Štanhie: My nie dali ałbancam nivodnaha šancu

«My nie dali ałbancam nivodnaha šancu», — zajaviŭ hałoŭny trenier biełaruskaj futbolnaj zbornaj Biernd Štanhie na pres-kanfierencyi paśla zakančeńnia adboračnaha matču čempijanatu Jeŭropy-2012.

Sustreča prajšła 12 kastryčnika na minskim stadyjonie «Dynama» i zaviaršyłasia pieramohaj haspadaroŭ — 2:0 (Radyjonaŭ, 10, Kryviec, 77).

«Siońnia ŭdały dzień dla biełaruskaha futboła, — adznačyŭ Štanhie. — Maładziožnaja zbornaja stvaryła vialikuju mižnarodnuju siensacyju, kali abyhrała italjancaŭ i vyjšła ŭ finalnuju častku čempijanatu Jeŭropy. Naš ža vynik siensacyjaj nie źjaŭlajecca. Narmalny vynik, i ŭsio ž my hanarymsia tym, što nabrali vosiem ačkoŭ i tolki krychu adstajom ad Francyi».

Pieramohu nad Ałbanijaj Štanhie nazvaŭ zasłužanaj. «Ź pieršaj chviliny my staralisia pakazać, što ŭnieśli karektyvy paśla ničyjoj ź Luksiemburham. Chtości moža skazać, što Ałbanija — kiepskaja kamanda, ale jana zhulała ŭničyju z Rumynijaj i Bośnijaj i Hiercahavinaj», — skazaŭ niamiecki śpiecyjalist.

Štanhie ličyć, što «entuzijazm i natchnieńnie hulcoŭ zasłuhoŭvali bolšaj kolkaści hledačoŭ», jakich pryjšło kala siami tysiač.

Na jaho dumku, mocnaj abaronaj (nivodnaha prapuščanaha miača ŭ čatyroch startavych matčach) moža hanarycca luby trenier. «Dobraja abarona — asnova pośpiechu, i my dabilisia nievialikaha prahresu», — adznačyŭ Štanhie.

Jon źviarnuŭ uvahu na toje, što ŭ składzie kamandy vystupali piać futbalistaŭ maładziožnaj zbornaj papiaredniaha sklikańnia. «Heta amal pałova hulcoŭ, što śviedčyć ab pravilnaści vybranaha šlachu», — zajaviŭ trenier.

Štanhie ličyć nieabchodnym umacoŭvać hulniavuju dyscyplinu, u advarotnym vypadku žoŭtyja kartki mohuć stać prablemaj. U nastupnym matčy (u haściach suprać Ałbanii 26 sakavika) z-za pieraboru papiaredžańniaŭ užo nie zhulaje Cimafiej Kałačoŭ, jaki dabaviŭsia da vydalenaha ŭ hulni ź Luksiemburham Siarhieja Karnilenki.

Hałoŭny trenier zbornaj padkreśliŭ, što ŭ Ałbanii pra ničyju nie moža być i havorki, kamanda budzie imknucca tolki da pieramohi.

«Naš šlach vielmi składany. Nijakich pryčyn dla ejfaryi niama. U raździavalni ja skazaŭ hulcam: radujciesia, ale niadoŭha», — skazaŭ Štanhie.

Trenier zbornaj Ałbanii Džamał Mustadanahič paskardziŭsia na adsutnaść troch viadučych hulcoŭ (traŭmy i dyskvalifikacyja), a taksama hałoŭnaha treniera Josipa Kuže, u jakoha 30 vieraśnia zdaryŭsia insult. «U pieršym tajmie ŭ nas było šmat niedakładnych pasaŭ — 25 z 30, i heta stała vialikaj prablemaj», — adznačyŭ jon.

• 0
• 0
• 0
• 0
• 0
• 0
• 0
• 0