«Biełpoł» apublikavaŭ rasśledavańnie pra biełaruskich špijonaŭ pad dypprykryćciom u Azii, Afrycy i Amierycy. Chto jany? Poŭny śpis

Jak praviła, supracoŭniki śpiecsłužbaŭ pad dypłamatyčnym prykryćciom zajmajuć pasady siaredniaha źviana. Adnak rasśledavańnie pakazvaje, što ahienty HRU (vajskovaj raźviedki) zdolnyja padymacca na samy vierch dypłamatyčnaj ijerarchii.

Pasolstva Biełarusi ŭ Šviejcaryi

Nadzvyčajny i Paŭnamocny Pasoł Alaksandr Darmidontavič Hanievič, 1963 hoda naradžeńnia. Uradženiec horada Lida Hrodzienskaj vobłaści. Skončyŭ Usuryjskaje vyšejšaje vajskovaje aŭtamabilnaje kamandnaje vučylišča ŭ Rasii (1984), a taksama Dypłamatyčnuju akademiju MZS Rasii i dypłamatyčnuju škołu MZS Hiermanii.

Pavodle aficyjnaj bijahrafii, u MZS Biełarusi jon pryjšoŭ u 1993 hodzie, adnak aŭtary rasśledavańnia źviartajuć uvahu na dzieviacihadovy prabieł u jahonaj pracoŭnaj dziejnaści paśla zakančeńnia vajskovaha vučylišča (dzie rychtavali taksama raźviedčykaŭ i radystaŭ).

Alaksandr Hanievič źjaŭlajecca vajskovym piensijanieram i zarehistravany ŭ Minsku pa vulicy Rahačoŭskaj u domie, dzie žyvuć pieravažna siemji vajskoŭcaŭ. Rasśledavalniki vyśvietlili, što ŭ 1994 hodzie daviedku ab jaho hramadzianstvie vydavała ŭpraŭleńnie kadraŭ Ministerstva abarony, chacia ŭ hety pieryjad jon užo nibyta pracavaŭ u słužbie pratakoła MZS. Pavodle źviestak ź infarmacyjnych baz, u 2002 i 2008 hadach jon aficyjna ličyŭsia vajskoŭcam vajskovaj čaści 64170 (Upraŭleńnie zamiežnaj infarmacyi i kamunikacyi HRU Hienštaba). Taksama znojdziena adznaka ab jaho rehistracyi pry vajskovaj čaści 51886 (raźviedcentr HRU ŭ Minsku).

Aŭtary rasśledavańnia prychodziać da vysnovy, što Alaksandr Hanievič na praciahu mnohich hadoŭ źjaŭlajecca hłyboka zakanśpiravanym supracoŭnikam HRU, imavierna, u zvańni pałkoŭnika. Pad dypłamatyčnym prykryćciom u Šviejcaryi jon pracavaŭ jašče raniej na pasadzie daradcy, a z 2020 hoda ŭznačalvaje pasolstva.

Japonija

Jašče adnym fihurantam rasśledavańnia, čyja bijahrafija vyklikała pytańni ŭ ekśpiertaŭ Belpol, staŭ Rusłan Alehavič Jesin, 1969 hoda naradžeńnia. Z 2017 pa 2022 hady jon zajmaŭ pasadu Nadzvyčajnaha i Paŭnamocnaha Pasła Biełarusi ŭ Japonii, a taksama ŭ Aŭstralii i Novaj Ziełandyi pa sumiaščalnictvie.

Zhodna z aficyjnymi danymi, Rusłan Jesin naradziŭsia ŭ Pietrapaŭłaŭsku-Kamčackim (Rasija). U 1990 hodzie mužčyna skončyŭ Minskaje vyšejšaje vajskova-palityčnaje ahulnavajskovaje vučylišča, u 1993‑m — BDEU.

Dalejšaja jaho karjera vyhladaje nietypova dla vypusknika vajskovaj VNU: paśla karotkaha pieryjadu pracy ŭ kamsamole, užo ŭ kancy 1991 hoda, jon stanovicca supracoŭnikam adździeła mižnarodnych kulturnych suviaziaŭ Ministerstva kultury Biełarusi. U 1994—1996 hadach Jesin vučyŭsia ŭ Dypłamatyčnaj akademii MZS Rasii, paśla čaho zajmaŭ roznyja pasady ŭ biełaruskim zamiežnapalityčnym viedamstvie, u tym liku ŭznačalvaŭ prafsajuznuju arhanizacyju MZS. Rusłan Jesin taksama maje stupień doktara palityčnych navuk.

