Haspadarčy sud Minska (HSM) prapanavaŭ staličnaj poŭnajevanhielskaj carkvie «Novaje žyćcio» ŭnieści ŭ dachod dziaržavy amal 250 młn. rubloŭ, paviedamiŭ BiełaPAN juryst abščyny Siarhiej Łukanin.
Pavodle jaho słoŭ, 28 lutaha ŭ carkvu pastupiła pastanaŭleńnie suda ź infarmacyjaj ab raspačynańni vykanaŭčaj vytvorčaści ŭ dačynieńni da relihijnaj abščyny. U pastanovie, u pryvatnaści, adznačajecca, što 9 lutaha ŭ sud pastupiła zajava Minskaha haradskoha kamiteta pryrodnych resursaŭ i achovy navakolnaha asiarodździa z patrabavańniem raspačać vykanaŭčuju vytvorčaść pa rašeńni HSM ad 29 lipienia 2010 hoda. Sud raspačaŭ vykanaŭčuju vytvorčaść i prapanavaŭ carkvie na praciahu siami dzion pačynajučy z 28 lutaha dobraachvotna vypłacić nazvanuju sumu. «U advarotnym vypadku sudovyja vykanaŭcy majuć prava aryštavać majomaść carkvy dla nastupnaha jaje prodažu i pahašeńnia sumy», — skazaŭ Łukanin.
Jon padkreśliŭ, što abščyna nie źbirajecca vypłačvać hetyja hrošy, pakolki ličyć usie rašeńni sudoŭ, vyniesienyja suprać carkvy, zakaznymi z boku ŭład, a tamu niezakonnymi. «Vierniki spadziajucca na Boha i nie buduć upuskać u budynak carkvy čynoŭnikaŭ, u tym liku sudovych vykanaŭcaŭ», — zajaviŭ juryst.
Rašeńniem ad 29 lipienia 2010 hoda HSM zadavoliŭ patrabavańni staličnaha pryrodaachoŭnaha viedamstva pa spahnańni z carkvy bolš za 257 młn. rubloŭ. Z hetaj sumy abščyna pavinna zapłacić kala 250 młn. rubloŭ u lik pahašeńnia ŭronu, naniesienaha pryrodzie, i kala 8 młn. rubloŭ u jakaści kampiensacyi dziaržaŭnaj pošliny, uniesienaj Minskim haradskim kamitetam pryrodnych resursaŭ i achovy navakolnaha asiarodździa pry padačy iskavaj zajavy.
Sprava raspačata pa isku staličnaha pryrodaachoŭnaha viedamstva, supracoŭniki jakoha ŭ kancy 2009 hoda vyjavili ślady naftapraduktaŭ u probach, uziatych na prajeznaj častcy darohi kala budynka carkvy, i interpretavali heta jak zabrudžvańnie navakolnaha asiarodździa. Jak śćviardžajuć pradstaŭniki carkvy, pry adbory prob hruntu nie prysutničali paniatyja i členy abščyny. Terytoryja vakoł carkvy raniej vykarystoŭvałasia kałhasam imia Kalinina dla sielhasvytvorčaści, a zatym na joj raźmiaščałasia niesankcyjanavanaja zvałka pramysłovych adchodaŭ z reštkami i ruchavikami aŭtamabilaŭ.
Ciapier čytajuć
Pahladzieli film «Piaščotna da siabie», źniaty pa dzika papularnaj biełaruskaj knizie — pra zaciukanuju žančynu, jakuju chočuć zrabić dla ŭsich zručnaj33
Kamientary