Jak u Polščy zarehistravać zamiežny dakumient?

Rehistracyja zamiežnych aktaŭ hramadzianskaha stanu, ci ŭmiejscavieńnie (umiejscowienie), — heta dakładnaje i dasłoŭnaje pieraniasieńnie źmiestu dakumientaŭ u polskija rejestry aktaŭ hramadzianskaha stanu.

Umiejscavieńnie (transkrypcyja) patrebna pry atrymańni polskaha hramadzianstva, zaklučeńni abo skasavańni šlubu, a taksama dla vyrašeńnia inšych jurydyčnych i administracyjnych pytańniaŭ, źviazanych z hramadzianskim stanam.

Chto zajmajecca ŭmiejscavieńniem i jak vyhladaje pracedura

Rehistracyjaj aktaŭ hramadzianskaha stanu ŭ Polščy zajmajucca zahsy (Urządy Stanu Cywilnego).

U zahs padajecca zajava. Zrabić heta možna jak asabista, tak i praz svajho pradstaŭnika abo pa pošcie. Pry hetym źviartacca vyklučna va ŭstanovu pa miescy žycharstva nie abaviazkova: zarehistravać dakumienty možna ŭ lubym zahsie krainy.

Zajava razhladajecca na praciahu miesiaca z momantu padačy, a ŭ składanych situacyjach termin moža być padoŭžany, ale nie bolš čym da dvuch miesiacaŭ.

Dziaržaŭnaja pošlina składaje 50 złotych (11 jeŭra, abo 38 biełaruskich). Zapłacić jaje možna pieravodam na bankaŭski rachunak abo niepasredna ŭ kasie ŭžonda ŭ pracoŭny čas. U abodvuch vypadkach da zajavy nieabchodna budzie prykłaści paćviardžeńnie apłaty.

Paśla taho jak danyja z zamiežnaha dakumienta buduć uniesieny ŭ polski rejestr, inšaziemcu vydajuć poŭnuju vypisku z akta hramadzianskaha stanu. Dakumient možna atrymać asabista ŭ zahsie abo zamović dastaŭku pa pošcie.

Prysiažny pierakład

Kožny dakumient, jaki padajecca ŭ polski zahs dla transkrypcyi (umiejscavieńnia), pavinien supravadžacca prysiažnym pierakładam (tłumaczenie przysięgłe) na polskuju movu. Naprykład, prysiažny pierakład paśviedčańnia ab naradžeńni, jak praviła, kaštuje 50—100 złotych (11—22 jeŭra, abo 38—76 biełaruskich).

Jakija dakumienty patrebny dla padačy zajavy na transkrypcyju

Siarod nieabchodnych dakumientaŭ:

• zajava ab transkrypcyi (wniosek),
• aryhinał zamiežnaha akta hramadzianskaha stanu — paśviedčańnia ab naradžeńni, ab šlubie abo ab śmierci,
• prysiažny pierakład paśviedčańnia na polskuju movu,
• paćviardžeńnie apłaty dziaržaŭnaj pošliny.

Z saboj taksama nieabchodna mieć dakumient, jaki śviedčyć asobu.

Zialonyja knižački i apastyl

Praktyka roznych zahsaŭ čaściakom adroźnivajecca. U zaležnaści ad abstavin i zahsa zajaŭniku mohuć spatrebicca dadatkovyja dakumienty, naprykład apostyl abo paśviedčańni ab naradžeńni baćkoŭ. Tamu pierad vizitam varta ŭdakładnić aktualny pieralik niepasredna ŭ vybranaj ustanovie.

Letam 2025 hoda mnohija zahsy patrabavali apostyl na dakumienty, vydadzienyja orhanami BSSR abo SSSR, abo na ich kopii, vydadzienyja ŭžo ŭ suvierennaj Biełarusi. Heta było źviazana ź listom MUS Polščy, jaki rekamiendavaŭ zapytvać dadatkovaje paćviardžeńnie sapraŭdnaści dakumientaŭ, naprykład apostyl, u vypadkach, kali kiraŭnik polskaha zahsa sumniavajecca ŭ aficyjnym charaktary dakumienta abo jaho sapraŭdnaści.

Nielha adnaznačna śćviardžać, što toj ci inšy dakumient abaviazkova zapatrabuje apostyl abo, naadvarot, budzie pryniaty bieź jaho. Heta lepš udakładnić u kankretnym zahsie i pry nieabchodnaści vybrać inšy. Važna pamiatać, što źviarnucca možna ŭ luby zahs na terytoryi Polščy, niezaležna ad miesca žycharstva.

Ci viartajuć aryhinały dakumientaŭ

Pry afarmleńni dakumientaŭ u polskim zahsie aryhinały zastajucca ŭ archivie — i nie viartajucca zajaŭniku.

Adnak u vyklučnych vypadkach aryhinał zamiežnaha dakumienta ab hramadzianskim stanie moža być viernuty pa zajavie asoby, jakaja jaho padała, kali atrymać paŭtorny ekzemplar dakumienta niemahčyma. Dla hetaha nieabchodna napisać zajavu ŭ svabodnaj formie na imia kiraŭnika zahsa, spasłaŭšysia na artykuł 26 Zakona ab aktach hramadzianskaha stanu.