Aŭtary rasśledavańnia źviartajuć uvahu na niestykoŭki ŭ bijahrafii Jesina. Pa-pieršaje, u saviecki čas vypusknik vajskovaha vučylišča byŭ abaviazany prachodzić słužbu ŭ armii, adnak prafiesijny vajskoviec Rusłan Jesin amal adrazu apynuŭsia ŭ Ministerstvie kultury.

Važnym arhumientam rasśledavalniki ličać fotazdymak z elektronnaj bazy DAI MUS Biełarusi. Na paśviedčańnie kiroŭcy, jakoje vydavałasia ŭ siaredzinie 1990-ch, Rusłan Jesin sfatahrafavany ŭ formie kapitana Uzbrojenych sił. Aŭtary adznačajuć, što našeńnie vajskovaj formy zabaroniena asobam, jakija zvolnienyja z armii biez prava na piensiju. Najaŭnaść zvańnia kapitana ŭ toj pieryjad, kali Jesin aficyjna ličyŭsia supracoŭnikam Ministerstva kultury ci MZS, z vysokaj dolaj imaviernaści moža śviedčyć ab praciahu siłavoj słužby. 

Jašče adzin momant, na jaki źviartajuć uvahu rasśledavalniki: u 2022 hodzie Rusłan Alehavič Jesin iznoŭ ustupiŭ u Kamunistyčnuju partyju i zaniaŭ tam kiraŭničuju pasadu. Aŭtary miarkujuć, što heta mahło adbycca tolki paśla jaho zvalnieńnia z vajskovaj słužby, bo dziejnym vajskoŭcam u Biełarusi zabaroniena być u składzie palityčnych arhanizacyj.

Z ulikam hetaj infarmacyi aŭtary rasśledavańnia miarkujuć, što Rusłan Alehavič Jesin źjaŭlajecca supracoŭnikam HRU (vajskovaj raźviedki). Nie vyklučana, što na momant, kali jon uznačalvaŭ prafsajuznuju arhanizacyju MZS, jon užo mieŭ zvańnie padpałkoŭnika ci pałkoŭnika. 

Pasolstva Biełarusi ŭ Abjadnanych Arabskich Emiratach

Daradca pa pytańniach biaśpieki i administracyjna-pravavych pytańniach Leanid Alaksandravič Hołub, 1986 hoda naradžeńnia. Uradženiec horada Bresta, zarehistravany ŭ Minsku pa vulicy Adojeŭskaha. U realnaści źjaŭlajecca supracoŭnikam KDB. Pačynaŭ słužbu ŭ śpiecpadraździaleńni «Alfa» (Hrupa «A»), zatym byŭ pieraviedzieny va ŭpraŭleńnie zamiežnaj raźviedki. Pad dypłamatyčnym prykryćciom z 2020 hoda. U 2011 hodzie atrymaŭ pašpart prykryćcia na danyja Leanid Alaksandravič Jemiljanaŭ (Jemiljanov), 1986 hoda naradžeńnia. Na hetyja ž danyja jamu było aformlena fiktyŭnaje paśviedčańnie kiroŭcy. U tym ža hodzie pavodle hetaha pašparta vyjazdžaŭ na śpiecyjalnaje zadańnie va Ukrainu.

Vajskovy ataše Dzianis Leanardavič Stasievič, 1980 hoda naradžeńnia. Uradženiec Leninhradskaj vobłaści Rasii, zarehistravany ŭ Minsku pa vulicy Rafijeva. Pieršapačatkova słužyŭ u radyjotechničnaj raźviedcy, zatym pierajšoŭ u HRU. Prajšoŭ padrychtoŭku na vajskova-dypłamatyčnym fakultecie Vajskovaj akademii Biełarusi. Maje zvańnie pałkoŭnika. Pad dypłamatyčnym prykryćciom z 2018 hoda, raniej znachodziŭsia sa špijonskaj misijaj u Siryi. Jahonaja žonka (mahčyma, byłaja) Dzijana Dźmitryjeŭna Čumačova taksama źjaŭlajecca aficeram HRU i słužyć tam bolš za 10 hadoŭ.

