u Anhlii. Jon byŭ lidaram i simvałam «Totenchema», ale kłub za hetyja hady tak ničoha i nie vyjhraŭ. Tolki pierajšoŭšy ŭ Hiermaniju ŭžo pryznanaj lehiendaj anhlijskaha futboła, Kiejn atrymaŭ partnioraŭ najvyšejšaha ŭzroŭniu ŭ składzie miunchienskaj «Bavaryi» i letaś narešcie pacałavaŭ svoj pieršy čempijonski kubak.
Na toj momant jamu było ŭžo amal 32 hady.
Z Chołandam ža asacyjujucca nie pakuty i parazy, a lohkaść i praryŭ. Narviehija nie vychodziła ŭ finalnuju stadyju Kubka śvietu z 1998 hoda, a Chołand zabiaśpiečyŭ joj nie tolki pajezdku ŭ Amieryku, ale i vychad z hrupy, a taksama pieramohu nad samoj Brazilijaj u matčach płej-of. U toj sustrečy jon zabiŭ abodva miačy, i ŭpieršyniu ŭ historyi Narviehija vyjšła ŭ čverćfinał suśvietnaha pieršynstva.
U asabistaj karjery Chołanda ŭsio taksama značna viesialej, čym u Kiejna. Trafiei jon źbiraje z 18 hadoŭ, a ŭžo da 22 hadoŭ atrymaŭ usio toje, pra što Kiejn tolki maryŭ: staŭ čempijonam Anhlii i pieramožcam Lihi čempijonaŭ.
Chołand na paŭhałavy vyšejšy za Kiejna — nie tolki rostam, ale i vynikovaściu, u tym liku i na hetym čempijanacie. U Amierycy narviežski vikinh pravioŭ čatyry matčy i zabiŭ siem hałoŭ. U anhličanina matčaŭ bolš — piać, ale hałoŭ mienš — šeść, pryčym dva ź pienalci.
Styl hulni ŭ ich padobny, ale razam z tym rozny. Abodva — mahutnyja centralnyja forvardy, zdolnyja pracisnuć abaronu ŭ štrafnoj.
Ale Chołand macniejšy fizična i bolš efiektyŭny: jamu dastatkova adnaho dotyku, kab adpravić miač u sietku.
Na hetym čempijanacie jon zabivaŭ u siarednim raz na 50 chvilin, Kiejn — raz na 75 chvilin.
Kiejn sastupaje jamu ŭ fizičnaj mocy i realizacyi momantaŭ, adnak jon starejšy i bolš vopytny, a jaho futbolnaje ampłua šyrejšaje — jon moža nie tolki zaviaršać ataki, ale i arhanizoŭvać hulniu, adychodzić z pazicyi centralnaha napadnika na rolu atakujučaha paŭabaroncy.
Heta paćviardžaje i statystyka hetaha turniru: akramia šaści hałoŭ, u Kiejna jość jašče i halavaja pieradača, tady jak u Chołanda asistaŭ niama.
Mienavita tamu Kiejn — nie tolki hałoŭnaja zorka, ale i kapitan zbornaj Anhlii, a Chołand — tolki hałoŭnaja zorka zbornaj Narviehii, u toj čas jak kapitanskaja paviazka naležyć 27‑hadovamu lidaru łondanskaha «Arsienała» Marcinu Edehoru.
Chto lepšy: Kiejn ci Chołand?
Pamiž imi bolš ahulnaha, čym moža zdacca.
Chołand naradziŭsia ŭ anhlijskim Lidsie, dzie hulaŭ u futboł jaho baćka. Kali b jon nie vybraŭ vystupać za Narviehiju, to całkam moh by ciapier być na miescy Kiejna ŭ roli hałoŭnaha forvarda zbornaj Anhlii.
A Kiejn moh apynucca na miescy Chołanda ŭ «Mančester Sici», kali b jaho tranśfier z «Totenchema» ŭ 2021 hodzie nie sarvaŭsia ŭ apošni momant. «Sici» prapanoŭvaŭ za Kiejna 100 miljonaŭ funtaŭ, ale «Totenchem» patrabavaŭ nie mienš za 150 miljonaŭ.
Samy paśpiachovy trenier Premjer-lihi apošniaha dziesiacihodździa Piep Hvardyjoła adkłaŭ pošuk zamieny Sierchia Ahuera jašče na hod, a ŭžo letam 2022 hoda kupiŭ u dortmundskaj «Barusii» napadnika, jaki byŭ utraja tańniejšy, maładziejšy, bolš zadorny i bolš efiektyŭny — Erlinha Chołanda.
U vyniku łondanski kłub Kiejna ŭ siezonie 2022/23 zaniaŭ tolki vośmaje miesca ŭ Premjer-lizie i vylecieŭ z usich kubkavych turniraŭ.
Sam Hary Kiejn choć i zabiŭ 30 hałoŭ — kolkaść, jakoj zvyčajna chapaje dla zvańnia lepšaha bambardzira siezona, — usio ž sastupiŭ hety tytuł Erlinhu Chołandu, bo toj zabiŭ rekordnyja dla Premjer-lihi 36 hałoŭ u svaim debiutnym siezonie i dapamoh «Mančester Sici» aformić histaryčny trabł — pieramahčy ŭ čempijanacie Anhlii, Kubku Anhlii i Lizie čempijonaŭ.
A Hary Kiejn uvohule pakinuŭ Anhliju i pierajechaŭ u Hiermaniju.
Ciapier užo Chołand kaštuje ŭtraja daražej za Kiejna. Pavodle apošniaj acenki Transfermarkt, 25‑hadovy narviežac dzielić pieršaje miesca ŭ śpisie samych darahich futbalistaŭ śvietu razam z 18‑hadovym ispancam Łaminam Jamalem. Ich tranśfierny košt aceńvajecca na 200 miljonaŭ jeŭra, tady jak košt Kiejna značna ściplejšy — 60 miljonaŭ jeŭra.
Kamientary
Ja za Kiejna!