Praciahvajecca epocha sapraŭdy revalucyjnych pieraŭtvareńniaŭ u budaŭnictvie. Robiacca javaj novyja značeńni narmatyŭnaha supraciŭleńnia ciepłapieradačy vonkavych aharodžvalnych kanstrukcyj žyłych i hramadskich budynkaŭ: 3,2 m²•°S/Vt — dla ścien; 6,0 m² •° S /Vt — dla sumieščanych pakryćciaŭ i pierakryćciaŭ haryščaŭ; 1,0 m²•° S /Vt — dla zapaŭnieńnia śvietłavych prajomaŭ. U respublicy maje budavacca ŭsio bolš enierhaefiektyŭnych budynkaŭ, u jakich udzielny raschod ciepłavoj enierhii na aciapleńnie i vientylacyju nie pieravyšaje 40 i 90 kVt x č/m2 u hod — dla abjektaŭ vyšynioj ad čatyroch da dzieviaci i ad adnaho da troch pavierchaŭ adpaviedna. Ažyćciaŭlajecca pierachod Biełarusi na jeŭrapiejskija budaŭničyja normy, idzie praces spraščeńnia techničnych narmatyŭnych pravavych aktaŭ u budaŭnictvie. Z 1 žniŭnia 2010 dziejničaje taki asnovatvorny dakumient, jak techničny rehłamient Respubliki Biełaruś «Budynki i zbudavańni, budaŭničyja materyjały i vyraby. Biaśpieka».
Važnaja asablivaść hetaha momantu zaklučajecca ŭ tym, što budaŭničyja spravy pačynaje mocna karektavać nadvorje. Nadzvyčaj śpiakotnaje leta 2010-ha prymušaje i biełarusaŭ mocna zadumacca pra toje, jak zmahacca ź pierahrevam budynkaŭ. Darečy, vytvorčaść adzinki choładu razoŭ u piać daražejšaja za vytvorčaść adzinki ciapła. Što datyčyć Jeŭrasajuza, to tam, pavodle druhoj dyrektyvy pa enierhietyčnych charaktarystykach budynkaŭ — EPBD II, da 2020 usio novaje žyllo musić mieć blizki da nula raschod ciepłavoj enierhii, to bok adpaviadać patrabavańniam da pasiŭnaha doma. Novyja hramadskija budynki ŭ krainach Jeŭrasajuza musiać zrabicca pasiŭnymi jašče raniej. Admietnaja rysa pasiŭnych damoŭ — u ich adnolkava spryjalny mikraklimat i ŭ lutyja marazy, i ŭ śpioku. Tak što nie vyklučana, što ŭ chutkim časie nazvanyja ŭ papiarednim abzacy značeńni supraciŭleńnia ciepłapieradačy padaducca biełarusam vidavočna niedastatkovymi.
Što datyčyć vystavy «Budprahres-2010», to jana całkam zdolnaja adkazać na mnohija aktualnyja pytańni. Pytańni, źviazanyja ŭ pieršuju čarhu z dasiahnieńniem vielmi nieabchodnaj harmonii troch «E»: ekałahičnaści, enierhaefiektyŭnaści i ekanamičnaści novych budynkaŭ i zbudavańniaŭ.
Musić atrymacca nie horš, čym u 2009
Niališnie zhadać «Budprahres-2009». Aficyjnyja ličby pa im nastupnyja. Ahulnaja vystavačnaja płošča — 8100 kvadratnych mietraŭ. Adkrytaja vystavačnaja płošča — 3500 kvadratnych mietraŭ. 400 kampanij-ekspanientaŭ z 14 krain, u tym liku 339 ź Biełarusi, 61 z-za miažy. 26 000 naviedvalnikaŭ-śpiecyjalistaŭ. Miarkujecca, što vynikovyja ličby pa «Budprahresie-2010» buduć, prynamsi, nie horšyja.
Kamientary