Hienieralnaje konsulstva Biełarusi ŭ Dubai

Konsuł Siarhiej Viktaravič Alaksiejeŭ, 1981 hoda naradžeńnia. Uradženiec Śviardłoŭskaj vobłaści Rasii, zarehistravany ŭ Minsku pa vulicy Arłoŭskaja. Siarhiej Alaksiejeŭ na praciahu niekalkich hadoŭ byŭ kadravym vajskoŭcam, a z 2013 hoda raptoŭna staŭ dypłamatam. Rasśledavalniki miarkujuć, što nasamreč jon źjaŭlajecca supracoŭnikam adnoj ź biełaruskich śpiecsłužbaŭ.

Pasolstva Biełarusi ŭ Vjetnamie

Ataše pa pytańniach abarony Vadzim Jaŭhienavič Rajčonak, 1977 hoda naradžeńnia. Uradženiec horada Lida Hrodzienskaj vobłaści, zarehistravany ŭ Breście pa vulicy Hvardziejskaja. Były vykładčyk avijacyjnaha kaledža, zatym słužyŭ na vajskovaj avijabazie ŭ Lidzie. Paźniej byŭ pieraviedzieny ŭ HRU, dzie prachodziŭ słužbu ŭ Bresckim raźviedvalnym centry. Pad dypłamatyčnym prykryćciom pracuje adnosna niadaŭna.

Druhi sakratar pasolstva Alaksandr Ivanavič Mažara, 1983 hoda naradžeńnia. Uradženiec horada Lida, zarehistravany ŭ Minsku pa vulicy Fohiela. Farmalna kuryruje konsulskija pytańni, kulturu, adukacyju i pratakolnyja mierapryjemstvy, ale źjaŭlajecca kadravym vajskoŭcam. Pa infarmacyi Belpol, Mažara słužyŭ u Vajskovaj akademii, bolš za 10 hadoŭ tamu byŭ pieraviedzieny ŭ Minski raźviedvalny centr HRU. Pad dypłamatyčnym prykryćciom z 2020 hoda. U 2015 hodzie atrymaŭ pašpart prykryćcia na imia Alaksandr Ivanavič Husakoŭ, 1983 hoda naradžeńnia. Na hetyja ž danyja byli aformlenyja falšyvaje paśviedčańnie kiroŭcy i numar mabilnaj suviazi.

Staršy daradca Aleh Alaksiejevič Hołubieŭ, 1982 hoda naradžeńnia. Uradženiec Minska. Raniej pracavaŭ u pasolstvie ŭ Polščy, dzie ŭ 2020 hodzie ŭvachodziŭ u skład vybarčaj kamisii. U biełaruskich infarmacyjnych bazach adsutničajuć źviestki pra jaho pracoŭnuju karjeru. Jahony baćka — piensijanier KDB, a rodnaja siastra słužyć va ŭpraŭleńni vajskovaj kontrraźviedki KDB. Na hetaj padstavie aŭtary rasśledavańnia miarkujuć, što Aleh Hołubieŭ taksama słužyć u KDB.

Pasolstva Biełarusi ŭ Izraili

Daradca pa administracyjna-pravavych pytańniach Arciom Valerjevič Pierzanaŭ, 1979 hoda naradžeńnia. Uradženiec Bresta, zarehistravany tam ža pa vulicy Pryharadnaja. Bolš za 20 hadoŭ źjaŭlajecca supracoŭnikam KDB. Słužbu prachodziŭ va ŭpraŭleńni KDB pa Bresckaj vobłaści, paśla 2020 hoda byŭ pieraviedzieny va ŭpraŭleńnie zamiežnaj raźviedki Centralnaha aparatu KDB. Pad dypłamatyčnym prykryćciom znachodzicca kala troch hadoŭ.

Pasolstva Biełarusi ŭ Indaniezii

Pieršy sakratar pasolstva Dźmitryj Andrejevič Masłaŭ, 1985 hoda naradžeńnia. Uradženiec Mazyrskaha rajona Homielskaj vobłaści. Adkazvaje za vajskova-techničnaje i ekanamičnaje supracoŭnictva. U realnaści źjaŭlajecca supracoŭnikam KDB. Pad dypłamatyčnym prykryćciom pracuje z 2020 hoda, raniej znachodziŭsia sa špijonskaj misijaj u Łatvii.

