Pakul USU nanosiać udary pa NPZ, Rasija atakuje ŭkrainskija AZS. Jakija nastupstvy hetych atak?
«Chutka zapraŭlajciesia i jedźcie», — papiaredžvaje vadzicielaŭ mer Charkava, druhoha pa vieličyni horada Ukrainy.
U paniadziełak dźvie aŭtazapravačnyja stancyi ŭ Charkavie padvierhlisia atakam rasijskich biaśpiłotnikaŭ. Pavodle danych uład horada, dva čałavieki atrymali ranieńni. U vyniku jašče adnaho napadu na aŭtazapravačnuju stancyju ŭ Kryvym Rohu na minułym tydni zahinuli try čałavieki.
Rasijskija vajskoŭcy pačali nanosić udary pa cyvilnych aŭtazapravačnych stancyjach z dapamohaj bieśpiłotnikaŭ i rakiet u krasaviku. Asnoŭnaja častka ŭdaraŭ prypadaje na AZS pablizu linii frontu, adnak kolkaść hetych atak niaŭchilna raście.
Za hety čas Rasija pieražyła dźvie chvali surjoznaha niedachopu paliva, jakija zakranuli amal usie rehijony krainy. Deficyt bienzinu ŭźnik praz udary ŭkrainskich bieśpiłotnikaŭ pa rasijskich naftapierapracoŭčych zavodach.
Ahułam Rasija naniesła ŭdary jak minimum pa 246 aŭtazapravačnych stancyjach pa ŭsioj Ukrainie, kaža Alaksandr Sirenka, analityk ukrainskaj kansałtynhavaj kampanii «NaftaRynak».
Centr infarmacyjnaj ustojlivaści, niekamiercyjnaja hrupa, jakaja zajmajecca rasśledavańniami na asnovie adkrytych krynic, paćvierdziła 114 rasijskich udaraŭ pa aŭtazapravačnych stancyjach tolki ŭ lipieni, tady jak u červieni, pavodle danych centra, rasijskija vajskoŭcy nanieśli 66 udaraŭ pa AZS va Ukrainie.
Palicyja, uličvajučy pahrozu, vypuściła śpiecyjalnyja instrukcyi, jakija zaklikajuć aŭtamabilistaŭ pry spracoŭvańni pavietranaj tryvohi pakidać zapraŭki, pry nieabchodnaści — pakidać svaje aŭtamabili.
«Vy možacie pačynić svaju mašynu, ale svajo žyćcio vy nie vierniecie», — papiaredžvajuć u palicyi Dnieprapiatroŭskaj vobłaści.
Škoda ad takich atak vielizarnaja, ale hałoŭnaje, što jany ŭjaŭlajuć značnuju ryzyku dla mirnych žycharoŭ.
Pavodle słoŭ Sirenki, pieršapačatkova ataki ažyćciaŭlalisia z dapamohaj nievialikich bieśpiłotnikaŭ z dystancyjnym kiravańniem, ale potym Rasija pačała vykarystoŭvać bolšuju, daražejšuju iranskuju techniku typu «šachied», jakaja nanosić značna bolšuju škodu.
Košt adnaho bieśpiłotnika «šachied» — ad 20 tys. da 50 tys. dołaraŭ.
«Adna aŭtazapravačnaja stancyja vytrymała piać traplańniaŭ bieśpiłotnikaŭ «šachied», — raspaviadaje Alaksandr Sirenka. — Hetyja bieśpiłotniki «šachied» kaštujuć daražej, čym sama aŭtazapravačnaja stancyja».
Na šerahu važnych tras, naprykład, na darozie, jakaja złučaje dva bujnyja harady — Charkaŭ i Dniepr, nie zastałosia pracujučych aŭtazapravačnych stancyj.
Usie AZS byli źniščany vakoł pasiołka Apišnia, jaki znachodzicca ŭ Pałtaŭskaj vobłaści.
«Vy bačycie stratehiju našaha voraha. Jany chočuć pazbavić nas paliva», — kaža starasta pasiołka Mikałaj Raźnik. U videaroliku ŭ fejsbuku jon raspaviadaje, što miascovyja ŭłady pačali zapasacca palivam: jany raźlivajuć bienzin u nievialikija jomistaści i zachoŭvajuć ich u roznych miescach.
U Mikałajevie na poŭdni Ukrainy miascovaja žycharka, vadziciel Kaciaryna Stakola kaža, što na AZS ciapier dziejničajuć bolš strohija praviły — jany nie musiać pracavać padčas pavietranaj tryvohi.
