Biełarusy pačali atrymlivać poštaj dziŭnyja relihijnyja haziety
Masava raskładvać ich pa paštovych skryniach pačali ŭ staličnym mikrarajonie Uschod. Hazieta nazyvajecca «Žyvoje słova» i pryjechała ažno z Rasii, piša Blizko.by.
U joj vosiem staronak farmatu A3, i ŭsie materyjały tak ci inakš źviazanyja z relihijaj i vieraj, a taksama bahata nasyčanyja cytatami ź Biblii. Navat u paradach, jak vieści zdarovy ład žyćcia letam, razam z rekamiendacyjami bolš ruchacca, pić vadu i admovicca ad škodnych zvyčak aŭtary zaklikajuć malicca, bo «Boh hatovy dapamahčy imunitetu ŭ baraćbie ź virusami i bakteryjami».
Vychodnych źviestak u haziety praktyčna niama. Nie paznačana, chto źjaŭlajecca jaje zasnavalnikam, chto vydaje hazietu, chto hałoŭny redaktar, dzie znachodzicca redakcyja, jaki nakład i dzie jana nadrukavanaja. Dla suviazi paznačanyja tolki numar telefona i abanienckija paštovyja skryni ŭ Maskvie i Krasnadary.
Tut ža jość adras sajta, jaki viadzie na staronku «Chryścijanskaj carkvy advientystaŭ siomaha dnia refarmacyjnaha ruchu». Na samim sajcie taksama paznačanyja tolki numary telefonaŭ. Napisana, što nabaženstvy prachodziać kožnuju subotu ŭ Maskvie, Sankt-Pieciarburhu, Jekaciarynburhu i Krasnadary, ale nijakich adrasoŭ nie ŭkazana. Vidać, kab pryjści na słužbu, spačatku treba daviedacca jaje adras, patelefanavaŭšy pa paznačanych numarach.
Na staroncy Hałoŭnaha ŭpraŭleńnia ideałahičnaj raboty i pa spravach moładzi Minharvykankama jość zvodny pieralik zarehistravanych relihijnych arhanizacyj na terytoryi Minska. Tam pieraličanyja 6 relihijnych supolnaściaŭ Carkvy chryścijan advientystaŭ siomaha dnia. Na sajcie Upaŭnavažanaha pa spravach relihij i nacyjanalnaściaŭ adznačana, što ŭsiaho ŭ Biełarusi naličvajecca 73 chryścijanskija supolnaści advientystaŭ siomaha dnia.
Pra jakuju-niebudź suviaź biełaruskich supolnaściaŭ z rasijskimi supolnaściami, jakaja vydaje hazietu, ničoha nie viadoma.
Ciapier čytajuć
Paśla biełaruskaj vioski Šnajderaŭ bolš nie biantežyć pytańnie ŁHBT. Siamja z Hiermanii, jakaja stała hierojami prapahandy, viartajecca ŭ ES27
Kamientary