Pasolstva Biełarusi ŭ Indyi

Daradca pa pytańniach biaśpieki i administracyjna-pravavych pytańniach Jaŭhien Mikałajevič Mironaŭ, 1977 hoda naradžeńnia. Uradženiec Viciebska, zarehistravany tam ža pa praśpiekcie Frunze. Supracoŭnik KDB, pad dypłamatyčnym prykryćciom znachodzicca z 2020 hoda. Špijonić u Indyi kala šaści hadoŭ. Pavodle źviestak Belpol, u 2015 hodzie jon atrymaŭ pašpart prykryćcia na danyja Jaŭhien Mikałajevič Maksimaŭ, 1982 hoda naradžeńnia. Na hetyja ž danyja było zarehistravana siem numaroŭ mabilnaj suviazi. Rodny brat Jaŭhiena Mironava — Uładzimir Mikałajevič Mironaŭ, 1986 hoda naradžeńnia, taksama źjaŭlajecca supracoŭnikam KDB i słužyć u centralnym aparacie ŭ Minsku.

Pieršy sakratar pasolstva Alaksandr Hienadźjevič Žytko (Žitko), 1988 hoda naradžeńnia. Uradženiec Minska, zarehistravany ŭ vioscy Kopišča Minskaha rajona. Kuryruje handlova-ekanamičnyja i inviestycyjnyja pytańni. Źjaŭlajecca supracoŭnikam KDB, pad dypłamatyčnym prykryćciom u Indyi znachodzicca kala troch hadoŭ.

Pasolstva Biełarusi ŭ Respublicy Kareja

Nadzvyčajny i Paŭnamocny Pasoł Andrej Michajłavič Čarniecki, 1968 hoda naradžeńnia. Uradženiec Minska, zarehistravany pa vulicy Hierojaŭ 120‑j dyvizii. Da pryznačeńnia pasłom z 1997 pa 2021 hady słužyŭ u KDB, pałkoŭnik zapasu, uznačalvaŭ upraŭleńnie ŭ centralnym aparacie. Rasśledavalniki vyśvietlili, što pieršy dypłamatyčny pašpart Andreju Čarnieckamu vydali jašče ŭ 2015 hodzie. Usiaho za čas słužby jon mieŭ try dypłamatyčnyja pašparty, pa jakich vyjazdžaŭ u Francyju, Iran, Aŭstryju, Polšču, Hiermaniju i inšyja krainy. Aŭtary rasśledavańnia miarkujuć, što jon praciahvaje pracavać na KDB i siońnia.

Pasolstva Biełarusi ŭ Kitai

Daradca pa pytańniach biaśpieki i administracyjna-pravavych pytańniach Alaksandr Vasiljevič Lebjadziancaŭ (Lebiedianciev), 1976 hoda naradžeńnia. Uradženiec Mahilova, zarehistravany pa vulicy Jakuboŭskaha. Prachodziŭ słužbu va ŭpraŭleńni KDB pa Mahiloŭskaj vobłaści, zatym — va ŭpraŭleńni zamiežnaj raźviedki centralnaha aparatu KDB. Pad dypłamatyčnym prykryćciom špijonić z 2010 hoda. Da pryznačeńnia ŭ Kitaj śpiecyjalizavaŭsia na krainach Jeŭropy.

Vajskovy ataše Alaksandr Ivanavič Škirenka (Škirienko), 1968 hoda naradžeńnia. Kadravy vajskoviec, hienierał-major zapasu. Raniej zajmaŭ pasadu namieśnika načalnika Hienieralnaha štaba Uzbrojenych sił Biełarusi. Pavodle źviestak Belpol, jon nie źjaŭlajecca supracoŭnikam HRU, adnak akazvaje sadziejničańnie śpiecsłužbam.

Pobač ź im pracuje pamočnik vajskovaha ataše Pavieł Kanstancinavič Charkoŭ (Choŕkov), 1983 hoda naradžeńnia. Uradženiec horada Mirny Archanhielskaj vobłaści (Rasija), zarehistravany ŭ Minsku pa Achockim zavułku. Kadravy vajskoviec, pačynaŭ u aŭtamabilnych vojskach, zatym pierajšoŭ u HRU. Pad dypłamatyčnym prykryćciom u Kitai znachodzicca kala troch hadoŭ. U 2017 hodzie atrymaŭ pašpart prykryćcia na imia Pavieł Kanstancinavič Jarcaŭ, 1983 hoda naradžeńnia.

