Tut čynoŭniki dziakujuć rok-muzykam za ichni vystup, a bajkiery achoŭvajuć kancert razam z bryhadaj amapaŭcaŭ. Tut možna ŭstavać sa svaich kresłaŭ i padpiavać Kullinkoviču. Tut rej viadzie dyrektarka Pałacu kultury, jakaja nia śpić sutkami i ŭkładaje ŭłasnyja hrošy, kab tolki adbyŭsia Rok-Festyval. I takoje mahčyma ŭ Biełarusi, u naš čas. Praŭda, tolki ŭ adnym miescy – na «Rok-Kole-2006».
Tut čynoŭniki dziakujuć rok-muzykam za ichni vystup, a bajkiery achoŭvajuć kancert razam z bryhadaj amapaŭcaŭ. Tut možna ŭstavać sa svaich kresłaŭ i padpiavać Kullinkoviču. Tut rej viadzie dyrektarka Pałacu kultury, jakaja nia śpić sutkami i ŭkładaje ŭłasnyja hrošy, kab tolki adbyŭsia Rok-Festyval. I takoje mahčyma ŭ Biełarusi, u naš čas. Praŭda, tolki ŭ adnym miescy – na «Rok-Kole-2006».
Viadučyja śledam za śpievam Alesia Kuźmina 15-hadovaj daŭniny, paŭtarajuć kožny radok ź pieśni «Ja žyŭ». Vychodzić, jak malitva. Tak adkryvajecca 16-ty pa liku fest «Rok-Koła». Na scenie, jak zaŭždy, zapalvaje Anisa. Tut jon pačuvaje siabie bolš raźniavolena, čym padčas viadzieńnia sioletniaj «Karanacyi» ŭ Miensku. Nie chavaje svaich emocyj padčas vystupaŭ hurtoŭ: ciešycca, jak dzicia, kali hurt jamu padabajecca, i ščyra plujecca ad biezhustoŭnaści. Vieści jamu dapamahaje Zoja Krasavina, dyrektarka samaj vialikaj połackaj kancertnaj placoŭki. Troje sutak jana nia spała, kab zrabić hety festyval, ale sa sceny taho niezaŭvažna. Enerhija ad hetych užo niemaładych viadoŭcaŭ sychodzić niejmaviernaja. Hety zapał pieradajecca kankursantam. Sioleta ŭmova kab trapić na fest była dosyć specyfičnaj – treba było zahadzia zrabić kaver na «Miascovy čas». Anisa za kulisami nie chavaŭ radaści ad taho, jak pakaciła jahonaja zaduma. Dyski ź interpretacyjami klasyki biełaruskaha roku prychodzili nia tolki z usioj Biełarusi, ale i z susiednich krain, navat z dalokich kutočkaŭ Rasiei. «Niamała byŭ ździŭleny takoj reakcyi muzykaŭ z postsavieckaj prastory, – kaža niaźmienny dyrektar festu. – Ale zaprasić jaki jakucki hurt ciažka dla nas, dy i dla ich byŭ by šlach niaprosty». U vyniku z 80 padadzienych zajaŭ byli abranyja 24 kamandy, jakija ŭklučylisia ŭ šalony maraton, jaki raspačaŭsia ŭ siaredzinie dnia, a skončyŭsia pozna ŭnačy.
«Miascovy čas» pa dezu
Navat šeryja kamandy pieraŭvasablalisia na scenie, kali pačynali hrać «Miascovy čas». Časam pieśni biełaruskaj kamandy raspaznać było ciažkavata, bo hučali jany i ŭ art-roku, i ŭ hard-koru, nabyvali fankavy prysmak, pieranaradžalisia ŭ pop-rok aranžyroŭkach, napaŭnialisia psychadełam i vybuchali dezam. Hitaryst «Miascovaha času» Ŭład Palšyn jaŭna rasčuleny ŭsimi varyjacyjami na temu spadčyny połackaj kamandy. Ale asabliva jon prasiaknuŭsia kaveram babrujskaj «Ru.st», jakija pierajnačyli «Dziadziu Vaniu». Naohuł ža samaj papularnaj pieśniaj MČ stałasia «Budzie tak!», da jakoj źviarnułasia z paŭdziasiatka hurtoŭ. Skaryła ŭsich hrupa sa Smalensku – Deimos, jakaja mocna i adładžana adyhrała svoj set. Ichni vakalist Aleks pryznaŭsia ŭ lubvi da «Miascovaha času» i amal što dakładna paŭtaryŭ falcet Alesia Kuźmina. Mienavita jany i ŭziali Hran-Pry. Dosyć cikavy, taki ciažkarokava-elektronny saŭnd Deimos hledačy zmohuć pačuć na feście «Volnaje pavietra-2» naleta. Naŭprost sa sceny ich tudy zaprasiŭ Pit Paŭłaŭ.
