Plamy na skury mohuć raskazać šmat pra što

Chvaroby skury — nie tolki niepryjemnyja i paharšajuć jakaść žyćcia. Jany jašče zusim nie biaskryŭdnyja, praciahła lečacca i prynosiać surjoznyja ŭskładnieńni.

Adnak, jak zaŭvažyŭ doktar-dermatavienierołah, zahadčyk ambułatornaha dermatavienierałahičnaha adździaleńnia Minskaha skurviendyspansera Uładzimir Jaromič, svoječasova zaŭvažyŭšy tyja abo inšyja źmianieńni i źviarnuŭšysia da doktara, možna praduchilić ciažkija prablemy sa zdaroŭjem. Takim čynam, pra što mohuć śviedčyć plamy na skury?

Nievialikija ciomna-karyčnievyja plamy na kiściach i inšych adkrytych miescach — čaściej za ŭsio biaskryŭdnyja ŭzrostavyja źmianieńni.

Pryščy byvajuć nie tolki ŭ padletkaŭ. Jany źjaŭlajucca, kali pory zabivajucca salnym sakretam. Adna z pryčyn — parušeńnie harmanalnaha bałansu. Źviarniciesia da dermatołaha i endakrynołaha.

Vysypka moža być abumoŭlena mnostvam faktaraŭ. U pieršuju čarhu padazrajuć «dziciačyja» infiekcyi: adzior, krasnuchu, viatranku i inš. Ale kali šmatlikija kropkavyja krovaźlićci, padobnyja na vysypku, źjavilisia, naprykład, na zadniaj pavierchni noh, heta moža być prykmietaj źnižeńnia ŭzroŭniu trambacytaŭ u kryvi. Vysypka pad hrudźmi abo ŭ pachu časam vyklikana hrybkovaj infiekcyjaj, jakaja časta paražaje chvorych na dyjabiet ci atłuščeńnie. Kali ž vysypkaj pakrylisia vialikija ŭčastki cieła, heta moža śviedčyć pra alerhičnuju reakcyju — mahčyma, vy pryniali novyja leki. Łuskavatyja čyrvonyja blaški na skury — prykmieta psaryjazu.

Jazva na nazie moža być simptomam sardečna-sasudzistaj niedastatkovaści ci dyjabietu. Hetyja zachvorvańni źnižajuć cyrkulacyju kryvi ŭ nahach, i skura atrymlivaje niedastatkovaje siłkavańnie. Tamu navat niaznačnaja infiekcyja moža stać pryčynaj źjaŭleńnia jazvy.

Blednaść skurnych pokryvaŭ havoryć pra aniemiju (małakroŭje) z-za deficytu ŭ arhaniźmie žaleza i vitaminu V 12. Ale časam u hetym vinavataje zvyčajnaje pieratamleńnie. Varta vyspacca i adpačyć — i zdarovy koler skury vierniecca.

Aranžavaje adcieńnie (karaciniemija) čaściej za ŭsio sustrakajecca ŭ viehietaryjancaŭ, jakija pastajanna ŭklučajuć u svoj racyjon zanadta šmat morkvy. Heta biaśpiečna i nie patrabuje lačeńnia. Dastatkova abmiežavać užyvańnie hetaj aharodniny — i skura nabudzie narmalny koler.

Pažaŭcieńnie (žaŭtucha) moža być simptomam zachvorvańniaŭ piačonki (naprykład, hiepatytu) ci abvastreńnia žoŭciekamiennaj chvaroby. Pryčynaj žaŭtuchi źjaŭlajecca i pavieličeńnie padstraŭnikavaj załozy, i niazdolnaść arhanizma vyvodzić liški bilirubinu. U hetym vypadku mača zvyčajna nabyvaje koler ciomnaha piva.

Ciomnyja ahrubiełyja ŭčastki na skury, jakija navobmacak nahadvajuć naždačnuju papieru, nazyvajuć soniečnym kieratozam. Čaściej za ŭsio takija plamy źjaŭlajucca na hałavie. Heta dobrajakasnyja ŭtvareńni, ale da dermatołaha źviarnucca treba. I, zrazumieła, paźbiahajcie pramych soniečnych promniaŭ.

Kali na skury źjaviłasia radzimka ź niaroŭnymi krajami ci staraja radzimka źmianiła formu i koler, zapaliłasia ci łuščycca, terminova idzicie da dermatołaha.

• 0
• 0
• 0
• 0
• 0
• 0
• 0
• 0