Ataše pasolstva Viktar Valancinavič Obuchaŭ (Obuchov), 1987 hoda naradžeńnia. Uradženiec Prymorskaha kraja Rasii, zarehistravany ŭ vioscy Kopišča Minskaha rajona. U realnaści — aficer-šyfravalščyk. Słužyŭ va ŭpraŭleńni KDB pa Minsku i Minskaj vobłaści. Pad dypłamatyčnym prykryćciom kala troch hadoŭ. Jaho rodny brat Siarhiej Valancinavič Obuchaŭ, 1990 hoda naradžeńnia, taksama źjaŭlajecca vajskoŭcam KDB.

Pasolstva Biełarusi ŭ Pakistanie

Druhi sakratar pasolstva Maksim Alehavič Kjerdzialevič (Kierdielevič), 1983 hoda naradžeńnia. Uradženiec horada Usuryjsk (Rasija), pryjechaŭ u Biełaruś u 1993 hodzie. Da 2005 hoda nasiŭ proźvišča Miaškoŭ. U pašpartnych bazach u jakaści jaho baćki ŭ roznyja hady byli paznačanyja dva roznyja čałavieki. Kadravy vajskoviec, bolš za 10 hadoŭ słužyŭ u HRU, pad dypłamatyčnym prykryćciom znachodzicca apošnija niekalki hadoŭ. U 2016 hodzie atrymaŭ pašpart prykryćcia na imia Maksim Alehavič Šaškoŭ, 1984 hoda naradžeńnia. Na hetyja ž danyja jamu aformili fiktyŭnaje paśviedčańnie kiroŭcy i try numary mabilnaj suviazi.

Treci sakratar pasolstva Dzianis Michajłavič Siniuta, 1988 hoda naradžeńnia. Uradženiec Dobrušskaha rajona Homielskaj vobłaści. Skončyŭ vajskova-transpartny fakultet Biełaruskaha dziaržaŭnaha ŭniviersiteta transpartu ŭ Homieli, dzie paźniej pracavaŭ načalnikam kursa. Pavodle źviestak Belpol, sa słužby ŭ HRU jon pierajšoŭ pad dypłamatyčnaje prykryćcio zusim niadaŭna. U 2019 hodzie atrymaŭ pašpart prykryćcia na danyja Dzianis Michajłavič Siarhiejka, 1987 hoda naradžeńnia. Na hetaje ž imia jamu było aformlena falšyvaje paśviedčańnie kiroŭcy.

Pasolstva Biełarusi ŭ Siryi

Daradca pa pytańniach biaśpieki i administracyjna-pravavych pytańniach Andrej Mikałajevič Bakunovič, 1973 hoda naradžeńnia. Uradženiec Mahilova, zarehistravany ŭ Minsku pa vulicy Niomanskaja. Słužyŭ va ŭpraŭleńni KDB pa Mahiloŭskaj vobłaści, u 2007 hodzie byŭ pieraviedzieny ŭ centralny aparat. Špijonskaj dziejnaściu za miažoj zajmajecca kala 15 hadoŭ, śpiecyjalizujecca na arabskim śviecie. Pad dypłamatyčnym prykryćciom z 2013 hoda. Pavodle źviestak Belpol, u jaho abaviazki ŭvachodzić padtrymańnie aficyjnych kantaktaŭ ź miascovymi orhanami biaśpieki.

Daradca pa handlova-ekanamičnych pytańniach Anatol Jurjevič Buhrenka, 1979 hoda naradžeńnia. U realnaści — vopytny supracoŭnik HRU (słužyć bolš za 15 hadoŭ). Naradziŭsia ŭ Polščy ŭ siamji vajskoŭca, zarehistravany ŭ Minsku pa vulicy Fohiela. Špijanažam pad dypłamatyčnym prykryćciom zajmajecca z 2015 hoda, raniej śpiecyjalizavaŭsia na krainach Jeŭrasajuza. U 2009 hodzie atrymaŭ pašpart prykryćcia na danyja Anatol Jurjevič Kanančuk (Konončuk), 1979 hoda naradžeńnia. Pavodle hetaha pašparta ŭ 2010—2011 hadach niekalki razoŭ vyjazdžaŭ u Litvu i Łatviju. Na hetaje ž imia jamu aformleny dva falšyvyja paśviedčańni kiroŭcy.

