Łukašenka pieratasavaŭ kiraŭnictva armii

16 žniŭnia kiraŭnik Biełarusi Alaksandr Łukašenka zrabiŭ šerah kadravych pryznačeńniaŭ va Uzbrojenych siłach.

Jak paviedamlajecca na sajcie kiraŭnika dziaržavy, kamandujučym vojskami Zachodniaha apieratyŭnaha kamandavańnia pryznačany Siarhiej Patapienka. Raniej hetuju pasadu zajmaŭ Alaksandr Miažujeŭ.

Namieśnikam kamandujučaha ZAK staŭ Alaksandr Valfovič.

Načalnikam hałoŭnaj vajennaj inśpiekcyi Uzbrojenych sił pryznačany Alaksandr Miažujeŭ. Na hetaj pasadzie jon źmianiŭ Hienadzia Šaŭrova, jaki vyjšaŭ u adstaŭku pa chvarobie ŭ krasaviku hetaha hoda.

Kamandujučym siłami śpiecyjalnych apieracyj Uzbrojenych sił staŭ Aleh Biełakonieŭ. Jaho papiarednikam byŭ Lucyjan Surynt.

Andrej Niekraševič pryznačany namieśnikam kamandujučaha vojskami Paŭnočna-zachodniaha apieratyŭnaha kamandavańnia.

Namieśnikam kamandujučaha Vajenna-pavietranymi siłami i vojskami supraćpavietranaj abarony — načalnikam avijacyi pryznačany Ihar Hołub. Na hetaj pasadzie jon źmianiŭ Michaiła Lavickaha, jaki kamandavaŭ vajennaj avijacyjaj krainy na praciahu siami hadoŭ.

Ihar Hołub zakončyŭ fakultet Hienieralnaha štaba Uzbrojenych sił Biełarusi. Dahetul kamandavaŭ 206-j šturmavoj avijacyjnaj bazaj u Lidzie.

Źviartajučysia da aficeraŭ, Alaksandr Łukašenka padkreśliŭ, što, u pieršuju čarhu, važna nie pakryŭdzić tych, kamu na źmienu prychodziać novyja kadry. «U sapraŭdnaha aficera ŭsio žyćcio skancentravanaje ŭ armii i źviazanaje z armijaj. Tamu ja jašče raz papiaredziŭ i dziaržsakratara Savieta biaśpiekI i ministra abarony pra toje, što ŭsio pavinna być pa-čałaviečy i sumlenna», — skazaŭ prezident.

Jon nahadaŭ pra nieabchodnaść amałodžvać kadry i źviarnuŭ uvahu na toje, što vajennyja śpiecyjalisty pavinny ŭ asnoŭnym rychtavacca ŭ Biełarusi na bazie Vajennaj akademii, i tolki pa niekatorych deficytnych śpiecyjalnaściach — u Rasii. Pry hetym jakaść ajčynnaj sistemy padrychtoŭki vajennych kadraŭ, jak zaznačyŭ prezident, paćviardžajecca tym, što mnohija krainy nakiroŭvajuć svaich vajennasłužačych dla padrychtoŭki ŭ Biełaruś.

Dziaržsakratar Savieta biaśpieki Leanid Malcaŭ i ministr abarony Juryj Žadobin paviedamili prezidentu pra stan i pierśpiektyvy nacyjanalnaj sistemy padrychtoŭki vajennych kadraŭ, realizacyju płanaŭ pa ŭkamplektavańni Uzbrojenych sił. Taksama byli abmierkavanyja pytańni, źviazanyja z padtrymańniem naležnaha ŭzroŭniu bojehatoŭnaści, arhanizacyjaj bajavoj padrychtoŭki, utrymańniem techniki i ŭzbrajeńniaŭ, umovami žyćcia i bytu vajennasłužačych.

Alaksandr Łukašenka daručyŭ u chutkim časie padrychtavać jaho naviedvańni šerahu złučeńniaŭ i čaściej Uzbrojenych sił, paviedamiła pres-słužba prezidenta.

• 0
• 0
• 0
• 0
• 0
• 0
• 0
• 0