Papularny aksesuar staŭ pryčynaj avaryjnaj pasadki šviejcarskaha samalota
Pasažyraŭ avijakampanij zaklikajuć bolš uvažliva stavicca da pieravozki elektronnych pryład ź lityjevymi batarejami. Takija akumulatary mohuć stać pryčynaj niebiaśpiečnych situacyj padčas palotu, piša brytanskaje vydańnie The Sun.
Niadaŭna samalot avijakampanii Swiss International Air Lines, jaki lacieŭ ź Ciurycha ŭ ńju-jorkski aeraport imia Džona Kienedzi, byŭ vymušany ździejśnić niezapłanavanuju pasadku ŭ horadzie Banhor u amierykanskim štacie Men. Pryčynaj stała zadymleńnie ŭ sałonie.
Jak vyśvietliłasia, dym źjaviŭsia z-za paškodžanaha futlara dla biespravadnych navušnikaŭ. Jon upaŭ pamiž kresłami, zachras tam i pierahreŭsia. Ekipaž pryniaŭ rašeńnie terminova pasadzić samalot.
Upraŭleńnie cyvilnaj avijacyi Vialikabrytanii (CAA) adznačaje, što kolkaść zdareńniaŭ, źviazanych ź lityjevymi batarejami, u apošni čas raście. Takija akumulatary vykarystoŭvajucca nie tolki ŭ navušnikach, ale i ŭ paŭerbankach, smartfonach, noŭtbukach i inšych papularnych hadžetach.
Śpiecyjalisty nahadvajuć, što ŭsie pryłady ź lityjevymi batarejami treba pieravozić tolki ŭ ručnoj pakłažy, a nie ŭ bahažnym adździaleńni samalota.
Da takich pryład adnosiacca:
- paŭerbanki;
- elektronnyja cyharety i viejpy;
- Bluetooth-kałonki;
- partatyŭnyja vientylatary;
- fitnes-branzalety i smart-hadzińniki;
- ličbavyja fotaaparaty;
- biespravadnyja navušniki i ich zaradnyja futlary;
- płanšety;
- elektronnyja knihi;
- noŭtbuki.
Kali padčas palotu lubaja z hetych pryład pačynaje pierahravacca, dymić abo vyłučać niezvyčajny pach, pasažyram rekamiendujuć nieadkładna paviedamić pra heta bortpravadnikam.
U CAA papiaredžvajuć, što niapravilnaja pieravozka takich pryład moža pryvieści da zatrymki abo navat admieny rejsaŭ. Naprykład, u mai samalot brytanskaj nizkabiudžetnaj avijakampanii easyJet, jaki nakiroŭvaŭsia ŭ łondanski aeraport Łutan, byŭ vymušany sieści ŭ Rymie paśla taho, jak pasažyr paviedamiŭ, što jahonaja partatyŭnaja zaradnaja pryłada znachodzicca ŭ bahažnym adsieku.
Pavodle danych brytanskaha rehulatara, mnohija padarožniki ŭsio jašče nie viedajuć pra praviły pieravozki lityjevych batarej. Kala 36% pasažyraŭ nie razumiejuć niebiaśpieki znachodžańnia takich akumulataraŭ u zarehistravanym bahažy. Pry hetym 92% ludziej biaruć u padarožža smartfony, 55% — noŭtbuki, a 49% — paŭerbanki.
Śpiecyjalisty adznačajuć, što ŭ siarednim kožny tydzień fiksujecca kala dvuch incydentaŭ, źviazanych ź lityjevymi batarejami.
Biełaruska ŭładkavałasia ŭ kandytarskuju kramu. Ale vyśvietliłasia, što za naviedvańnie tualeta joj treba płacić1
Kamientary