Pasolstva Biełarusi ŭ Turcyi

Daradca pa pytańniach biaśpieki i administracyjna-pravavych pytańniach Ivan Uładzimiravič Sirajeŭ (Siriajev), 1976 hoda naradžeńnia. Uradženiec Amurskaj vobłaści Rasii, zarehistravany ŭ Minsku pa vulicy Paŭliny Miadziołki. Słužyŭ va ŭpraŭleńni KDB pa Hrodzienskaj vobłaści, zatym — va ŭpraŭleńni zamiežnaj raźviedki centralnaha aparatu KDB. Pad dypłamatyčnym prykryćciom z 2012 hoda. Spačatku śpiecyjalizavaŭsia na Jeŭropie, z 2019 hoda znachodzicca ŭ Turcyi. U 2010 hodzie atrymaŭ pašpart prykryćcia na imia Jan Mikałajevič Jaraš (Jaroš), 1977 hoda naradžeńnia.

Pieršy sakratar pasolstva Siarhiej Jaŭhieńjevič Šynkievič, 1987 hoda naradžeńnia. Uradženiec Hrodna, zarehistravany ŭ Ratamcy pad Minskam. Słužyŭ va ŭpraŭleńni KDB pa Hrodzienskaj vobłaści, zatym u zamiežnaj raźviedcy. Pad dypłamatyčnym prykryćciom z 2021 hoda, misija ŭ Turcyi — jaho pieršaja zamiežnaja kamandziroŭka. U 2015 hodzie atrymaŭ pašpart prykryćcia na danyja Alaksiej Siarhiejevič Šaroŭ, 1986 hoda naradžeńnia.

Ataše pa pytańniach abarony Viktar Stanisłavavič Bielančuk, 1978 hoda naradžeńnia. Naradziŭsia ŭ Łatvii ŭ siamji vajskoŭca, zarehistravany ŭ Minsku pa vulicy Skrypnikava. Bolš za 15 hadoŭ źjaŭlajecca aficeram HRU. Słužyŭ u Hrodzienskim raźviedcentry, zatym u Minsku. Pad dypłamatyčnym prykryćciom z 2019 hoda. U 2009 hodzie atrymaŭ pašpart prykryćcia na danyja Viktar Stanisłavavič Bielski, 1978 hoda naradžeńnia.

Daradca pa infarmacyjna-analityčnych i handlova-ekanamičnych pytańniach Ilja Michajłavič Kapitan, 1986 hoda naradžeńnia. Uradženiec Bresta, skončyŭ Linhvistyčny ŭniviersitet. Prachodziŭ słužbu jak aficer u Pamiežnym kamitecie, a ŭ 2015 hodzie staŭ dypłamatam. Pracavaŭ u pasolstvie ŭ Francyi, zatym byŭ ukaraniony ŭ dyrekcyju Jeŭrapiejskich hulniaŭ u Minsku. Aŭtary rasśledavańnia miarkujuć, što Ilja Kapitan źjaŭlajecca kadravym supracoŭnikam adnoj sa śpiecsłužbaŭ.

Hienieralnaje konsulstva Biełarusi ŭ Stambule

Konsuł Ihar Alaksandravič Sałaŭjoŭ. Uradženiec Vałahodskaj vobłaści Rasii, žyŭ u Oršy. Skončyŭ sielskahaspadarčuju akademiju pa ekanamičnym profili. Słužyŭ va ŭpraŭleńni KDB pa Viciebskaj vobłaści (u Navapołackim adździele i abłasnym centry). Špijonam pad dypłamatyčnym prykryćciom staŭ zusim niadaŭna.

Pasolstva Biełarusi ŭ Jehipcie

Pieršy sakratar pasolstva Kirył Valerjevič Čupruhin, 1993 hoda naradžeńnia. Uradženiec haradskoha pasiołka Karma Homielskaj vobłaści, zarehistravany ŭ Homieli pa vulicy Mazurava. Farmalna kuryruje pytańni handlu, kultury i biaśpieki, a taksama pradstaŭlaje intaresy Biełarusi ŭ Ałžyry, Amanie i Sudanie. Skončyŭ Homielski inžynierny instytut MNS. Paśla karotkaj słužby ŭ MNS pierajšoŭ u KDB. Pad dypłamatyčnym prykryćciom znachodzicca kala troch hadoŭ.