U vypadku zadavalnieńnia zajavy kiraŭnik zahsa vyrabić kopiju dakumienta i zaśviedčyć jaje adpaviednaść aryhinału. Zaśviedčanaja kopija zastaniecca ŭ archivie ŭstanovy, a aryhinał budzie viernuty zajaŭniku.

Dadatkovyja dakumienty: paśviedčańni ab naradžeńni baćkoŭ i paćviardžeńnie źmieny proźvišča

Niekatoryja polskija zahsy patrabujuć pradastavić paśviedčańni ab naradžeńni abodvuch baćkoŭ zajaŭnika, inšyja — paśviedčańnie maci, kab unieści danyja ab jaje dziavockim proźviščy, trecija nie zapytvajuć takuju infarmacyju ŭ pryncypie.

Kali zajaŭnik mianiaŭ proźvišča, zahs taksama moža zapytać dakumienty, jakija paćviardžajuć padstavy takoj źmieny. U zaležnaści ad situacyi heta moža być paśviedčańnie ab zaklučeńni šlubu abo ab źmienie imia i proźvišča.

Kali zajaŭnik ustupiŭ u šlub paŭtorna, ale zachavaŭ proźvišča papiaredniaha muža, u jakaści dadatkovaha paćviardžeńnia možna pradastavić archiŭnuju daviedku. Most viadomy vypadak, kali ŭ Varšavie takuju daviedku pryniali navat biez prysiažnaha pierakładu.

Kali mohuć admović u transkrypcyi dakumientaŭ

Artykuł 107 Zakona ab aktach hramadzianskaha stanu praduhledžvaje try padstavy, pa jakich kiraŭnik zahsa abaviazany admović u transkrypcyi zamiežnaha akta hramadzianskaha stanu.

Pieršaje — dakumient nie adpaviadaje ŭstanoŭlenym patrabavańniam. Naprykład, jon nie pryznajecca aktam hramadzianskaha stanu ŭ krainie vydačy, nie maje jurydyčnaj siły, vydadzieny nienaležnym orhanam, vyklikaje sumnieńni ŭ sapraŭdnaści albo paćviardžaje inšuju padzieju — nie naradžeńnie, zaklučeńnie šlubu abo śmierć.

Druhoje — zahs admović u transkrypcyi, kali zajaŭnik padaje nie dakumient z krainy, dzie adbyłasia padzieja (naradžeńnie, zaklučeńnie šlubu, śmierć), a transkrypcyju aryhinalnaha dakumienta, zroblenuju ŭ jakoj-niebudź inšaj dziaržavie.

Treciaje — ažyćciaŭleńnie transkrypcyi supiarečyć asnovatvornym pryncypam pravaparadku Polščy.

Što jašče moža stać prablemaj

Załaminiravany dakumient moža stać surjoznym pieraškodaj pry praviadzieńni pracedury transkrypcyi ŭ polskim zahsie.

Most viadomy vypadak, kali załaminiravanaje paśviedčańnie ab naradžeńni pryniali pry padačy dakumientaŭ u vajavodski ŭžond dla atrymańnia pastajannaha vidu na žycharstva pa karaniach, ale admovilisia pryniać u zahsie dla transkrypcyi. Supracoŭnica rastłumačyła zajaŭniku, što taki dakumient moža być pryniaty, kali zajaŭnik znachodzicca ŭ Polščy pad mižnarodnaj abaronaj.

Što rabić u vypadku admovy ŭ transkrypcyi

Kali zahs admovicca ŭnosić zamiežny dakumient u rejestry, zajaŭnik maje prava heta abskardzić. Skarha padajecca na imia vajavody na praciahu 14 dzion z dnia atrymańnia rašeńnia — praz kiraŭnika zahsa, jaki vynies admovu.

Što rabić, kali paśviedčańnie zhublena abo sapsavana

Kali paśviedčańnie ab naradžeńni było zhublena abo sapsavana, možna pasprabavać atrymać jaho paŭtorny ekzemplar u krainie vydačy. Adnak u Biełarusi zrabić heta možna albo asabista źjaviŭšysia ŭ zahs, albo praz pradstaŭnika na padstavie davieranaści, aformlenaj na terytoryi Biełarusi.

Kali pajezdka ŭ Biełaruś niemahčyma, naprykład dla asob, jakija znachodziacca ŭ Polščy pad mižnarodnaj abaronaj, možna pasprabavać prajści praceduru adnaŭleńnia źmiestu zamiežnaha akta hramadzianskaha stanu (odtworzenie treści zagranicznego dokumentu stanu cywilnego). U artykule 109 Zakona ab aktach hramadzianskaha stanu ŭkazana, što dadzienaja pracedura prymianiajecca, kali atrymańnie paŭtornaha dakumienta niemahčyma abo źviazana z surjoznymi ciažkaściami.

• 0
• 0
• 0
• 0
• 0
• 0
• 0
• 0