U viaskovych škołach tradycyja vykarystańnia dziciačaj pracy i nie pierapyniałasia, a ŭ haradskija škoły jana moža viarnucca.
U viaskovych škołach tradycyja vykarystańnia dziciačaj pracy i nie pierapyniałasia, a ŭ haradskija škoły jana moža viarnucca.
«Štohod vučni i nastaŭniki vučebna-piedahahičnaha kompleksu «Kruciłavicki dziciačy sad — ahulnaadukacyjnaja siaredniaja škoła» Dziatłaŭskaha rajona Hrodzienskaj vobłaści dapamahajuć SVK «Hranit-Ahra» va ŭborcy bulby. Takim čynam škoła narychtoŭvaje dla siabie bulbu, a dla školnikaŭ heta mahčymaść zarabić hrošy». Zdavałasia b, zvyčajnaje dla sučasnaj Biełarusi paviedamleńnie, adnak kolki ŭ im toicca pytańniaŭ. Pa-pieršaje, hetaje paviedamleńnie razam sa zdymkam školnika z košykam bulby raźmiaściła na pieršaj pałasie «Nastaŭnickaja hazieta», drukavany orhan Ministerstva adukacyi. Ustanovy, jakaja, miž inšym, najpierš maje dbać pra jakaść adukacyi, zabiaśpiečyŭšy navučalnyja ŭstanovy ŭsim nieabchodnym.
Vyhladaje, što «NH» nie bačyć ničoha zahannaha ŭ tym, što ŭ viek internetu i mabilnaj suviazi dzieci musiać kapać dla školnaj stałoŭki bulbu, a nie zasvojvajuć navučalnuju prahramu.Nasamreč — u čym prablema? Dla ich ža heta jašče i «mahčymaść zarabić hrošy».
Nastupnaje pytańnie — ci pavinna viaskovaja škoła narychtoŭvać sabie charč na zimu? I heta ŭ «mocnaj i kvitniejučaj krainie»?! (Iznoŭ taki, nie zabyvajem pra vykarystańnie pracy niepaŭnahadovych z adryvam ad navučalnaha pracesu). I jak heta haradskija škoły biez hetaha abychodziacca? Niechta skaža, što viaskovyja dzieci pry hetym majuć ilhoty pry pastupleńni.
Adnak ciažka pavieryć u toje, što adryŭ ad vučoby na miesiac-dva ŭvosień, dy zaviedama zanižany bał pry pastupleńni palapšajuć uzrovień viedaŭ viaskovych dziaciej dy źjaŭlajucca dadatkovym stymułam dla navučańnia.Dumajecca, što nichto nie budzie spračacca i z tym, što ŭborka bulby — heta ciažkaja fizičnaja praca, da ŭsiaho traŭmaniebiaśpiečnaja. Zrešty, kali ŭ viaskovych škołach tradycyja vykarystańnia dziciačaj pracy i nie pierapyniałasia, to ŭ haradskija škoły jana moža viarnucca. Prynamsi, u Vaŭkavysku kažuć pra adnaŭleńnie praktyki zboru školnikami mietałałomu. Navat prybliznyja ličby pracoŭnych normaŭ ahučvajucca — kala tony z adnaho kłasa.
Pytańnie pra toje, čamu naskroź datavanaj na miljardy rubloŭ sielskaj haspadarcy źbirać uradžaj, jak i za savietami, dapamahajuć dzieci, vartaje asobnaj temy. Kali ž razhladać jaho z punktu hledžańnia sučasnaha stanu viaskovaj škoły, to ŭźnikaje dumka — ci nie śviedčyć padobnaja «štohadovaja dapamoha» pra zaležnaść apošniaj ad kałhasu, jak ad adzinaha sponsara.
Spytajcie luboha viaskovaha nastaŭnika, ci pramianiaŭ by jon utulny kabiniet na pracu ŭ adkrytym poli ŭ kastryčniku, kali b na toje była jaho ŭłasnaja vola.Ale ž kałhas i aŭtobus daje, i harodninaj dapamahaje, dyj šmat u kaho rodnyja ŭ SVK pracujuć na kantraktach... Adsiul zamknionaje koła, razarvać jakoje ŭ stanie tolki dziaržava. Ale i jaje, pa ŭsim bačna, isny stan rečaŭ zadavalniaje (čaho vartyja vykazvańni namieśnika ministra adukacyi Kazimira Faryno pra toje, što sielhasraboty nie adabjucca na jakaści navučańnia staršakłaśnikaŭ i studentaŭ). A darma, bo
hetym samym nie tolki zakładajecca mina zapavolenaha dziejańnia pad budučyniu vioski (uzakonieny pryhon — adna z pryčynaŭ uciokaŭ moładzi u horad), ale i robić marnymi ŭsie sproby pavysić jakaść adukacyi viaskovaha školnictva.
Inšy pohlad: «Kali b nie praca ź dziacinstva, sučasny śviet pieratvaryŭ by mianie ŭ hultajku»
Piśmieńnica Natałka Babina, maci traich dziaciej, ličyć, što praca z malenstva hartuje duch. Heta nie adpačynak i nie zabaŭka, heta ciažka i časam pad prymusam, ale takim čynam hartujecca mocny charaktar. «U našaj siamji dziaciej z małych hadoŭ pryvučali da pracy. Kali b nie heta, to sučasny śviet pieratvaryŭ by mianie ŭ hultajku». Piśmieńnica kaža, što siońnia praca školnikaŭ u kałhasach i sapraŭdy vyhladaje dzikavata, ale pry hetym sučasnaje žyćcio nie prapanuje jasnych normaŭ, jak navučyć dziaciej pracavać. U lubym vypadku, Natałka Babina ŭpeŭnienaja, što pracoŭnym vychavańniem najpierš musić zajmacca siamja, a nie dziaržava.
Ciapier čytajuć
Pamiatajecie byłoha pamiežnika, jaki staŭ dalnabojščykam i ŭ Hiermanii pryznavaŭsia ŭ lubovi da Łukašenki? Ź im biada17
Kamientary