Pasolstva Biełarusi ŭ Zimbabve

Nadzvyčajny i Paŭnamocny Pasoł (zajmaŭ pasadu da sakavika 2024 hoda) Ihar Anatoljevič Maršałaŭ (Maršałov), 1972 hoda naradžeńnia. Formalna jon nie źjaŭlajecca supracoŭnikam śpiecsłužbaŭ, ale, pavodle źviestak rasśledavalnikaŭ, daŭno i ciesna ź imi źviazany. Były načalnik Departamienta finansavych rasśledavańniaŭ KDK, hienierał-major finansavaj milicyi z 30‑hadovym stažam słužby. Aŭtary rasśledavańnia miarkujuć, što ŭ Zimbabve jon moh zajmacca supravadžeńniem nieaficyjnych ekanamičnych intaresaŭ atačeńnia Łukašenki.

Daradca pa pytańniach biaśpieki, palityčnych i ekanamičnych pytańniach Dźmitryj Stanisłavavič Sakun, 1981 hoda naradžeńnia. Uradženiec Minska, zarehistravany pa vulicy Školnaja. Skončyŭ BDU, byŭ vajskoŭcam Pamiežnaha kamiteta. Z 2013 hoda pierajšoŭ na dypłamatyčnuju pracu. Rasśledavalniki źviartajuć uvahu na zakrytaść źviestak pra jaho miescy słužby i nie vyklučajuć jaho pramoj suviazi sa śpiecsłužbami.

Pasolstva Biełarusi ŭ Brazilii

Daradca pa pytańniach biaśpieki i administracyjna-pravavych pytańniach Siarhiej Alaksandravič Papkovič, 1980 hoda naradžeńnia. Uradženiec Barysava, zarehistravany ŭ Minsku pa vulicy Makajonka. Supracoŭnik centralnaha aparata KDB, pad dypłamatyčnym prykryćciom znachodzicca z 2017 hoda.

Treci sakratar pasolstva Kanstancin Jurjevič Snjehaŭski (Śniehovskoj), 1997 hoda naradžeńnia. Uradženiec Viciebska. Skončyŭ MDIMA (MHIMO) u Maskvie i adrazu pačaŭ dypłamatyčnuju karjeru. Rasśledavalniki adznačajuć jaho hłybokija siamiejnyja suviazi z KDB: jaho baćka Juryj Anatoljevič Snjehaŭski značycca ŭ bazach i jak supracoŭnik MZS, i jak supracoŭnik KDB; dziadźka Hienadź Anatoljevič Snjehaŭski — pałkoŭnik KDB, były načalnik Babrujskaha adździeła i namieśnik načalnika ŭpraŭleńniaŭ pa Homielskaj i Mahiloŭskaj abłaściach. Na hetaj padstavie Belpol miarkuje, što małady dypłamat taksama dziejničaje ŭ intaresach Kamiteta dziaržaŭnaj biaśpieki.

Pasolstva Biełarusi ŭ Vieniesuele (Karakas)

Daradca pasolstva pa handlova-ekanamičnych pytańniach, inviestycyjnym i humanitarnym supracoŭnictvie (u niadaŭnim minułym) Dzianis Vitaljevič Łahunoŭ, 1982 hoda naradžeńnia. Uradženiec horada Viciebska, zarehistravany ŭ Minsku pa vulicy Fohiela. Kadravy vajskoviec, pieršapačatkova słužyŭ u 120‑j miechanizavanaj bryhadzie va Uruččy, zatym pieravioŭsia ŭ HRU. Pad dypłamatyčnym prykryćciom z 2020 hoda. U 2014 hodzie atrymaŭ pašpart prykryćcia na danyja Dzianis Uładzimiravič Janoŭski, 1982 hoda naradžeńnia. U łacinskaj tranślitaracyi jaho imia značyłasia jak Janowski Dionizy (pa-polsku), na hetyja ž danyja było aformlena fiktyŭnaje paśviedčańnie kiroŭcy. U 2015 hodzie pa hetym falšyvym pašparcie vyjazdžaŭ u Polšču.

• 0
• 1
• 2
• 4
• 0
• 0
• 4
• 0