Prymityŭny multfilm pra ciala niečakana staŭ chitom u Kitai

86‑chvilinny multfilm Niu Lai vyjšaŭ u prakat kinateatraŭ Kitaja ŭ pačatku žniŭnia. Jaho stvaralniki — maci i syn z paŭnočnakitajskaha horada Dalań. Hałoŭnym hierojem stužki źjaŭlajecca maładoje ciala, jakoje pieraadolvaje vyprabavańni i ŭrešcie stanovicca advažnym voinam, hatovym brać na siabie adkaznaść i nie bajacca śmierci, raskazvaje Financial Times.

Vizualna Niu Lai rezka adroźnivajecca ad sučasnaj studyjnaj animacyi: u im vielmi prostaja animacyja, prymityŭnyja hukavyja efiekty, a dziejańnie supravadžaje niemudrahielistaja fartepijannaja muzyka. Mienavita hetaja amal amatarskaja jakaść u vyniku i stała hałoŭnaj admietnaściu multfilma.

Spačatku, adnak, ništo nie pradkazvała jamu pośpiechu. Za pieršy tydzień prakatu Niu Lai zarabiŭ mienš za tysiaču dalaraŭ, i, zdavałasia, na hetym jaho historyja pavinna była skončycca.

Ale zdaryłasia naadvarot.

Karystalniki sacsietak pačali abmiarkoŭvać niezvyčajna nizkuju jakaść multfilma — pieravažna ź ironijaj. Heta tolki padahreła cikaŭnaść: ludzi pajšli ŭ kinateatry, kab na svaje vočy pabačyć, ci sapraŭdy ŭsio nastolki kiepska.

U vyniku zbory Niu Lai vyraśli da 29 miljonaŭ juaniaŭ — kala 4,3 miljona dalaraŭ. Pavodle kitajskaj biletnaj płatformy Maoyan, multfilm navat traplaŭ u štodzionnuju dziasiatku samych kasavych filmaŭ krainy — uśled za takimi halivudskimi błokbastarami, jak «Adysieja» i «Čałaviek-pavuk: Novy dzień».

«Jon dobry mienavita tamu, što drenny»

Financial Times paraŭnoŭvaje fienomien Niu Lai z amierykanskim filmam The Room («Pakoj») 2003 hoda. Krytyki jaho razhramili, ale z časam karcina atrymała kultavy status: hledačy pačali atrymlivać zadavalnieńnie mienavita ad jaje niaŭdałych dyjałohaŭ, akciorskaj hulni i režysury.

Niešta padobnaje ciapier adbyvajecca i z kitajskim multfilmam, techničnaja niedaskanałaść jakoha asabliva vyłučajecca na fonie sučasnaj animacyi z darahoj kampjutarnaj hrafikaj i imklivaha raźvićcia štučnaha intelektu. Toje, što pry inšych abstavinach vyhladała b prosta niedachopam, častka hledačoŭ uspryniała jak viartańnie da čahości prostaha i niepasrednaha.

Hledačy, padobna, usprymajuć techničnyja niedachopy jak častku zabavy. Padčas sieansu ŭ Šanchai, na jakim pabyvaŭ karespandent FT, u zale raz-poraz śmiajalisia.

Adnak fienomien Niu Lai, vidać, nie zvodzicca tolki da žartaŭ z kiepskaj animacyi. Za iraničnaj papularnaściu multfilma možna ŭbačyć i bolš šyrokuju źjavu.

Dacent kiniematohrafa Hankonhskaha baptysckaha ŭniviersiteta Kieni Nh (Kenny Ng) ličyć, što ŭ papularnaści Niu Lai jość elemient pratestu suprać sučasnaha kinamejnstrymu. Pavodle jaho, fienomien multfilma prymušaje jaho studentaŭ zadumacca pra ciapierašni stan kiniematohrafa.

Jość i jašče adzin matyŭ — padtrymka ajčynnaha kino.

«Nam, kitajcam, varta jaho padtrymać. Navat kali jon sapraŭdy drenny — dyk što? Nakolki drennym jon uvohule moža być?» — cytuje vydańnie słovy supracoŭnika adnaho z kinateatraŭ u Šanchai.

Pavialičyć

Multfilm tym časam pačaŭ žyć ułasnym žyćciom u internecie. Vakoł jaho źjaviłasia mnostva žartaŭ i miemaŭ, a karystalniki stali pierarablać asobnyja sceny z dapamohaj štučnaha intelektu. Tak, virusnym staŭ stvorany ŠI remiejk adnaho z klučavych epizodaŭ, u jakim hałoŭny hieroj pieraskokvaje praz raku.

Viadomaść Niu Lai užo vyjšła za miežy krainy. U kitajskich sacsietkach, naprykład, anansavali jaho pakaz u Łos-Andželesie.

• 0
• 0
• 3
• 1
• 0
• 0
• 0
• 0