Laŭreaty sioletniaha «Basovišča» ŭziali svajo i na «Rok-Kole». Mahiloŭcy z «Vodar Suśviet» nabirajuć z kožnym vystupam peŭnaści i ŭ hety viečar hučali prosta vydatna. Jany dastali pieršuju ŭznaharodu festu. Jašče adny hieroi Haradku S.D.M. uziali treciaje miesca. Druhimi ŭklinilisia miascovyja «Alhama» ź vielmi ruchavym vakalistam, jaki, vidać pierahladzieŭ videa z «AukcYonom» i Harkušam. «Amalhamu», darečy, zaprasili na fest «Rok za Babroŭ».
Sapraŭdny podźvih ździejśniŭ hurt «Abšar». Pa darozie na fest u avaryju trapiŭ bubnač i basist hetaje kamandy. Arhanizatary ŭžo vykraślili ich sa śpisu ŭdzielnikaŭ, a tyja ŭziali i vyjšli. Jany znajšli zamienu siarod połackich muzykaŭ i biez repetycyj davoli-taki niakiepska syhrali. Dziva, ale arhanizataram udałosia damovicca z haradzkimi ŭładami i praciahnuć kancert ažno da dźviuch hadzinaŭ nočy. Zakryvaŭ pieršy dzień Neuro Dubel, jaki ŭpieršyniu hraŭ na «Rok-Kole». Kullinkoviču nia tolki dali daśpiavać, ale jašče i vyjści na bis. I ŭsie pry hetym zadavolenyja – hledačy, bo ŭjelisia muzykaj, arhanizatary, tamu što ŭsio prajšło pavodle planu, achova, tamu što nia zdaryłasia ekscesaŭ. «Rok-Koła» pazycyjanujecca vyklučna jak śviata muzyki. Tamu i adpaviednaje staŭleńnie da jaho z roznych bakoŭ.
Kinčaŭ nabyŭ «Kramu»
Lider «Alisy» daŭ zhodu pryjechać, bo chacieŭ pabačyć Połacak, Safiju i archijapiskapa Ŭładyku Fieadosija (jaki, darečy, taksama vykazaŭ padtrymku festyvalu). Zorka rasiejskaha roku byŭ niešmatsłoŭny, ale vykazaŭ taktoŭnuju cikavaść da biełaruskaj muzyki i nabyŭ dysk «Krambambuli» i «Kramy». Vyjaviłasia, što pamiataje Varaškieviča jašče z maskoŭskaha festu «Pakaleńnie». Niahledziačy na fantastyčnyja dla Połacka košty na kvitki (25000 rub.), zala była pierapoŭnienaja. Pahladzieć na «Alisu» pryjšli navat Lera Som i Alaksiej Janukievič. Praŭda što apošni paśla adnaho z bajavych kličaŭ Kinčava «Zdravstvuj, Ruś» pajšoŭ z zali. Biaz hetaha patasu «Alisa» sapraŭdy hučyć smačna, aktualna, ale biezydejna, jak dla biełarusaŭ:). Na majo pytańnie, čamu b nie pryvieści amal za tyja ž hrošy «Akiean Elzy» ci «Zdob šy zdub», Anisa ščyra pryznajecca: «My z Kinčavym žyli adnym žyćciom. Ździejśniłasia maja mara, jakuju mieŭ z 1986 hodu, – «Alisa» ŭ Połacku! Nastupnymi buduć AC/DC», – napaŭsurjozna skančvaje Siarhiej. «Alisa» całkam zakryła saboj druhi dzień festyvalu, u jaki planavaŭsia jašče i hała-kancert pieramožcaŭ «Rok-Koła-2006». Skłałasia paprostu biezvychodnaja sytuacyja: pierad «Alisaj» jany nie mahli syhrać, kab nie «papsavać» nastrojku aparata, zroblenuju pad rasiejcaŭ, a paśla – taksama, bo vypadała čakać z hadzinu naładki taho ž aparatu.
Vycisnuty Anisa siadzić paśla ŭsiaho ŭ hrymiorcy pierad pierapoŭnienaj niedapałkami popielnicaj i jaki raz stomlenym hołasam paŭtaraje: «Hety festyval byŭ apošnim». Ale jamu ŭžo pryzvyčailisia nia vieryć u hetym pytańni...
Siarhiej Budkin
Hieroi «Rok-Koła-2006»
Hran-Pry (lepšy hurt festu, lepšaja interpretacyja pieśni z repertuaru «Miascovaha času») – Deimos (Smalensk)
Laŭreaty
1-ja stupień – «Vodar Suśviet» (Mahiloŭ);
2-ja stupień – Amalhama (Navapołacak);
3-ja stupień – S.D.M. (Miensk).
Lepšy hitaryst – Jury Michajłaŭ (Deimos).
Lepšy bas-hitaryst – Ihar Hałavačoŭ (Primus inter Pares, Navapołacak).
Lepšy bubnač – Anton Lavych (Skynet, Babrujsk).
Lepšy vakalist – Ihar Baraŭkoŭ (Amalhama).
«Jana daŭnavata ŭ Biełarusi». Baćka Anžaliki Mielnikavaj pryznaŭsia, što jana žyvaja i zdarovaja90
Kamientary