«Ciapier usie heta ŭličvajuć, i heta nie prablema. Biaśpieka vyšej za ŭsio. Kali vy nie možacie zapravicca ciapier, vy zapraviciesia paźniej. Nijakich čerhaŭ i paničnych zakupak», — skazała jana.
Stakola ličyć, što meta takich atak — «teraryzavać hramadstva, kab prymusić urad kapitulavać abo pryniać umovy, nievyhodnyja Ukrainie».
U padkantrolnych Ukrainie rajonach častkova akupavanaj Chiersonskaj vobłaści spyniła pracu amal pałova AZS. Astatnija padviarhajucca atakam rasijskich dronaŭ «amal kožny dzień», kaža namieśnik kiraŭnika abładministracyi Alaksandr Tałakońnikaŭ.
Paviedamlajecca, što ŭsie zapravačnyja stancyi byli razburany ŭ horadzie Traścianiec (Sumskaja vobłaść), nasielnictva jakoha składaje amal 20 000 čałaviek.
Miascovyja ŭłady pryniali rašeńnie raźlivać paliva z aŭtacysternaŭ, jakija pastajanna źmianiajuć svajo miescaznachodžańnie, kab minimizavać vierahodnaść ataki.
Ukraincy, padobna, prysłuchoŭvajucca da parad uład.
Alaksandr Mielničuk, kiraŭnik adździeła stratehičnaha markietynhu sietki AZS «BRSM-Nafta» kaža, što aŭtamabilisty bolš nie zachodziać u kramy pry AZS.
«Jany napaŭniajuć bak i starajucca źjechać jak maha chutčej», — raspaviadaje Alaksandr Mielničuk.
Jaho kampanija straciła vosiem zapravačnych stancyj u vyniku rasijskich atak, jašče dźvie paciarpiełyja AZS adnaŭlajuć paśla ŭdaraŭ.
Dziela abarony klijentaŭ «BRSM-Nafta» buduje bietonnyja ŭkryćci na svaich aŭtazapravačnych stancyjach, a taksama nakryvaje ich sietkami ad dronaŭ. Akramia taho, kampanija skaraciła pracoŭny čas i pamienšyła kolkaść piersanału, prysutnaha na niekatorych abjektach.
Adnak pakul udary bieśpiłotnikaŭ nie akazali istotnaha ŭpłyvu na pastaŭki paliva. Pavodle spravazdačy Nacyjanalnaha banka Ukrainy, 4% aŭtazapravačnych stancyj krainy byli paškodžany abo razburany, ale heta nie akazała istotnaha ŭpłyvu na rynak.
«Pavieličeńnie prodažaŭ u rehijonach, raźmieščanych dalej ad linii frontu abo hranicy z Rasijaj, kampiensavała straty prodažaŭ na razburanych stancyjach», — havorycca ŭ spravazdačy.
U Rasii paśla atak Ukrainy pa rasijskich naftapierapracoŭčych zavodach i inšaj infrastruktury situacyja zusim inšaja.
U vyniku atak Rasija sutyknułasia ź niedachopam paliva, jakoje nazirajecca amal va ŭsich rehijonach.
Łajalnaja rasijskim uładam hazieta «Iźviestija» paviedamiła na minułym tydni, što bienzin dastupny tolki na 28% rasijskich aŭtazapravačnych stancyj.
U adroźnieńnie ad Rasii, Ukraina nie zaležyć ad bujnych naftapierapracoŭčych zavodaŭ i paliŭnych składoŭ, bo impartuje paliva, jakoje dastaŭlajecca z dapamohaj aŭtacysternaŭ.
Va Ukrainie taksama šmat AZS roznych sietak, tamu kali adna abo niekalki ź ich stanoviacca cellu ataki ŭ kankretnym rajonie, to ŭ vadzicielaŭ jość alternatyŭnyja varyjanty, kaža Alaksandr Sirenka.
«Ty łaješsia i jedzieš dalej, na inšuju zapraŭku. Dobra, ty prajedzieš na 10 km bolš, čym płanavaŭ, ale heta nie takaja ŭžo vialikaja prablema», — kaža jon.
Pavodle jaho słoŭ, vajna pamiž ZŠA i Iranam akazvaje bolšy ŭpłyŭ na ceny na paliva va Ukrainie, čym rasijskija ŭdary pa AZS. Akramia taho, zvyčajna najbolš važnyja častki AZS — naprykład, padziemnyja reziervuary ź bienzinam i dyzielnym palivam — zastajucca niepaškodžanymi paśla rasijskich atak.
Ciapier čytajuć
U siamji Mironcavych za palityku ŭžo asudzili maci i troch siaścior. A ciapier aryštavali i muža adnoj ź siaścior3
Kamientary