Łatvija ŭviała łabaratornyja pravierki ŭsich hruzaŭ biełaruskaha zbožža
Słužba dziaržaŭnych dachodaŭ Łatvii ź vieraśnia praviaraje ŭsie partyi zbožža, jakija pastupajuć z Rasii i Biełarusi. Meta pravierak — vyśvietlić, ci nie vyvoziać praz łatvijskuju terytoryju zbožža z akupavanych Rasijaj ukrainskich terytoryj.
Pra heta paviedamiła hienieralnaja dyrektarka słužby Bajba Šmite-Rokie ŭ efiry telekanała TV3. Pavodle jaje słoŭ, supracoŭniki praviarajuć dakumienty, jakija supravadžajuć kožny hruz. Adnačasova Charčova-vieterynarnaja słužba Łatvii adbiraje ŭzory zbožža z tranzitnych partyj i adpraŭlaje ich na łabaratornyja daśledavańni ŭ Francyju i Vialikabrytaniju.
Ekśpiertyzy pavinny dapamahčy vyznačyć pachodžańnie zbožža i vyśvietlić, ci było jano vyraščanaje na akupavanych ukrainskich terytoryjach.
Kali daśledavańni paćvierdziać ukrainskaje pachodžańnie zbožža z akupavanych terytoryj, infarmacyju pieradaduć atrymalnikam hruzu. Akramia taho, vyniki pravierak mohuć stać padstavaj dla abmiežavańnia dziejnaści adpaviednaha pieravozčyka ŭ Łatvii. Nie vyklučajecca i zabarona na dalejšy tranzit zbožža praz krainu.
Pry hetym Bajba Šmite-Rokie nie ŭdakładniła, ci ŭdałosia ŭžo vyjavić partyi zbožža, pachodžańnie jakich źviazanaje z akupavanymi terytoryjami Ukrainy.
Niahledziačy na ŭzmocnienyja pravierki, tranzit zbožža z Rasii i Biełarusi praz Łatviju istotna pavialičyŭsia. Za pieršyja dzieviać miesiacaŭ 2026 hoda jaho abjom byŭ u 2,7 raza bolšy, čym za anałahičny pieryjad 2025 hoda. Absalutnyja abjomy pieraviezienaha zbožža nie paviedamlajucca.
Ciapier čytajuć
«Z rasijan-naviednikaŭ pracentaŭ 70 akazvalisia vatnikami». Eks-hid z muzieja VAV, jakoha zatrymlivali jaho ž ekskursanty, ciapier papularny ŭ Varšavie — pahutaryli ź im14
Kamientary