«My abaviazanyja zrabić prajezd dla školnikaŭ biaspłatnym»
Aŭtaparki krainy atrymali zahad źvierchu, ale staviacca da jaho pa-roznamu.
Aŭtaparki krainy atrymali zahad źvierchu, ale staviacca da jaho pa-roznamu.
Minskija školniki ad 7 śniežnia mohuć biaspłatna karystacca hramadskim transpartam (akramia taksi). Rašeńnie ŭstupiła ŭ siłu paśla adpaviednaha zahadu «Minsktransa». Takim čynam, minskija transpartniki pieršymi vykanali ahučany na IV Usiebiełaruskim schodzie zahad Alaksandra Łukašenki: «U apošni čas usio bolš padymajecca pytańnie ab ilhotach na prajezd školnikaŭ, navučencaŭ, studentaŭ. Dumaju, što z hetym treba pahadzicca. Uradu ŭ tydniovy termin prapracavać hetaje pytańnie, praličyć i ŭnieści kankretnyja prapanovy».
Telefanavańni ŭ aŭtaparki abłasnych centraŭ i bujnych haradoŭ zaśviedčyli, što adpaviednyja rasparadžeńni pryjšli i tudy, abo jašče čakajucca. Staŭleńnie da inicyjatyvy z centru samaje roznaje: ad rašučaj hatoŭnaści vykanać zahad, da niavyznačanaści.
«Tolki siońnia atrymali rasparadžeńnie, ciapier budziem dumać, jak vyrašyć pytańnie», — paviedamili ŭ pryjomnaj Hrodzienskaha aŭtobusnaha parku.
U «Bresckim aŭtaparku №1» adkazali, što viedajuć pra rašeńnie «Minsktransa». «Tak, u Minsku školniki ŭžo jeździać biaspłatna. A ŭ nas pakul ničoha nieviadoma».
U «Homielskim aŭtaparku №1» čakajuć rašeńnia abłvykankamu. «Pakul hetaje pytańnie nie vyrašanaje», — raskazali ŭ pryjomnaj pradpryjemstva.
Čakajuć rašeńnia z abł- i harvykankamu i ŭ «Aršanskim aŭtaparku №3».
U Baranavičach supracoŭniki aŭtobusnaha parku ŭ razhublenaści ad taho, jak im vykanać pažadańnie kiraŭnika krainy. «Prezident ža tydzień daŭ na razhlad hetaha pytańnia, ale jak heta realizavać? Chto nam budzie kampiensavać prajezd?», — paviedamiła krynica ŭ aŭtaparku baranavickaj haziecie «Intex-press».
A voś kiraŭnictva babrujskaha aŭtaparku ćviorda abiacaje vykanać zahad źvierchu, kali atrymaje adpaviednyja dakumienty. «Kaniečnie zrobim prajezd biaspłatnym. My abaviazanyja heta zrabić».
Nahadajem, što zakon ab skasavańni lhot, u tym liku ilhotnaha prajezdu ŭ hramadskim transparcie dla školnikaŭ, studentaŭ i piensijanieraŭ, ustupiŭ u siłu 17 śniežnia 2007 h. Da admieny lhot školniki karystalisia 50-% źnižkaj na prajezd. Ciapier ža jany atrymali całkam biaspłatny prajezd.
Kamientary