Na vostravie ŭ Bałtyjskim mory znajšli list ad biełarusa z 1970-ch. Chto hety čałaviek?
Adpraŭnikom akazaŭsia ŭradženiec Babrujska.
Na vostravie Nasypnym u Kalininhradskim zalivie adpačyvalniki znajšli staruju butelku z pasłańniem ažno z 1970‑ch hadoŭ. Adpraŭnikam akazaŭsia biełarus, uradženiec Babrujska, piša Onliner.by.
Fatahrafijami butelki i lista padzialilisia čytačy navinavaha kanała «Minsk. Hałoŭnaje!».
Arkuš papiery z časam častkova namok, ale asnoŭny tekst možna pračytać. Aŭtar pa imieni Vasil Płatonaŭ pradstaŭlajecca siaržantam terminovaj słužby. Małady čałaviek pieradaje pryvitańnie naščadkam, narakaje na armiejskija budni i razvažaje pra toje, što navat nie moža ŭjavić, «jakim budzie siaržant u 2000 hodzie, jakim budzie jaho ŭnutrany śviet».
U kancy Vasil prosić adkazać jamu, «kali jon budzie žyvy», i pakidaje svoj chatni adras.
Žyły dom z hetymi danymi sapraŭdy dahetul isnuje ŭ Babrujsku.
Znachodka ŭskałychnuła sacyjalnyja sietki: mienš čym za sutki halina abmierkavańnia, u jakoj usie čakali novych viestak ad Vasila praz paŭstahodździa, nabrała amal 300 tysiač prahladaŭ. U joj paśpieli adznačycca i susiedzi pa domie, i dzieci znajomych pa leciščy babrujčanina, adnak nichto nie paviedamlaŭ padrabiaznaściaŭ pra los mužčyny.
Jak udałosia vyśvietlić žurnalistu Onliner, toj samy Vasil Płatonaŭ — baćka viadomaha biełaruskaha hulca ŭ nastolny tenis Paŭła Płatonava.
Žurnalisty źviazalisia sa spartsmienam, i jon paćvierdziŭ, što viedaje pra historyju z baćkavaj «kapsułaj času». Mužčyna sapraŭdy pakinuŭ list u butelcy padčas słužby ŭ Bałtyjskim fłocie SSSR u 1977 hodzie.
Paśla demabilizacyi jon viarnuŭsia ŭ rodny Babrujsk, dzie i žyvie dahetul. Na žal, uhavaryć Vasila Piatroviča asabista pahutaryć i raskazać pra abstaviny adpraŭki svajho pasłańnia nie ŭdałosia navat paśla niekalkich sprob.
— Jon prosta vielmi ścipły. I kaža, što pakul sam nie razumieje, jak stavicca da taho, što adbyvajecca. Ale pryvitańnie «ad naščadkaŭ» ja abaviazkova pieradam, — śmiajecca Pavieł.
Ciapier čytajuć
Trahiedyja ŭ Barysaŭskaj balnicy: unučka pacyjenta kaža, što na jaho źviarnuli ŭvahu praz šeść hadzin, kali ŭžo piena pajšła z rota — jon pamior20
Kamientary