Chto z kandydataŭ što rabiŭ u časie Płoščy-2006?

Sioleta adrazu šeść kandydataŭ zaklikajuć vybarcaŭ pryjści na Płošču 19 śniežnia i dałučycca da supolnaj akcyi apazicyi. Heta Vital Rymašeŭski, Mikoła Statkievič, Andrej Sańnikaŭ, Ryhor Kastusioŭ, Uładzimir Niaklajeŭ i Jarasłaŭ Ramančuk.

My pacikavilisia, ci byli jany na Płoščy ŭ 2006-m i što tam rabili.

Rymašeŭski: byŭ hatovy

Vital Rymašeŭski ŭ 2006-m nie tolki byŭ na Płoščy, ale i aktyŭničaŭ tam. «Ja zajmaŭsia zboram podpisaŭ za adzinaha kandydata pa Frunzienskim rajonie Minska. Mieŭ razhalinavanuju sietku kantaktaŭ. I viečaram 19 sakavika my ŭsie byli na Płoščy, hatovyja dziejničać. Adnak sa štaba nijakich kamandaŭ nie pastupiła», — raspavioŭ karespandentu «NN» Vital Rymašeŭski.

Niaklajeŭ: na Płoščy-2006 zaklikaŭ da Płoščy-2010

Lidar kampanii «Havary praŭdu!» Uładzimir Niaklajeŭ taksama byŭ na akcyi ŭ 2006-m. «Ja byŭ tady ŭ kamandzie Kazulina. I vystupaŭ na toj Płoščy, i zaklikaŭ. Zaklikaŭ da Płoščy-2010, jak ciapier možna zdahadacca», — kaža spadar Niaklajeŭ.

Kastusioŭ: siadzieŭ na sutkach

Ryhor Kastusioŭ, kandydat ad BNF, u sakaviku 2006-ha na Płoščy nie byŭ: «Za try dni da 19 sakavika mianie aryštavali. Ja tady byŭ davieranaj asobaj Alaksandra Milinkieviča i, viadoma, źbiraŭsia 19 sakavika być u Minsku».

Statkievič: na «chimii»

Pad vartaj 19 sakavika znachodziŭsia i Mikoła Statkievič. Jon tady adbyvaŭ «chimiju» ŭ Baranavičach. «Za miesiac da akcyi mianie pierastali puskać na pracu. Sa mnoj u pakoi pastajanna znachodzilisia milicyjanty — bajalisia, što ŭciaku na Płošču», — zhadvaje Mikoła Statkievič.

Ramančuk i Sańnikaŭ: u kamandzie Milinkieviča

Kandydat ad partyi AHP Jarasłaŭ Ramančuk u 2006 hodzie byŭ na Płoščy: «Ja pracavaŭ u kamandzie Milinkieviča na tych vybarach i nie moh nie być tam».

Udzieł u mirnaj akcyi 19 sakavika 2006 hoda braŭ i Andrej Sańnikaŭ, kaardynatar «Jeŭrapiejskaj Biełarusi». «Jon byŭ na Płoščy razam z žonkaj. Jon tady pracavaŭ u kamandzie Milinkieviča na ahulnuju pieramohu», — paviedamiŭ «NN» pres-sakratar kandydata Alaksandr Atroščankaŭ.

Aleś Pilecki

***

Historyja Płoščaŭ

9 vieraśnia 2001

Prezidenckija vybary. Na Kastryčnickaj płoščy sabrałasia kala 5 tysiač čałaviek. Uładzimir Hančaryk, jaki pradstaŭlaŭ na prezidenckich vybarach apazicyjnyja siły, źjaviŭsia na mitynh ź vialikim spaźnieńniem. Prysutnyja sabralisia kala Pałaca prafsajuzaŭ. Pierad mitynhoŭcami vystupili Hančaryk, Michaił Čyhir, Jury Chadyka, Vincuk Viačorka. Paśla Hančaryk zaklikaŭ usich razychodzicca. Ale «zubry» trymali abaronu Pałaca prafsajuzaŭ da ranku.

19 sakavika 2006

Prezidenckija vybary. Na płoščy sabrałasia kala 20 tysiač čałaviek. Ludzi pryjšli, niahledziačy na mocnyja zapałochvańni teraktami i aryštami. U časie mitynhu išoŭ mocny śnieh, u vyniku čaho manifiestanty stali razychodzicca. Na zaklik Milinkieviča i Kazulina jany sabralisia na Płoščy i na nastupny viečar. Tady moładź stvaryła namiotavy haradok, jaki śpiecnaz uziaŭ šturmam tolki praz 4 dni, 24 sakavika. 25 sakavika, na Dzień Voli, niekalki dziasiatkaŭ tysiač demanstrantaŭ sprabavali avałodać centram Minska, ale śpiecnaz vycisnuŭ ich u park Janki Kupały. Ad sakavika 2006 i pajšła nazva Płošča.

SP

• 0
• 0
• 0
• 0
• 0
• 0
• 0
• 0